2 CHRONICLES 20 - Efik Old Bible With Sectional Headings

Edidem Jahoshaphat Akan Moab ye Ammon ke Ekɔŋ

1EDIKEM ke ŋkpɔ emi ema ekebe, nditɔ Moab, ye nditɔ Ammon, ye ubak mme Meunim ŋko edi ndiŋwana ekɔŋ ye Jehoshaphat.

2Ekem owo edi editiŋ ɔnɔ Jehoshaphat, ete, Akwa otu owo ke edi ekɔŋ ye afo, eto ke edem inyaŋ oko, ye ke Syria; ndien, sese, ke edu ke Hazazon Tamar, oro edi En-gedi.

3Ndien Jehoshaphat edikhe, onyuŋ akabare iso oyom Jehovah, onyuŋ ɔkwɔrɔ utre-udia ke ofuri Judah.

4Ndien Judah ebono ekpe Jehovah ubɔk: mmɔ enyuŋ eto ke kpukpru obio Judah, edi ndiyom Jehovah.

5Ndien Jehoshaphat ada ke esop Judah ye Jerusalem, ke ufɔk Jehovah, ke iso obufa okure, onyuŋ ɔdɔhɔ ete,

6O Jehovah Abasi mme ete nnyin, nte idige afo edi Abasi ke enyɔŋ? Nte idige afo akara kpukpru mme idut ke ererimbot? Nte odudu ye nsɔŋ-idem iduhe fi ke ubɔk? Ndien baba owo kiet eke ekemde ubɔk ye afo iduhe.

7Nte afo, O Abasi nnyin, ukebinke mme andiduŋ isɔŋ emi ke iso ikɔt fo Israel ufep, ukonyuŋ udaha enye unɔ ubon Abraham andima fi ke nsinsi?

8Ndien mmɔ eduŋ ke esit, enyuŋ ebɔp edisana ebiet enɔ enyiŋ fo ke esit, ete,

9edieke idiɔk-ŋkpɔ editienede nnyin, edide ofut, edide ufen, onyuŋ edide idiɔk udɔŋɔ, mme akaŋ, ndien nnyin ima ida ke iso ufɔk emi, ye ke iso fo (koro enyiŋ fo odude ke ufɔk emi) inyuŋ iseme inɔ fi ibaŋa ukut nnyin, ndien afo eyekop, onyuŋ anyaŋa.

10Se, ndien, nditɔ Ammon, ye eke Moab, ye eke obot Seir, emi afo mukayakke Israel eduk ke edem mmɔ, ke ini mmɔ eketode ke Egypt, edi ewɔŋɔre ekpɔŋ mmɔ, inyuŋ isuanke mmɔ;

11ndien sese, mmɔ enam nnyin usiene ke eridi ndibin nnyin mfep ke udeme fo emi afo ɔkɔnɔde nnyin, ete ida inyene,

12O Abasi nnyin nte afo udukpehe ikpe ye mmɔ? koro nnyin minyeneke odudu ke iso akwa otu owo emi edide ndiŋwana ekɔŋ ye nnyin? nnyin inyuŋ ifiɔkke se nnyin idinamde: edi nnyin idori enyin ye afo.

13Ndien ofuri Judah ada ke iso Jehovah, ye ŋkpri nditɔwɔŋ mmɔ, ye iban mmɔ, ye nditɔ mmɔ.

14Ndien spirit Jehovah oduk ke idem Jahaziel, eyen Zechariah, eyen Benaiah, eyen Jeiel, eyen Mattaniah, Levite kiet, emi otode ke nditɔ-iren Asaph, ke otu mbon esop:

15ndien enye ɔdɔhɔ, ete, mbufo ekpaŋ utɔŋ ofuri Judah, ye mme andiduŋ Jerusalem, ye edidem Jehoshaphat, ntem ke Jehovah ɔdɔhɔ mbufo, ete, Mbufo ekudikhe, nsia okunyuŋ oyomo mbufo ke iso akwa otu owo emi; koro midige mbufo ke ekɔŋ emi enyene, ke edi eke Abasi.

16Mbufo esuhɔre ebine mmɔ mkpɔŋ: sese, mmɔ ke edɔk usuŋ obot Ziz: ndien mbufo eyesim mmɔ ke utit ebedeŋ ke iso wilderness Jeruel.

17Mbufo ekukpa ndiŋwana ekɔŋ emi: koro Jehovah odude ye mbufo.

18Ndien Jehoshaphat otuk iso esie ese isɔŋ; ndien ofuri Judah, ye mme andiduŋ Jerusalem eduɔŋɔ ke iso Jehovah, etuak ibuot enɔ Jehovah.

19Ndien mme Levite emi etode ke nditɔ mme Kohathite, ye eke mme Korahite, edaha ke enyɔŋ etoro Jehovah Abasi Israel ke ata ɔkpɔsɔŋ uyo.

20Ekem mmɔ ebak edemere ke usenubɔk ewɔŋɔ ke wilderness Tekoa: ndien ke ini mmɔ ewɔŋɔde, Jehoshaphat ada ɔdɔhɔ ete, O Judah, ye mme andiduŋ Jerusalem, mbufo ekop uyo mi: eberi idem mbufo ye Jehovah Abasi mbufo, ndien eyemum mbufo ekama; enim uyo mme prophet esie ke akpanikɔ, ndien mbufo eyekut unen.

21Ndien adaŋemi enye etemede kpukpru owo, enye onim mme andikwɔ nnɔ Jehovah, eke esinede mbana, ebe mbon-ekɔŋ iso ewɔŋɔ etoro, enyuŋ edɔhɔ, ete, Mbufo etoro Jehovah; koro ima esie edide nsinsi.

22Ekem adaŋemi mmɔ etɔŋɔde ikwɔ ye itoro, Jehovah anam mbon-udibe ebine nditɔ Ammon, ye Moab, ye eke obot Seir, emi ekedide ekɔŋ ye Judah; ndien mmɔ esuana.

23Ndien nditɔ Ammon ye Moab edaha ke enyɔŋ eŋwana ekɔŋ ye mme andiduŋ obot Seir, enyuŋ ewot enyuŋ esobo mmɔ: ndien ema ekesuan mme andiduŋ obot Seir ema, kpukpru owo ufan anyaŋa ndisobo ufan.

24Ekem adaŋemi Judah esimde ke ɔtɔ-ukpeme ke wilderness, mmɔ ekabare ese otu owo oro, ndien, sese, mmɔ eyedi okpo-okpo emi eduɔŋɔde ke isɔŋ; baba owo kiet ikonyuŋ ibɔhɔke.

25Ndien adaŋaemi Jehoshaphat ye ikɔt esie edide ndibume mbume mmɔ, mmɔ ekut ediwak inyene ke otu mmɔ, ye okpo, ye ŋkpɔ-uto, ndien mmɔ esioŋo eda ke idem mmɔ, tutu ikwe nte ebiomde; ndien mmɔ eda usen ita etaŋ mbume oro, koro mmɔ ewakde eti-eti.

26Ekem ke ɔyɔhɔ usen inaŋ, mmɔ ebono ke itihere Beracah (Eridiɔŋ); koro do ke mmɔ ekɔm Jehovah: mmɔdo enyiŋ ebiet oro ekerede itihere Beracah tutu osim mfin emi.

27Ndien kpukpru owo Judah ye Jerusalem enyɔŋɔ ke Jerusalem ke idara, Jehoshaphat onyuŋ ebe mmɔ iso: koro Jehovah akanamde mmɔ edara ebaŋa mme asua mmɔ.

28Ekem mmɔ esim ke Jerusalem ekama psaltery, ye harp, ye ukorowo, edi ke ufɔk Jehovah.

29Ndik Abasi onyuŋ odoro kpukpru mme idut ererimbot ke ini mmɔ ekopde nte Jehovah akaŋwanade ekɔŋ ye mme asua Israel.

30Ntre ke isɔŋ Jehoshaphat ana suŋ: Abasi esie okonyuŋ ɔnɔ enye nduɔk-odudu ke edem kpukpru.

31Ntem ke Jehoshaphat ada ubɔŋ Judah: enye edi isua edip ye efut adaŋemi enye adade ubɔŋ: onyuŋ edi edidem ke Jerusalem ke isua edip ye ition: ndien enyiŋ eka esie ekere Azubah eyen Shilhi aŋwan.

32Enye onyuŋ asaŋa ke usuŋ ete esie Asa, inyuŋ iwahake ikpɔŋ enye edi anam se inende ke iso Jehovah.

33Edi isioŋoke mme edikoŋ ebiet ifep: koro mbio-obio mika-iwukke kaŋa esit mmɔ, iyom mme Abasi mme ete mmɔ.

34Ndien mbemiso ye akpatre ikɔ Jehoshaphat emi esuhɔde, sese, ekewet mmɔ esin ke ŋwed Jehu eyen Hanani, emi esinede ke ŋwed ndidem Israel.

35Ndien adaŋemi mme ŋkpɔ emi ema ekebe, Jehoshaphat edidem Judah adian idem ye Ahaziah edidem Israel, emi ɔdiɔkde eti-eti:

36onyuŋ adian idem ye enye ke erikɔŋ ubom eke ekpekade Tar-shish; ndien mmɔ ekɔŋ ubom oro ke Ezion-geber.

37Ndien Eliezer eyen Dodavahu emi otode ke Mareshah, etiŋ prophecy abaŋa Jehoshaphat, ete, Koro afo adiande idem ye Ahaziah, Jehovah omobuŋ se afo akanamde. Ndien mme ubom oro ewure, ndien mmɔ ikemeke aba ndika ke Tarshish.