JEREMIAH 5 - Efik Old Bible With Sectional Headings

Jerusalem ye Judah Enam Ukwaŋ Ido

1MBUFO ekanare mme efak Jerusalem, enyuŋ ese, enyuŋ efiɔk, enyuŋ eyom ke mme aŋwa esie, Mbufo ema ekut owo, owo eke anamde edinen ido, onyuŋ oyomde akpanikɔ, ama odu, ndien nyedahado nnɔ enye.

2Ndien okposuk edi nte mmɔ edɔhɔde ete, Ma uwem Jehovah; mmɔ itreke nditomo nsin ke nsu.

3O Jehovah, nte enyin fo isehe akpanikɔ? Afo ɔkɔtɔ mmɔ, edi mmɔ ikopke ubiak; afo okosobo mmɔ, mmɔ inyimeke ndikop item: esɔŋɔ iso mmɔ ekan itiat; inyimeke ndifiak ndi.

4Ndien ami ndɔhɔ, nte, Ŋkɔm mme mmɔ emi edi mbukpo owo ke akpanikɔ; mmɔ edi ndsime: koro mmɔ mifiɔkke usuŋ Jehovah, ikpe Abasi mmɔ.

5Yak mbine ikpɔ owo, nnyuŋ ndɔhɔ ye mmɔ; koro mmɔ efiɔkde usuŋ Jehovah, ikpe Abasi mmɔ. Edi mmɔ emebuŋ ɔkpɔnɔ ubɔk kiet, ekibi ubɔp-ŋkpɔ.

6Mmɔdo lion eyeto ke akai owot mmɔ, wolf mbubreyo eyesobo mmɔ: ekpe eyekpeme obio mmɔ: eyeta kpukpru owo eke ewɔŋɔde ke esit: koro mme idiɔk ido mmɔ ewakde, mfiakedem mmɔ onyuŋ ɔdɔdiɔŋ ɔsɔŋ.

7Ndinam didie ndahado ke ŋkpɔ emi nnɔ fi? Nditɔ fo emekpɔŋ mi, enyuŋ etomo se midige Abasi: ndien ami nyak mmɔ etomo: ndien mmɔ esin efibe, enyuŋ eyire udim ekesop idem ke ufɔk mme akpara.

8Mmɔ edi horse eke eyuhɔde udia eke ebakde edemere: kpukpru mmɔ kiet kiet esioro uyo nte horse, eyom ŋwan mbɔhiduŋ mmɔ.

9Jehovah ɔdɔhɔ, ete, Nte ndinɔŋɔ ufen mbaŋa ŋkpɔ emi? Nte ukpɔŋ mi idinyuŋ isioho usiene ye oruk idut emi?

10Mbufo edɔk ke ibibene esie ekewuri; edi ekunam ema: ekibi enye nnyɔninyɔ efep: koro mmɔ minyeneke Jehovah.

11Koro ufɔk Israel ye ufɔk Judah emenam abiaŋa ye ami eti-eti: uyo Jehovah edi emi.

12Mmɔ emekaŋ Jehovah, enyuŋ edɔhɔ, ete; “Enye iduhe du; idiɔk-ŋkpɔ idinyuŋ isimke nnyin; nnyin idinyuŋ ikwe ofut ye akaŋ.

13Ndien mme prophet eyekabare edi ofum; ikɔ inyuŋ iduhe mmɔ ke idem: ntem ke edinam ye mmɔ.”

14Mmɔdo ntem ke Jehovah Abasi mme udim ɔdɔhɔ, ete, Koro mbufo edɔhɔde ikɔ emi, sese, ami mmɔŋ nnam ikɔ mi ke inua fo akabare edi ikaŋ, nnyuŋ nnim mbio emi ke ifia, ndien enye eyeta mmɔ.

15Jehovah ɔdɔhɔ ete, Sese, ami mmɔŋ nda idut ke anyan ebiet ndi ntiene mbufo, O ufɔk Israel: idut oro edi ɔkpɔsɔŋ, idut oro oto ke eyo oko, afo udufiɔkke usem idut oro, udunyuŋ ukopke se mmɔ edidɔhɔde.

16Odibe-idaŋ mmɔ ebiet anaiŋwaŋ udi, kpukpru mmɔ edi mbon uko.

17Ndien mmɔ eyeta ibokpot fo ye uyo fo, eyeta nditɔ-iren fo ye nditɔ-iban fo: eyeta ŋkpri ufene fo ye enaŋ fo: eyeta vine fo ye fig fo: eyeda ofut ewuri obio ibibene fo emi afo ɔbuɔtde idem fo ke esit.

18Jehovah onyuŋ ɔdɔhɔ ete, Ke idem mme usen oro ndinamke mbufo mma.

19Ndien ama ekem ke mbufo edidɔhɔde ete, Jehovah Abasi nnyin edinam nnyin kpukpru ŋkpɔ emi abaŋa nso? Dɔhɔ mmɔ ndien, ete, Kpa nte mbufo ekpɔŋde mi, enyuŋ enamde ŋkpɔ isen abasi ke isɔŋ mbufo, kpasuk ntre ke mbufo edinam ŋkpɔ isen owo ke isɔŋ eke midige eke mbufo.

20Mbufo etiŋ emi ke ufɔk Jacob, enyuŋ ekwɔrɔ enye ke Judah, ete,

21Mbufo, ndisime ye mbio unana-ibuot, ekop ikɔ emi; mmɔ enyene enyin, ndien ikwe; mmɔ enyene utɔŋ, ndien ikopke: Jehovah ɔdɔhɔ, ete,

22Nte mbufo idibakke mi? Nte mbufo idinyekke ke iso mi, emi ŋkenimde ntan ke adaŋa inyaŋ ke nsinsi ewuhɔ, ndien inyaŋ idibehe enye; ndien odut esie okpot, edi ikanke; oyomo uyom, edi ikaŋake enye.

23Ndien mbio emi enyene esit emiom ye eke nsɔŋibuot, mmɔ emekabare enyuŋ edaŋa.

24Mmɔ inyuŋ idɔhɔke ke esit mmɔ, ite, Mbɔk, eyak nnyin ibak Jehovah Abasi nnyin emi ɔnɔde edim, kpa mbemiso ye ukperedem edim ke ekem ini mmɔ: enye onim mme urua ukpeŋe eke ekedoride, ɔnɔ nnyin.

25Mme idiɔk ido mbufo emekabare ŋkpɔ emi efep, mme ukwaŋkpɔ mbufo inyuŋ iyakke mbufo ekut eti ŋkpɔ emi.

26Koro mmɔ ekutde mme idiɔk owo ke otu ikɔt mi: owo odibe nte ata-ikɔt ɔnuhɔde; mmɔ ekɔk afia, emum owo.

27Kpa nte inuen ɔyɔhɔde ke ɔbɔkpɔ, kpasuk ntre ke abiaŋa ɔyɔhɔ ke ufɔk mmɔ: oro esin mmɔ ekponi, enyuŋ ekɔ inyene.

28Mmɔ ekpon ubom, esem; enyuŋ ekan kpa ido mme idiɔk owo: mmɔ ibiereke ikɔ, kpa ikɔ eyen-akpa, ndien ekut unen: inyuŋ ikpehe ikpe mme ubuene.

29Jehovah ɔdɔhɔ ete, Nte ndinɔŋɔ ufen mbaŋa ŋkpɔ emi? Nte ukpɔŋ mi idisioho usiene ye oruk idut emi?

30Ŋkpɔ ndyɔ ye mkpaidem omosu ke isɔŋ;

31mme prophet etiŋ prophecy nsunsu, mme oku enyuŋ eda ubɔk mmɔ ekan obio; ikɔt mi enyuŋ ema ntre: ndien mbufo edinam didie ke ukperedem esie?