JOSHUA 13 - Efik Old Bible With Sectional Headings

Mme Isɔŋ Emi Nditɔ Israel Enyenede Ndikan Nnyuŋ Nda Nnyene

1EKEM Joshua akabare akani eren, osim ediwak usen; ndien Jehovah ɔdɔhɔ enye, ete, Afo eyedi akani eren, omosim ediwak usen; ndien osuk ediwak isɔŋ eti-eti eke ekpedade.

2Isɔŋ emi ɔsuhɔ kaŋa; ofuri adaŋa mme philistine,

3ye ofuri Geshuri, ɔtɔŋɔde ke Shihor emi anade ke iso Egypt, tutu osim adaŋa Ekron ese edem edere, emi ebatde ke eke mme Canaanite: mbɔŋ mme Philistine ition; mme Gazite, ye mme Ashdodite, ye mme Ashkelonite, ye mme Gittite, ye mme Ekronite;

4ye mme Avvim ŋko ke edem usuk: ofuri isɔŋ mme Canaanite, ye Mearah emi enyenede mme Zidonian, tutu osim ke Aphek, osim adaŋa mme Amorite:

5ye isɔŋ mme Gebalite ŋko, ye ofuri Lebanon ke edem usiaha-utin, ɔtɔŋɔde ke Baal-gad ke ukot obot Hermon, tutu osim ke ɔtɔ emi edukde Hamath.

6Kpukpru mme andiduŋ ikpɔ obot, ɔtɔŋɔde ke Lebanon tutu osim ke Misrephoth-maim, kpukpru mme Zidonian, mmɔ ke ami ndisioŋo mfep ke iso nditɔ Israel: edi sin afia, da enye nɔ Israel ke udeme, kpa nte ŋketemede fi.

7Bahare ndien isɔŋ emi nɔ mme esien usukkiet, ye ibio esien Manasseh ete eda enyene,

8emi mme Reubenite ye mme Gadite ema ema udeme mmɔ ye mmɔ, nte Moses ɔkɔnɔde mmɔ ke edem Jordan oko ke edem usiaha-utin, kpa nte Moses owo Jehovah ɔkɔnɔde mmɔ;

9Ɔtɔŋɔde ke Aroer emi odude ke mben itihere Arnon, ye obio emi anade ke ufɔt itihere, ye ofuri una-isɔŋ Medeba, tutu osim ke Dibon;

10ye kpukpru obio Sihon ɔbɔŋ mme Amorite, emi akadade ubɔŋ ke Heshbon, tutu osim adaŋa nditɔ Ammon,

11ye Gilead, ke adaŋa mme Geshurite, ye eke mme Maacathite, ye ofuri obot Hermon, ye ofuri Bashan tutu osim ke Salecah;

12ofuri isɔŋ emi Og ekedide ɔbɔŋ mmɔ ke Bashan, emi akadade ubɔŋ ke Ashtaroth ye ke Edrei (enye osuhɔ ke otu mme nsuhɔ mme Rephaim); ndien Moses akakan mmɔ, onyuŋ ɔbɔ mmɔ itie.

13Edi nditɔ Israel ibɔhɔ isɔŋ mme Gehsurite, ye eke mme Maacathite: edi mme Geshurite ye mme Maacathite eduŋ ke otu Israel tutu osim mfin emi.

14Edi enye inɔŋɔ esien Levi udeme: mme uwa ikaŋ Jehovah Abasi Israel edi udeme mmɔ; kpa nte enye ɔkɔdɔhɔde mmɔ.

15Ndien Moses ɔnɔ esien nditɔ Reuben udeme ke ubon, ke ubon.

16Ndien adaŋa mmɔ ɔtɔŋɔ ke Aroer, emi odude ke mben itihere Arnon, ye ke obio emi odude ke ufɔt itihere, ye ofuri una-isɔŋ emi ekperede Medeba;

17Hehsbon, ye kpukpru obio esie emi edude ke una-isɔŋ oro; Dibon, ye Bamoth-baal, ye Beth-baal-meon,

18ye Jahaz, ye Kedemoth, ye Mephaath,

19ye Kiriathaim, ye Sibmah, ye Zereth-shahar, ke obot itihere,

20ye Beth-peor, ye Ashdoth-pisgah,

21ye Beth-jeshimoth; ye kpukpru obio una-isɔŋ, ye ofuri isɔŋ Sihon ɔbɔŋ mme-Amorite, emi akadade ubɔŋ ke Heshbon, emi Moses akasuande ye mbɔŋ Midian, kpa Evi, ye Rekem, ye Zur, ye Hur, ye Reba, ikpɔ owo Sihon, emi ekeduŋde isɔŋ oro.

22Nditɔ Israel enyuŋ ewot Balaam eyen Beor abia-idiɔŋ ke ofut ke otu mmɔ eke ekpaŋade afai.

23Ndien adaŋa nditɔ Reuben edi Jordan kpa mben esie. Emi edi udeme nditɔ Reuben, nte mme ubon mmɔ esaŋade, kpa mme obio mmɔ ye mme obio iŋwaŋ mmɔ.

24Moses onyuŋ ada udeme ɔnɔ esien Gad, kpa nditɔ Gad ŋko, ke ubon, ke ubon.

25Ndien adaŋa mmɔ edi Jazer, ye kpukpru obio Gilead, ye ubak isɔŋ nditɔ Ammon, tutu osim ke Aroer emi asakde iso ese Rabbah;

26onyuŋ ɔtɔŋɔde ke Heshbon ada osim Ramath - mizpeh, ye Betonim; onyuŋ ɔtɔŋɔde ke Mahanaim ada osim adaŋa Debir;

27ye Beth-haram, ye Beth-nimrah; ye Succoth, ye Zaphon, ke itihere ubak isɔŋ Sihon ɔbɔŋ Baashan emi ɔsuhɔde, Jordan ye mben esie, tutu osim ke utit inyaŋ Chinnereth ke edem Jordan oko ke usiaha-utin.

28Emi edi udeme nditɔ Gad, ke ubon, ke ubon, mme obio mmɔ, ye mme obio iŋwaŋ mmɔ.

29Moses onyuŋ ada udeme ɔnɔ ubak esien Manasseh ŋko: ndien ubak nditɔ Manasseh eda ntem ke ubon, ke ubon.

30Ndien adaŋa mmɔ ɔtɔŋɔ ke Mahanaim, ofuri Bashan, kpa ofuri isɔŋ Og ɔbɔŋ Bashan; ndien kpukpru ŋkpri obio Jair, emi edude ke Bashan, obio ata;

31ye ubak Gilead, ye Ashtaroth, ye Edrei, obio emi Og akadade ubɔŋ mmɔ ke Bashan, enyene nditɔ Mashir eyen Manasseh, kpa ubak nditɔ Machir, ke ubon, ke ubon.

32Mme mmɔ emi ke Moses ɔnɔ mmɔ udeme ke una-isɔŋ Moab, ke edem Jordan oko, ekpere Jericho,

33ke edem usiaha-utin. Edi Moses inɔŋɔ esien mme Levite baba udeme kiet; edi Jehovah Abasi Israel edi udeme mmɔ, kpa nte enye ɔkɔdɔhɔde mmɔ.