1EKEM David edidem ɔdɔhɔ ofuri esop, ete, Solomon eyen mi, emi Abasi emekde ikpɔŋ-ikpɔŋ, edi eyenɔwɔŋ, onyuŋ esehe, ndien utom oro omokpon: koro temple emi midige eke owo, edi enyene Jehovah Abasi.
2Mma nnyuŋ nda ofuri ukeme mi ntim ŋkpɔ nnim nnɔ ufɔk Abasi mi, gold ke eke gold, ye silver ke eke silver, ye okpoho ke eke okpoho, ye ukwak ke eke ukwak, ye eto ke eke eto; itiat onyx, ye itiat eke esinde, ye edisem itiat, ye ŋwed-nwed itiat, ye kpukpru oruk ɔsɔŋ-urua itiat, ye itiat marble ediwak.
3Ndien ŋko, koro mmade ufɔk Abasi mi, mmenyene gold ye silver eke edide okimmɔ, nda nnɔ ufɔk Abasi mi, ŋkɔrɔ ye kpukpru se ŋketimde nnɔ edisana ufɔk.
4Kpa tɔsin talent gold ita emi otode ke gold Ophir, ye tɔsin talent eti silver itiaba eke edidade efuk ibibene ufɔk:
5gold ke eke gold, ye silver ke eke silver, ye ke kpukpru oruk utom ke ubɔk mbon-usɔ. Anie ndien omonyime ndiyɔhɔ ubɔk esie mfin emi nnɔ Jehovah?
6Ndien mme etubom mme ete, ye mbɔŋ esien Israel, ye mbɔŋ mme tɔsin, ye mbɔŋ mme ikie, ye mbɔŋ utom edidem, etat ubɔk enɔ.
7Ntre ke mmɔ eda tɔsin talent gold ition, ye tɔsin daric duop, ye tɔsin talent silver duop, ye tɔsin talent okpoho itie efureta, ye tɔsin talent ukwak itie ikie, enɔ ke utom ufɔk Abasi.
8Ndien mmɔ eke enyenede itiat, eda mmɔ esin ke ebiet unim ŋkpɔ ufɔk Jehovah, esin Jehiel Gershonite ke ubɔk.
9Ndien kpukpru owo edat esit, koro mmɔ etatde ubɔk: koro mmɔ etatde ubɔk enɔ Jehovah ke ofuri esit: David edidem ŋko onyuŋ adat esit eti-eti.
10Ndien David ɔkɔm Jehovah ke iso ofuri esop; David onyuŋ ɔdɔhɔ, ete, Ekɔm fi, Jehovah Abasi Israel ete nnyin, ke nsinsi-nsinsi.
11O Jehovah, ubom, ye odudu, ye ubɔŋ, ye akakan, ye uteŋe edi okuomɔ: koro kpukpru ŋkpɔ ke enyɔŋ ye ke isɔŋ emenyene fi; O Jehovah, itie edidem edi okuo, afo onyuŋ okoŋ nte etubom kpukpru.
12Inyene ye ukpono eto fi ke iso, afo onyuŋ edi andikara kpukpru: odudu ye uko enyuŋ edu fi ke ubɔk; onyuŋ enyene fi ndinam kpukpru ekpon enyuŋ esɔŋ.
13Nnyin imɔkɔm fi, ndien, O Abasi nnyin, inyuŋ itoro enyiŋ ubɔŋ fo.
14Edi ami ndi anie, ikɔt mi enyuŋ edi mme anie, eke nnyin ikemede nditat ubɔk ntem? Ŋkɔm kpukpru ŋkpɔ eto fi, nnyin inyuŋ inɔ fi se itode fi ke ubɔk.
15Ŋkɔm nnyin idi isen owo ke iso fo, ye oduduŋ ke iso fo, nte kpukpru mme ete nnyin: mme usen nnyin ke isɔŋ ebiet mfut, idorenyin inyuŋ iduhe.
16O Jehovah Abasi nnyin, kpukpru ekese ŋkpɔ emi nnyin itimde ndibɔp ufɔk nnɔ fi ye edisana enyiŋ fo, eto fi ke ubɔk, kpukpru enyuŋ edi okuomɔ.
17Mmonyuŋ mfiɔk, O Abasi mi, nte afo odomode esit, onyuŋ amade mmɔ eke enende. Ami ŋkatat ubɔk mi nnɔ kpukpru ŋkpɔ emi ke edinen esit: ndien ke emi ke ndat esit ndikut ikɔt fo emi edude mi, nte etatde ubɔk enɔ fi,
18O Jehovah Abasi Abraham, ye eke Isaac, ye eke Israel, mme ete nnyin, nim emi ke nsinsi ke se ekikere esit ikɔt fo ebotde, nyuŋ nam esit mmɔ enen ye afo:
19nyuŋ nɔ Solomon eyen mi esit kiet, man enye onim ibet fo, ye ido fo, ye mme ewuhɔ fo, onyuŋ anam kpukpru, onyuŋ ɔbɔp temple emi ntimde ŋkpɔ mbeŋe.
20Ndien David ɔdɔhɔ ofuri esop oro, ete, Mbufo, ndien etoro Jehovah Abasi mbufo. Ndien ofuri esop oro etoro Jehovah Abasi mme ete mmɔ, enyuŋ enuhɔ, etuak ibuot enɔ Jehovah, ye edidem.
21Ndien mmɔ ewa uwa emem enɔ Jehovah, enyuŋ efɔp edifɔp uwa enɔ Jehovah, ke edem, usen oro, kpa tɔsin enaŋ, ye tɔsin okukim erɔŋ, ye tɔsin nditɔ-erɔŋ, ye edi-ŋwɔŋ uwa mmɔ, ye uwa ediwak, enɔ ofuri Israel;
22mmɔ enyuŋ edia ŋkpɔ enyuŋ eŋwɔŋ ke iso Jehovah, ke usen oro ke akwa idaresit: mmɔ enyuŋ etɔŋɔ ntak enim Solomon eyen David ke edidem, enyuŋ eyet enye aran enɔ Jehovah enim ke ɔbɔŋ, enyuŋ enim Zadok ke oku.
23Ekem Solomon ɔsuhɔre etie ke ebekpo Jehovah nte edidem, ke itie David ete esiemɔ, onyuŋ oforo; ndien ofuri Israel ekop uyo esie.
24Ndien kpukpru mbɔŋ, ye mbon-uko, ye kpukpru nditɔ edidem David nde, ewuk ubɔk enɔ Solomon edidem.
25Ndien Jehovah anam Solomon okpon eti-eti ke iso ofuri Israel, onyuŋ ɔnɔ enye oruk ubɔŋ itie edidem eke akananam midoroke baba edidem Israel kiet eke ekebemde enye iso.
26Ntem ke David eyen Jesse akada ubɔŋ ofuri Israel.
27Ndien ini emi enye akadade ubɔŋ Israel, edi isua aba; ada ubɔŋ ke Hebron ke isua itiaba, onyuŋ ada ubɔŋ ke Jerusalem ke isua edip ye duopeta.
28Enye onyuŋ akpa ke eti usɔŋ ɔyuhɔ usen, ye inyene, ye ukpono; ndien Solomon eyen esie ada ubɔŋ ke itie esie.
29Ndien ama edi ikɔ David edidem akpa ye akpatre, sese, ewet mmɔ esin ke ŋwed Samuel ete-ŋkukut, ye ke ŋwed Nathan prophet, ye ke ŋwed Gad ete-ŋkukut;
30ye ofuri ubɔŋ esie, ye uko esie, ye ini eke ebede enye, ye Israel, ye kpukpru ndidem mme idut.
Who We AreWhat We EelieveWhat We Do
2025 by iamachristian.org,Inc All rights reserved.
