JEREMIAH 10 - Efik Old Bible With Sectional Headings

Ukpono Mme Esen Abasi Ada Ŋwure Ɔsɔk Israel

1O UFƆK Israel, mbufo ekop ikɔ emi Jehovah ɔdɔhɔde mbufo:

2ntem ke Jehovah ɔdɔhɔ, ete, Mbufo ekukpep usuŋ mme idut, ekunyuŋ eyomo nsia ebaŋa mme idiɔŋɔ ikpa-enyɔŋ: koro nsia oyomode mme idut ebaŋa mmɔ.

3Koro mme ewuhɔ mme idut edide oburobut: koro edide eto, owo ekpi enye osio ke akai, utom ubɔk owo usɔ ye ekuri.

4Mmɔ ebana enye ke silver ye gold; eda okpukwak ye hammer enam enye ɔsɔŋ, ndien enye isehekede.

5Mmɔ edi ofuri-ofuri nte eyop, ndien mmɔ idɔhɔke ikɔ: enyene ndibiom mmɔ, koro mmɔ misaŋake. Mbufo ekubak mmɔ; koro mmɔ mikemeke ndinam idiɔk, inyuŋ idige nte mmɔ enamde eti ŋkpɔ.

6Baba ŋkpɔ kiet ibietke fi, O Jehovah; afo omokpon, enyiŋ fo omonyuŋ okpon ke odudu.

7Anie midibakke fi, O Edidem mme idut? Koro odotde fi: koro baba kiet eke ebietde fi miduhe ke otu kpukpru mme ɔfiɔkŋkpɔ owo mme idut, ye ke kpukpru mme obio mmɔ.

8Ndien mmɔ etie nte unam, enyuŋ edi ndisime ɔtɔ kiet: ikpikpu item! ke edi eto!

9Eda silver eke edomde efere ke Tarshish edi, eda gold ke Uphaz, utom owo usɔ, ye eke ubɔk anditara, edi: edisine-ŋkpɔ mmɔ awawa ye purple: kpukpru mmɔ edi se mme ɔfiɔkŋkpɔ owo enamde.

10Edi Jehovah edi Abasi akpanikɔ, Abasi uwem, ye nsinsi Edidem: iyaresit esie enyeŋe ererimbot, mme idut inyuŋ ikemeke ndida ifuresit esie.

11Ntem ke mbufo edidɔhɔ mmɔ, ete, Eyesobo mme abasi oro mikenamke enyɔŋ ye isɔŋ, efep ke isɔŋ ye ke idak ikpa-enyɔŋ emi.

12Enye akanam isɔŋ ke odudu esie, ada ifiɔk esie owuk ererimbot ke itie esie, onyuŋ eneŋere ikpa-enyɔŋ ke asian esie.

13Uyo esie ke ini enye osiorode enye anam ediwak mmɔŋ odu ke ikpa-enyɔŋ, enye anam mbubit enyɔŋ oto ke utit isɔŋ ɔdɔk, anam obuma ɔnɔ edim, onyuŋ osio ofum ke ebiet unim-ŋkpɔ esie.

14Kpukpru owo eke minyeneke ifiɔk emi ebiet unam: but anam kpukpru anditara abaŋa mbiet mmɔ: koro nditara mbiet mmɔ edide nsu, ibifik minyuŋ iduhe mmɔ ke esit.

15Mmɔ edi ikpikpu, ŋkpɔ nsahi, eyetak ke ini ufen mmɔ. Udeme Jacob ibietke mmɔ emi ŋkpɔ:

16koro enye edide andibot kpukpru ŋkpɔ; Israel onyuŋ edi eto udeme esie: Jehovah mme udim edi enyiŋ esie.

17Taŋ mme ekuo fo ke isɔŋ,

18O andiduŋ ɔkpɔsɔŋ ebiet. Koro ntem ke Jehovah ɔdɔhɔ, ete, Sese, ami nyesin mme andiduŋ isɔŋ ke ŋkpɔ-utop ntop mmɔ ke ini emi, nnyuŋ ntuhɔ mmɔ, man mmɔ ekut.

19Ɔdɔdiɔk ye ami abaŋa unan mi! ufen abiak mi: edi ami ŋkɔdɔhɔ, nte, Emi edi ubiak ke akpan, ndien mmenyene ndiyɔ enye.

20Tent mi amabiara, kpukpru uruk mi emenyuŋ ekibe; nditɔ mi emewɔŋɔ ekpɔŋ mi, ndien mmɔ iduhe: baba owo kiet eke eneŋerede tent, onyuŋ ɔkɔŋde mme ikpehe mi, inyuŋ iduhe aba.

21Koro mme ekpemerɔŋ emekabare ebiet unam, minyuŋ ibineke Jehovah: oro esin mmɔ ikwe unen, ofuri ufene mmɔ enyuŋ esuana.

22Uyo etop! sese, ke edi. Akamba mkpo onyuŋ oto ke idut edere edi, ndinim mme obio Judah ke ŋkpɔ nditaha, ye ke iduŋ mme jackal.

23O Jehovah, mmɔfiɔk nte ke usuŋ owo iduhe owo ke ubɔk: owo eke asaŋade inyuŋ ikemeke ndineŋere ikpat esiemɔ.

24O Jehovah, tunɔ mi, edi nam ke ufat; mbak afo edinam mi ndi ekpri ke iyaresit fo.

25Ŋwaŋa iyaresit fo ke idem mme idut eke mifiɔkke fi, ye ke mme ufɔk eke mikotke fi enyiŋ: koro emedia Jacob, mmɔ esuk eta enye, enyuŋ etak enye, enyuŋ esobo iduŋ esie.