MARK 3 - Efik Old Bible With Sectional Headings

Jesus Emek Mbet Duopeba(Mt 12.9-14; Lk 6.6-11)

1EKEM Enye ɔtɔŋɔ ntak oduk ke synagogue: ndien owo emi ubɔk esie akpade odu do.

2Ndien mmɔ ekpeme Enye, mme Enye eyenam udɔŋɔ okure owo oro ke sabbath; kpaŋ mmɔ ekpodori Enye ikɔ.

3Edi Enye ɔdɔhɔ owo oro ubɔk esie akpade ete, Wɔrɔ di, da mi ke ufɔt.

4Ekem Enye ɔdɔhɔ mmɔ ete, Nte enen ndinam ufɔn ke sabbath, me ndinam idiɔk? ndinyaŋa uwem owo, me ndiwot? Edi mmɔ edodop.

5Ndien ke ini Enye ama akasuan enyin ese mmɔ ke iyaresit, koro nsɔŋesit mmɔ anamde Enye mfuhɔ, Enye ɔdɔhɔ owo oro ete, Nyanare ubɔk fo. Enye anyanare ubɔk: ubɔk esie onyuŋ akabare ɔfɔn.

6Edi mme Pharisee ewɔŋɔ ekeduk odu idaha oro ye mme Herodian ebaŋa Enye, eyom usuŋ nte mmɔ edisaŋade ewot Enye.

7Ekem Jesus adaha ye mbet Esie aka ke inyaŋ: ndien ata ediwak owo eto ke Galilee etiene Enye: ata ediwak owo ŋko, emi ekopde ikpɔ ŋkpɔ eke Enye anamde, eto ke Judea,

8ye ke Jerusalem, ye ke Idumaea, ye ke ŋkaŋ Jordan oko, ye ke edem Tyre ye Sidon, etiene Enye.

9Ndien Enye ɔnɔ mbet Esie uyo ete eda ekpri ubom ebet Imɔ, sia otu owo ewakde, mbak ndutime:

10koro Enye ama akanam udɔŋɔ okure ediwak owo, tutu kpukpru mmɔ emi enyenede udɔŋɔ ebere Enye man etuk Enye.

11Ndien ini ekededi eke ndidehe spirit ekutde Enye, mmɔ eduɔ Enye ke iso, enyuŋ efiori ete, Afo edi Eyen Abasi.

12Edi Enye ɔsɔŋɔ owuk mmɔ ete ekuyarare Imɔ.

13Ekem Jesus ɔdɔk ke obot, onyuŋ okot mmɔ emi Enye oyomde, ndien mmɔ edi.

14Enye onyuŋ onim owo duopeba, ete mmɔ ekpedu ye Imɔ, Imɔ ikponyuŋ idɔŋ mmɔ eka ekɔkwɔrɔ ikɔ

15ekenyuŋ enyene odudu ndibin mme demon nduɔk.

16Enye odori Simon enyiŋ, ete, Peter;

17onyuŋ okot James eyen Zebedee ye John eyen-eka James; onyuŋ odori mmɔ enyiŋ, ete, Boanerges, oro edi, Nditɔ obuma:

18okot Andrew ŋko, ye Philip, ye Batholomew, ye Matthew, ye Thomas, ye James eyen Alphaeus, ye Thaddaeus,

19ye Simon emi edide Zealot, ye Judas Iscariot, emi onyuŋ adade Enye ɔnɔ.

20Ekem Enye oduk ufɔk. Otu owo enyuŋ etɔŋɔ ntak ebono, tutu Jesus ye mbet Esie ikemeke ndidia ŋkpɔ.

21Edi ke ini iman Esie ekopde, mmɔ ewɔŋɔ eka ndimum Enye: koro mmɔ edɔhɔde ete, Ibuot ɔbɔhɔ Enye.

22Ndien mme scribe emi etode ke Jerusalem esuhɔre edi, edɔhɔ ete, Enye enyene Beelzebub, ŋko, Enye ada ɔbɔŋ mme demon ebin mme demon ɔduɔk.

23Ndien Enye okot mmɔ onyuŋ otop ŋke ɔnɔ mmɔ ete, Satan ekeme didie ndibin mme demon nduɔk?

24Edieke obio edidem abaharede ada aŋwana ye idem esie, obio oro ikemeke ndisɔŋɔ nda.

25Onyuŋ edieke ufɔk abaharede ada aŋwana ye idem esie, ufɔk oro ikemeke ndisɔŋɔ nda.

26Ndien edieke Satan ama adaha aŋwana ye idem esie onyuŋ abahare, enye ikemeke ndisɔŋɔ nda, edi enyene nditak.

27Edi baba owo kiet ikemeke ndiduk ke ufɔk ɔkpɔsɔŋ owo mbume inyene esie, ke enye mibemke iso ibɔp ɔkpɔsɔŋ owo oro; adaŋoro ndien ke enye edibume ufɔk esie.

28Ke akpanikɔ ke ndɔhɔ mbufo nte, Eyefen nditɔ owo kpukpru ndudue mmɔ ye ikɔ-isuŋi ekededi eke mmɔ etiŋde:

29edi owo ekededi eke editiŋde ikɔ-isuŋi adian Edisana Spirit inyeneke erifen ke nsinsi, edi edue isop eke odotde ubiom-ikpe ke nsinsi:

30koro mmɔ edɔhɔde ete, Enye enyene edidehe spirit.

31Ndien eka Esie ye nditɔ-eka Esie edi, eda ke aŋwa, edɔŋ ekokot Enye.

32Edi otu owo etie ekan Enye ekuk: mmɔ enyuŋ edɔhɔ Enye ete, Sese, uka ye nditɔ-uka ke eda ke aŋwa eyom Fi.

33Edi Enye ɔbɔrɔ mmɔ ete, Anie edi eka Mi ye nditɔ-eka Mi?

34Ndien Enye asuan enyin ese mmɔ emi ekande Enye ekuk etie, ete, Sese eka Mi ye nditɔ-eka Mi.

35Koro owo ekededi eke anamde se Abasi amade, enye edi eyen-eka Mi eren ye eyen-eka Mi aŋwan ye eka Mi.