2 CHRONICLES 4 - Efik Old Bible With Sectional Headings

Mme Ŋkpɔ Emi Edade Ebana Temple

1NDIEN enye ada okpoho anam itie-uwa; uniɔŋ esie edi ibio-idomo-okuk edip, ubom esie edi ibio-idomo-okuk edip, ye idaha esie ibio-idomo-okuk duop.

2Enye onyuŋ atara okpoho aŋwana anam mkpɔdiɔhɔ-mmɔŋ (emi edide) ibio-idomo-okuk duop ɔtɔŋɔde ke mben eken osim mben eken, ekara-ekara akanare okuk, idaha esie onyuŋ edi ibio-idomo-okuk ition; uruk ibio-idomo-okuk edip ye duop, onyuŋ odomo enye akan okuk.

3Ndien mbiet enaŋ edu enye ke idak ofuri mben esie ekanare enye ekuk, duop ke ibio-idomo-okuk, duop ke ibio-idomo-okuk, ekanare mkpɔdiɔhɔ-mmɔŋ ekuk. Ekenam udim enaŋ iba oro ke adaŋemi etarade enye.

4Enye ɔdiɔhɔ enaŋ duopeba ke edem, enaŋ ita enyuŋ ese usiaha-utin; ndien mkpɔdiɔhɔ-mmɔŋ oro ɔdiɔhɔ mmɔ ke edem isim mmɔ kpukpru enyuŋ esine ke esit-esit.

5Ndien udobi esie etie nte ibiɔŋ ekaubɔk, mben esie onyuŋ amia mfri lily, kpa nte usɔ mben cup; enye ekeme ndikama tɔsin bath ita ke idomo.

6Enye onyuŋ anam akpaŋkpaŋ duop, ndien ɔdiɔk ition ke nnasia, ye ition ke ufien, man eyet ŋkpɔ ke esit: mmɔ eda se ewade ke edifɔp uwa eyet ke esit: mkpɔ-diɔhɔ-mmɔŋ oro onyuŋ edi se mme oku eyerede ke esit.

7Enye onyuŋ anam udiɔhɔ-utuenikaŋ ke gold nte oruk mmɔ edide, ndien ɔdiɔk mmɔ ke temple, ition ke nnasia, ye ition ke ufien. Onyuŋ ada gold anam bowl ikie.

8Enye onyuŋ anam okpokoro duop ada ɔdiɔk ke temple, ition ke nnasia, ition ke ufien. Enye onyuŋ anam bowl gold ikie.

9Enye onyuŋ anam okure mme oku, ye akamba okure, ye mme itim okure, onyuŋ ada okpoho ofuk itim mmɔ.

10Ndien enye ada mkpɔdiɔhɔ-mmɔŋ oro ɔdiɔk ke ŋkaŋ nnasia, ke edem usiaha-utin ese usuk.

11Huram onyuŋ anam mme eso, ye mme uwobi-ntɔŋ, ye mme bowl. Ekem Huram anam usɔ eke enye anamde ɔnɔ edidem Solomon ke ufɔk Abasi ama: mme adaha mbiba, ye bowl,

12ye mbuot emi edorode ke enyɔŋ mme adaha mbiba, ye mme iyire iba, emi efukde bowl mbuot iba, emi edorode ke enyɔŋ mme adaha oro:

13ye mme pomegranate ikie inaŋ ke mme iyire mbiba; ndien pomegranate iba ke iyire kiet, emi ofukde mme bowl mbuot iba, emi edorode ke enyɔŋ mme adaha.

14Enye onyuŋ anam mme udiɔhɔ-akpaŋkpaŋ, onyuŋ ada mme akpaŋkpaŋ odori ke mme udiɔhɔ oro:

15mkpɔdiɔhɔ-mmɔŋ kiet, ye mme enaŋ duopeba ke idak esie.

16Ndien Huram ete esie ada edisak okpoho anam mme eso, ye mme uwobi-ntɔŋ, ye mme fork, ye kpukpru ŋkpɔ utom mmɔ, ɔnɔ edidem Solomon ke eke ufɔk Jehovah.

17Edidem anam mmɔ ke eritara ŋŋwaŋa ke itihere Jordan ke isɔŋ mbat-eso ke ufɔt Succoth ye Zeredah.

18Ntem ke Solomon anam ata ediwak mkpoduoho emi: koro mmɔ mikwe nte efiɔkde udobi okpoho oro.

19Ntem ke Solomon anam kpukpru ŋkpɔ eke edude ke ufɔk Abasi, ye itie-uwa o-gold, ye mme okpokoro udiɔk uyo iso; ye mme uwuk-utuenikaŋ,

20ye mme utuenikaŋ mmɔ, ke oruk mmɔ, man esak ke iso ubet-etak, ke edisana gold:

21enye onyuŋ ada gold anam mme flower, ye mme utuenikaŋ, ye mme ufat-ikaŋ, oro edi ata edisana gold;

22ye mme udiɔŋ-utuenikaŋ, ye mme bowl, ye mme ikpaŋ-idaŋ, ye mme censer ata eti gold: ye enyin-usuŋ ufɔk, ye itim esit-esit, eke ata edisana ubet, ye itim ubet temple, ke gold.