ŊWED MBON ROME 3 - Efik Old Bible With Sectional Headings

Kpukpru Owo Ema Enam Idiɔk-Ŋkpɔ

1DIDIE ke Jew akan owo eken ndien? erina mbobi onyuŋ ɔfɔn ke nso?

2Ɔfɔn eti-eti ke kpukpru usuŋ. Ke akpa itie, ekeyak ikɔ Abasi esin mmɔ ke ubɔk.

3Ɔwɔrɔ didie ndien? Edieke ndusuk mmɔ mikanamke akpanikɔ nte unana akpanikɔ mmɔ edinam akpanikɔ Abasi okpu? Idige ntre.

4Yak ewut ete Abasi edi akpanikɔ, kpukpru owo ekpedi mme osu-nsu nte ewetde ete,

Man ekpetebe Fi ke ikɔ Fo.

Afo onyuŋ akan ke ini ekpede ikpe ye Afo.

5Edi edieke mme ukwaŋkpɔ nnyin eyararede edinen ido Abasi ewut, nso ke nyin ididɔhɔ? Nte Abasi ɔdiɔk ndinam ke ini Enye adade iyat esit amia owo ufen? (ntetiŋ nte owo). Idige ntre.

6Koro edieke edide ntre, Abasi edinam didie ekpe ererimbot?

7Edi edieke otode ke nsu mi akpanikɔ Abasi awak akan, anam Enye enyene ubɔŋ, nsidi ntak ndien eke esuk ekpede, ikpe ye ami nde nte anam-idiɔk?

8nsinyuŋ ikpan nnyin ndinam idiɔk man ufɔn ɔwɔrɔ? (nte edoride nnyin ikɔ ke edem, ndusuk owo enyuŋ edɔhɔde ete ke nnyin itiŋ ntem). Mmɔ emi etiŋde ntem edot ubiom-ikpe.

9Nso naŋa? Nte itie nnyin ɔfɔn akan eke mmɔ? Ke baba usuŋ kiet. Koro nnyin imebebem iso idori mme Jew ye mme Greek, ite kpukpru mmɔ esine ke idak idiɔk-ŋkpɔ;

10nte emi ewetde ete,

Baba owo kiet eke enende iduhe, baba owo kiet;

11Baba owo kiet eke enyenede eti ibuot iduhe,

Baba owo kiet eke oyomde Abasi iduhe;

12Kpukpru mmɔ emewaha ekpɔŋ usuŋ, mmɔ kpukpru emekabare ediɔk;

Baba owo kiet eke anamde eti iduhe, baba mkpasip kiet:

13Odudu itɔŋ mmɔ edi ana-iŋwaŋ udi:

mmɔ eda edeme mmɔ ebiaŋa abiaŋa

Ifɔt ibɔm odu mmɔ ke idak mkpɔk-inua:

14Isuŋi ye ndot-ndot ikɔ eyɔhɔ mmɔ ke inua:

15Ikpat mmɔ esɔp ndiduɔk iyip

16Nsobo ye nditaha odu ke usuŋ mmɔ;

17Mmɔ inyuŋ ifiɔkke usuŋ emem:

18Baba uteŋe Abasi iduhe mmɔ ke iso.

19Edi nnyin imɔfiɔk ite se ededi eke ibet etiŋde, ke etiŋ ɔnɔ mmɔ emi edude ke idak ibet; man inua ɔkibɔ kpukpru owo, ofuri ererimbot enyuŋ esine ke idak ubiom-ikpe Abasi:

20koro ikpe iditebeke baba owo kiet ke iso Esie kabaŋa erinam utom ibet, koro ifiɔk idiɔk-ŋkpɔ otode ke ibet.

21Edi ke emi ema eyarare edinen ido eke Abasi eke misaŋake ye ibet, edi ibet ye mme prophet edi mme ntiense enɔ enye;

22edi edinen ido eke Abasi, emi otode ke mbuɔtidem ke Jesus Christ, osim kpukpru owo emi enimde ke akpanikɔ. Koro ubahare iduhe ke otu owo:

23koro kpukpru owo ema enam idiɔk-ŋkpɔ, enyuŋ etaba ubɔŋ Abasi.

24Edi etebe mmɔ ikpe ke ikpikpu ke mfɔn Esie, oto ke erifak emi odude ke Christ Jesus:

25emi Abasi okosiode onim ete edi uwa emem ke iyip Esie, oto ke mbuɔtidem; man Abasi ayarare edinen ido Esie, sia Enye ke ime osioŋode idem efep ke mme idiɔk-ŋkpɔ emi owo ekenamde ke ini eke ebede;

26man onyuŋ ayarare edinen ido Esie ke ini emi, ete Imɔ ke Idem Imɔ idi edinen, inyuŋ inam ikpe etebe owo eke ɔbuɔtde idem ke Jesus.

27Enye-e mbure ndien? Ema esio enye efep. Oto ke nso oruk ntak? ke ntak utom? Baba, oto ke ntak mbuɔt idem.

28Koro nnyin ibat ite eda mbuɔtidem enam ikpe etebe owo, erinam utom ibet inyuŋ isaŋake do.

29Midige ntre, nte Abasi edi Abasi mme Jew ikpɔŋ? Nte Enye inyuŋ idige Abasi mme Gentile nde? Ke akpanikɔ Enye edi Abasi mme Gentile nde; sia Abasi edide Abasi kiet,

30emi edidade mbuɔtidem anam ikpe etebe mmɔ emi enade mbobi, edinyuŋ adade kpa mbuɔtidem oro anam ikpe etebe mmɔ emi minaŋa mbobi.

31Nte nnyin ida mbuɔtidem emi inam ibet ɔwɔrɔ ikpikpu naŋa? Baba, nnyin inam ibet ɔsɔŋɔ ada.