EZEKIEL 26 - Efik Old Bible With Sectional Headings

Etiŋ Prophecy Ebaŋa Tyre

1EDIKEM ke ɔyɔhɔ isua duop-ekiet, ke akpa usen ɔfiɔŋ, uyo Jehovah osim mi, ete,

2Eyen owo, koro Tyre ɔdɔhɔde abaŋa Jerusalem, ete, Aha! enyin-usuŋ mme idut ɔmɔbuŋɔ enye amakabare etiene mi: ami nyeyuhɔ, enye omosobo.

3Mmɔdo ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo, Tyre, nnyuŋ nda ediwak mme idut ndɔk ntiene fi, kpa nte akamba mmɔŋ otopde odut esie ɔdɔk.

4Ndien mmɔ eyebiat ibibene Tyre, enyuŋ ewuri mme tower esie: ndien nyekpɔri enye ntan esie mfep, nnyuŋ nnim enye ke edisat itiat.

5Enye eyekabare edi ebiet eke ebride iyire ke ufɔt mmɔŋ: koro edi ami ndɔhɔ; ndien enye eyekabare edi mbume mme idut.

6Uyo Ɔbɔŋ Jehovah edi emi. Eyenyuŋ eda ofut ewot nditɔ esie iban eke edude ke obot iŋwaŋ; ndien mmɔ eyefiɔk ete ke ami ndi Jehovah.

7Koro ntem ke Ɔbɔŋ Jehovah ɔdɔhɔ, ete, Sese, ami mmɔŋ nda Nebuchadrezzar edidem Babylon, edidem ndidem, ke edere, ye horse ye chariot, ye mbon horse, ye akwa udim owo, ntiene Tyre.

8Enye eyeda ofut owot nditɔ-iban fo ke obot-iŋwaŋ: eyenyuŋ ɔdiɔk tower ekɔŋ ke ɔtɔ fo, onyuŋ okubi ibombom adian fi onyuŋ emenere otu-ekɔŋ aŋwana ye afo.

9Enye eyenyuŋ ɔdiɔk uwuri-ŋkpɔ esie ke ɔtɔ ibibene fo, onyuŋ owuri mme tower fo ke ofut esie.

10Uwak mme horse esie eyenam ntɔŋ mmɔ ofuk fi: uyom mme horse ye eke wheel ye chariot eyenyeŋe ibibene fo, ke ini enye edidukde ke inua-otop fo, kpa nte mmɔ eke edukde ke obio eke ɔbuŋɔde.

11Enye eyeda ikpat mme horse esie edigi kpukpru efak fo: eyewot mbio-obio fo ke ofut, onyuŋ ɔduɔk mkpɔsɔŋ adaha fo ke isɔŋ.

12Ndien mmɔ eyebume inyene fo, enyuŋ eda ŋkpɔ-urua fo ke ŋwo: enyuŋ ewuri ibibene fo, ye ntan fo esin ke ufɔt inyaŋ.

13Ndien nyenam uyom ikwɔ fo odop; idinyuŋ ikopke aba uyom mme harp fo.

14Ndien nyenam fi akabare edi edisat itiat: afo eyedi ebiet eke ebride iyire ke esit; ndien idibɔpke aba fi: koro ami Jehovah ndɔhɔ: emi edi uyo Ɔbɔŋ Jehovah.

15Ntem ke Ɔbɔŋ Jehovah ɔdɔhɔ Tyre, ete, Nte uyom iduɔ fo, ye mkpo mmɔ eke ekpaŋade afai, ye ediwak owo emi ewotde ke ufɔt fo idinamke mme isuo enyeŋe?

16Ndien kpukpru mbɔŋ inyaŋ eyeto ke ebekpo mmɔ esuhɔre, enyuŋ enim ekura mmɔ, enyuŋ esioŋo ŋwet-ŋwet ɔfɔŋidem mmɔ efep: enyuŋ eda ndik esine ke idem; mmɔ eyesuhɔre etie ke isɔŋ, enyuŋ enyek idem kpukpru ini, enyuŋ enyene ndyɔ ebaŋa fi.

17Ndien mmɔ eyemenere ikwɔ eseme ebaŋa fi, enyuŋ edɔhɔ fi, ete, Afo andiduŋ ke inyaŋ, anam didie osobo, obio emi etorode, emi ɔsɔŋɔde ada ke inyaŋ, enye ye mme andiduŋ enye, emi ekedade uteŋe mmɔ edori kpukpru mme andiduŋ enye ke idem!

18Ke emi usen iduɔ fo esin mme isuo enyek idem; unyɔŋ fo eyenyuŋ esin mme isuo emi edude ke inyaŋ eyomo nsia.

19Koro ntem ke Ɔbɔŋ Jehovah ɔdɔhɔ ete, Ke ini eke nnimde fi ke obio eke abiarade, ebiet obio eke owo miduŋke ke esit; ke ndinamde inyaŋ ɔdɔk osim fi, ikpɔ mmɔŋ edinyuŋ efukde fi;

20ke ndidade fi nsuhɔre ye mmɔ eke esuhɔrede ke obube, ke ɔtɔ mbon eset, nyenyuŋ nnam fi oduŋ ke ata idak isɔŋ ke ebiet oro ekebiarade tutu ko; ye mmɔ eke esuhɔre ke obube, man owo okuduŋ fi ke esit; man ŋkunim fi ke ubɔŋ ke isɔŋ mme odu-uwem.

21Nyenam fi akabare edi ikpikpu, ndien afo ududuhe aba: ndien mmɔ eyeyom fi, ndien idikwe aba ke nsinsi: Ɔbɔŋ Jehovah ɔdɔhɔ.