DANIEL 10 - Efik Old Bible With Sectional Headings

Ŋkukut Emi Daniel Okokutde ke Mben Akwa Akpa

1KE ɔyɔhɔ isua Cyrus edidem Persia ita, eyarare ŋkpɔ enɔ Daniel emi enyiŋ esie ekerede Belteshazzar; ndien ikɔ oro edi akpanikɔ, ekɔŋ onyuŋ okpon. Enye onyuŋ otim ɔfiɔk ikɔ oro, onyuŋ ɔwɔrɔ ɔniɔŋ ke ŋkukut oro.

2Ke ini oro ami Daniel ntie ntua eyet ke ofuri usen edip ye kiet.

3Ntaha edinem uyo, unam ye wine inyuŋ idukke mi ke inua, nnyuŋ nyereke aran baba tutu ofuri usen edip ye kiet eyɔhɔ.

4Ekem ke ɔyɔhɔ usen akpa ɔfiɔŋ edip ye inaŋ, ami ndu ke mben akwa akpa, enye edi Hiddekel:

5ndien mmenere enyin mi nnyuŋ nse, ndien, sese, owo kiet emi esinede linen ke idem, ndien enye ɔbɔbɔ eti gold Uphaz ke isin: idem esie ebiet beryl,

6iso esie onyuŋ ebiet mineŋ-mineŋ, enyin esie enyuŋ ebiet utuenikaŋ eke esakde, ubɔk esie ye ukot esie enyuŋ ebiet iso edisem okpoho ŋko: ndien uyo esie ebiet uyom akwa otu owo.

7Ndien ami Daniel ke idem mi ŋkut ŋkutkut oro: edi mbio emi edude ye ami ikwe ŋkukut oro; edi akwa nnyekidem odoro mmɔ ke idem: ndien mmɔ efehe eka ekedibe.

8Ndien ami nsuk ikpɔŋ ke idem mi, nnyuŋ ŋkut akamba ŋkukut emi; baba odudu inyuŋ isukke mi ke idem; uyai mi onyuŋ akabare abiara mi ke idem, nnyuŋ nnyeneke aba odudu.

9Ndien ŋkop uyo ikɔ esie: ndien ke ini ŋkopde uyo ikɔ esie, ami ndede ɔkpɔsɔŋ idap, ŋkubi iso mi ke isɔŋ.

10Ndien sese, ubɔk edituk mi, onyuŋ emen mi etem ke edɔŋ mi ye ke eka-ubɔk mi.

11Ndien enye ɔdɔhɔ mi, ete, O Daniel, owo emi enemde Abasi esit, tim fiɔk ikɔ emi ami ndɔhɔde fi: nyuŋ daha da ke itie fo: koro edɔŋde mi ke emi ntiene fi. Ndien ke ini enye ɔdɔhɔ ikɔ emi ye ami, ami nda ke nnyekidem.

12Ndien enye ɔdɔhɔ mi, ete, Kufehe, Daniel; koro ekekopde uyo fo toto ke akpa usen oro afo okonimde esit fo ndifiɔk nnyuŋ nsuhɔre idem fo nnim ke iso Abasi fo: ami ndi ndien ke uyo fo.

13Ndien ɔbɔŋ idut Persia akada ke iso mi ke usen edip ye kiet: ndien, sese, Michael akpan mbɔŋ kiet edi ediŋwam mi: ndien ami nsuk ntie do ye ndidem Persia.

14Mmedi ndien ndisian fi se iditibede inɔ oruk fo ke ukperedem usen: koro ŋkukut emi eyena kaŋa ɔnɔ ini iso.

15Ndien adaŋaemi enye ɔdɔhɔde oruk ikɔ ntem ye ami, ŋkubi iso mi ke isɔŋ, nnyuŋ ndop uyo.

16Ndien, sese, owo kiet emi ebietde nditɔ owo edi edituk mi ke mkpɔk-inua. Ndien ntat inua mi nnyuŋ ntiŋ ikɔ, ndien ndɔhɔ enye oro adade mi ke iso, nte, Ɔbɔŋ mi, ŋkukut esin ukut mi akabare oduk mi ke idem, ndien nnyeneke aba odudu.

17Owo Ɔbɔŋ mi emi edikeme didie nditiŋ ikɔ ye Ɔbɔŋ mi emi? koro odudu miduhe mi aba ke idem ndo-ndo emi, ibifik minyuŋ isukke mi ke idem.

18Ndien se ibietde owo ɔtɔŋɔ ntak otuk mi, onyuŋ ɔsɔŋ mi idem, ndien enye ɔdɔhɔ ete,

19Kufehe, O owo emi enemde Abasi esit; ɔfɔn ɔnɔ fi, sɔŋ esit, tim sɔŋ esit. Ndien ke adaŋemi enye ɔdɔhɔde ntre ye ami, ami ŋkop idem, nnyuŋ ndɔhɔ nte, Yak Ɔbɔŋ mi etiŋ ndien; koro afo amanam idem ɔsɔŋ mi.

20Ndien enye ɔdɔhɔ ete, Nte afo ɔmɔfiɔk se ikesinde mi ndi ntiene fi? Ndien ke emi ke mmɔŋ mfiak ŋka ŋkaŋwana ekɔŋ ye ɔbɔŋ Persia: ndien ami mmɔŋ ŋwɔrɔ; ndien, sese, ɔbɔŋ Javan ke edi.

21Nyenyuŋ ŋwut fi se ekewetde ke ŋwed akpanikɔ. Ndien baba owo kiet eke ɔsɔŋde ada ye ami ke ŋkpɔ emi iduhe, ke mibɔhɔke Michael ɔbɔŋ mbufo.