1EDIKEM ke usen oro Jonathan eyen Saul ɔdɔhɔ akparawa emi akamade ŋkpɔ-ekɔŋ esie, ete, Di, nnyin ibe ika ke ɔtɔ mbon-ekɔŋ mme Philistine emi edude ke edem oko. Edi itiŋke inɔ ete esie.
2Ndien Saul etie do ke utit Gibeah ke idak pomegranate emi odude ke Migron: ndien mmɔ eke edude ye enye esim owo ikie itiokiet;
3ye Ahijah eyen Ahitub, eyeneka Ichabod, eyen Phinehas, eyen Eli, oku Jehovah ke Shiloh, esine ephod. Ndien mmɔ ifiɔkke ite ke Jonathan aka
4Ndien akamba itiat ebiet edet odu ke edem kiet ke ufɔt ebiet emi Jonathan oyomde ndibe ŋka ke ɔtɔ mbon-ekɔŋ mme Philistine, akamba itiat ebiet edet onyuŋ odu ke edem eken: ndien enyiŋ kiet ekere Bozez, enyiŋ eken onyuŋ ekere Seneh.
5Edet kiet ebiet adaha ke edem edere asak iso ese Michmash, kiet eken onyuŋ odu ke edem usuk, asak iso ese Gibeah.
6Ndien Jonathan ɔdɔhɔ akparawa oro obiomde ŋkpɔ-ekɔŋ esie, ete, Di, yak nnyin ibe ika ke itie mbon-ekɔŋ mme edut emi: ndusuk Jehovah eyenam ŋkpɔ ɔnɔ nnyin: koro ŋkpɔ baba kiet mikpanke Jehovah ndida uwak mme esisit nnyaŋa.
7Ndien andibiom ŋkpɔ ekɔŋ esie ɔdɔhɔ enye, ete, Nam kpukpru se idude fi ke esit: wɔŋɔre; sese ami mi ye afo ke owo ŋkemesit fo.
8Ndien Jonathan ɔdɔhɔ ete, Sese, nnyin imɔŋ ibe ke ɔtɔ mme mbon oro, ndien nnyin iyewut mmɔ idem nnyin.
9Mmɔ ema edɔhɔ nnyin, ete, Mbufo etuak eda tutu nnyin idisim mbufo, ndien nnyin iyetuak ida ke itie nnyin, idinyuŋ idɔkke ke ɔtɔ mmɔ.
10Edi mmɔ ema edɔhɔ ete, Mbufo edɔk etiene nnyin, ndien nnyin iyedɔk, koro Jehovah adade mmɔ esin nnyin ke ubɔk: ndien emi edidi idiɔŋɔ nnyin.
11Ekem mmɔ mbiba ewut mbon-ekɔŋ mme Philistine idem mmɔ: ndien mme Philistine edɔhɔ ete, Sese, mme Hebrew ke ewɔŋɔ ke obube emi mmɔ edibede ke esit.
12Ndien mbon-ekɔŋ oro edɔhɔ Jonathan ye andibiom ŋkpɔ-ekɔŋ esie, ete, Mbufo edɔk etiene nnyin, ndien nnyin iyewut mbufo ŋkpɔ. Ndien Jonathan ɔdɔhɔ andibiom ŋkpɔ-ekɔŋ esie, ete, Tiene mi dɔk, koro Jehovah adade mmɔ esin Israel ke ubɔk.
13Ndien Jonathan ada ubɔk esie ye ukot esie ɔdɔk, andibiom ŋkpɔ-ekɔŋ esie onyuŋ etiene enye ke edem: ndien mmɔ oro eduɔŋɔ ke iso Jonathan; andibiom ŋkpɔ-ekɔŋ esie onyuŋ etiene enye owot.
14Ndien mmɔ oro Jonathan ye andibiom ŋkpɔ-ekɔŋ esie ekebemde iso ewot, esim owo edip, ke ibio ubak isɔŋ nte enaŋ iba ekemede ndifuŋ.
15Ndien nna-ekɔŋ, ye isɔŋ, ye kpukpru owo enyek, mbon-ukpeme ye mbon-uŋwo enyuŋ enyek ŋko, isɔŋ onyuŋ enyek: ndien akabare edi ata akwa nnyekisɔŋ.
16Ndien mbon-ukpeme Saul ke Gibeah Benjamin ese; ndien, sese, otu owo oro ke esuana, enyuŋ edediɔŋ esuana eka iso.
17Ndien Saul ɔdɔhɔ mmɔ emi edude ye enye, ete, Mbufo ebat ndien ese mme anie ɔwɔrɔ ke otu nnyin. Ndien ke adaŋemi mmɔ ekebatde, sese, Jonathan ye andibiom ŋkpɔ-ekɔŋ esie iduhe.
18Ndien Saul ɔdɔhɔ Ahijah, ete, Da ekebe Abasi di: koro ekebe Abasi odude ye nditɔ Israel ke ini oro.
19Edikem ke ini Saul osuk ɔdɔhɔde ye oku, mkpo oro odude ke nna-ekɔŋ mme Philistine ɔdɔdiɔŋ ɔdɔk aka iso. Ndien Saul ɔdɔhɔ oku, ete, Sio ubɔk fo.
20Ndien Saul owuk kpukpru owo oro edude ye enye: ndien mmɔ eka ekeduk ke ekɔŋ: ndien, sese, ofut kpukpru owo ke ekpeŋe ekemɔ owo, nsobo onyuŋ okpon eti-eti.
21Ndien idem mme Hebrew emi ekedude ye mme Philistine ke mbemiso, enyuŋ etode ke edem kpukpru etiene mmɔ edɔk ke nna-ekɔŋ, kpa mmɔ ŋko enyuŋ edian idem ye Israel oro edude ye Saul ye Jonathan.
22Ndien adaŋemi kpukpru nditɔ Israel eke edibede ke obot Ephraim, ekopde ete ke mme Philistine efeŋe, mmɔ enyuŋ ebine mmɔ ke ekɔŋ.
23Ntre ke Jehovah anyaŋa Israel ke usen oro: ekɔŋ onyuŋ ebe osim ke Beth-aven.
24Ndien nditɔ Israel ekpa mba ke usen oro: koro Saul ama okowuk kpukpru owo, ete, Idifɔnke fɔn inɔ owo eke editade uyo tutu osim mbubreyo, man nsio usiene ye mme asua mi.
25Ndien baba owo kiet itabike uyo. Ekem kpukpru owo eduk ke akai; aran-ɔkwɔk onyuŋ ana ke iso isɔŋ.
26Ndien ke ini kpukpru owo edukde ke akai oro, sese, aran-ɔkwɔk ke asaŋa; edi baba owo kiet ifupke ubɔk esie ke inua: koro kpukpru owo efehede ewuhɔ oro.
27Edi Jonathan ikopke ke ini oro ete esie okowukde kpukpru owo; ndien enye anyan iso esaŋ oro odude enye ke ubɔk, edebi ke aran-ɔkwɔk, ndien adian ubɔk esie ke inua; ndien enyin eŋwaŋa enye.
28Ndien owo kiet ke otu mbon oro ɔbɔrɔ ete, Usɔ ɔsɔŋ owuk kpukpru owo, ete, Okufɔfɔn ɔnɔ owo eke editade uyo mfin emi.
29Ndien kpukpru owo ekpa mba. Ndien Jonathan ɔdɔhɔ ete, Ete mi odutuhɔ kpukpru owo: se, mbɔk, nte enyin aŋwaŋade mi, koro ntabide aran-ɔkwɔk emi esisit.
30Ŋwaŋwa ediso ke kpukpru owo ekpediade mbume mme asua mmɔ eke mmɔ ekekutde mfin emi; ŋkɔm ekpewot ndien ata ediwak owo ke otu mme Philistine.
31Ntre ke mmɔ esuan mme Philistine ke usen oro, ɔtɔŋɔde ke Michmash tutu osim ke Aijalon: ndien kpukpru owo ekpa mba eti-eti.
32Ndien kpukpru owo ebumere ebine mbume, enyuŋ emum ŋkpri ufene, ye enaŋ, ye nditɔ enaŋ, ewot mmɔ ke isoŋ, mbio oro enyuŋ eta mmɔ ye iyip.
33Ndien etiŋ enɔ Saul, ete, Sese, mbon emi ke ededue Jehovah, koro mmɔ etade unam ye iyip. Ndien enye ete, Mbufo ke enam idiɔk-ŋkpɔ: mbufo ekpat akamba itiat esɔk mi ke emi.
34Ndien Saul ɔdɔhɔ ete, Mbufo esuana eduk ke otu kpukpru owo, enyuŋ edɔhɔ mmɔ, ete, Kpukpru owo eda enaŋ mmɔ, ye erɔŋ mmɔ esɔk mi, enyuŋ ewot mmɔ mi eta; ekunyuŋ edue Jehovah ke erita unam ye iyip. Ndien kpukpru owo ekama enaŋ mmɔ ke ubɔk edi ke okoneyo oro,
35enyuŋ ewot mmɔ do. Ndien Saul anam itie-uwa ɔnɔ Jehovah: oro edi akpa itie-uwa eke enye ɔtɔŋɔde ndinam nnɔ Jehovah.
36Ndien Saul ɔdɔhɔ ete, Yak nnyin isuhɔre ibine mme Philistine ke okoneyo emi, inyuŋ ibume mmɔ tutu eyo esiere, ikunyuŋ iyak baba owo mmɔ kiet ɔbɔhɔ. Ndien mmɔ ebɔrɔ ete, Nam kpukpru se afo amade. Edi oku ɔdɔhɔ ete, Yak nnyin itiene Abasi mi.
37Ndien Saul obup Abasi, ete, Nte nsuhɔre mbine mme Philistine? Nte afo edida mmɔ esin ke ubɔk Israel? Edi enye ibɔrɔke enye ke ini oro.
38Ndien Saul ɔdɔhɔ ete, Mbufo kpukpru ikpɔ owo esaŋa ekpere mi: enyuŋ edomo ese ɔtɔ nte idiɔk-ŋkpɔ emi odude mfin.
39Koro, ma uwem Jehovah emi anyaŋade Israel, ama odu ye Jonathan eyen mi, enye iditreke ndikpa. Edi baba ofuri owo mmɔ kiet ibɔrɔke enye.
40Ndien enye ɔdɔhɔ ofuri Israel, ete, Mbufo eda edem kiet, ndien ami ye Jonathan eyen mi iyeda ke edem eken. Ndien kpukpru owo edɔhɔ Saul, ete, Nam nte afo amade.
41Ndien Saul ɔdɔhɔ Jehovah, ete, O Abasi Israel, wut edem eke miduehe. Ndien eda Saul ye Jonathan: ndien mmɔ eken ebɔhɔ.
42Ndien Saul ɔdɔhɔ ete, Mbufo edomo mi ye Jonathan eyen mi ndomo. Ndien eda Jonathan.
43Ndien Saul ɔdɔhɔ Jonathan, ete, Sian mi se afo akanamde. Ndien Jonathan asian enye, ete, Ŋkada iso eto emi odude mi ke ubɔk ntabi aran-ɔkwɔk esisit. Sese, ami mmɔŋ ŋkpa.
44Ndien Saul ɔdɔhɔ ete, Abasi osuk anam ntre, onyuŋ ɔdɔdiɔŋ anam ntre: afo udutreke ndikpa, Jonathan. Ndien kpukpru owo edɔhɔ Saul, ete,
45Nte ɔfɔn Jonathan ndikpa, emi akanamde akamba erinyaŋa emi ke Israel? Nsa nnyin! ma uwem Jehovah, baba idet kiet iditoho enye ke ibuot iduɔ ke isɔŋ; koro enye amanam ye Abasi mfin emi. Ndien mmɔ enyaŋa Jonathan, iyakke enye akpa.
46Ndien Saul ɔdɔk, etre ndibine mme Philistine Mme Philistine enyuŋ enyɔŋɔ ke ebiet mmɔ.
47Ke ntem ke Saul akada ubɔŋ ke Israel, onyuŋ ŋwana ekɔŋ ye kpukpru mme asua esie emi ekande enye ekuk, ye Moab, ye nditɔ Ammon, ye Edom, ye ndidem Zobah, ye mme Philistine: onyuŋ akan ke kpukpru ebiet eke enye akakabarede.
48Enye onyuŋ anam uko, aka akasuan Amalek; onyuŋ anyaŋa Israel osio ke ubɔk mmɔ eke ebumede mmɔ.
49Ndien nditɔ-iren Saul edi Jonathan, ye Ishvi, ye Malchi-shua; enyiŋ nditɔ esie iban iba enyuŋ ekere Merab, adiaha, ye Michal, uduŋwan:
50enyiŋ aŋwan Saul onyuŋ ekere Ahinoam, eyen Ahimaaz aŋwan: enyiŋ etubom mbon-ekɔŋ esie ekere Abner eyen Ner, eyenete ete Saul.
51Kish ekedi ete Saul, ndien Ner emi ekedide ete Abner ekedi eyen Abiel.
52Ndien ekɔŋ ɔsɔŋ ubɔk ye mme philistine ke ofuri eyo Saul. Ndien adaŋemi Saul okutde owo uko, ye ɔsɔŋ-idem owo ekededi, enye ada owo oro adian idem.
Who We AreWhat We EelieveWhat We Do
2025 by iamachristian.org,Inc All rights reserved.
