1NDIEN Jehovah etie ke oyobio ɔbɔrɔ Job, ete,
2Anie owo edi emi anamde uduak (mi) okim ke ikɔ eke ifiɔk miduhe?
3Bɔbɔ ndien mbɔhɔ ke isin fo nte eren-owo, ndien nyebup fi: ndien sian mi.
4Afo okodu mmɔŋ ke ini ntɔŋɔde ndinam ererimbot? Tiŋ, edieke afo ɔfiɔkde mbufiɔk.
5Anie okonim idomo esie, koro afo ɔfiɔkde? anie okonyuŋ eneŋere uruk-udomo ke esit?
6Ukot ibibene esie owuhɔ ke nso? Anie okonyuŋ onim itiat inuk esie?
7Ke ini mme ntantafiɔŋ usen-ubɔk ekwɔde uyo kiet, kpukpru nditɔ Abasi enyuŋ esiode mkpo.
8Anie akada itim abaha akwa mmɔŋ, adaŋemi enye obumerede ɔwɔrɔ ke idibi?
9Ke ini ŋkonimde obubit enyɔŋ ke edisine-ŋkpɔ esie, nnyuŋ nnimde ɔkpɔsɔŋ ekim ke ɔfɔŋ ubɔp-idem esie.
10Nnyuŋ nnim adaŋa mi nnɔ enye, nnyuŋ nsin eto-usin-usuŋ ye itim;
11Nnyuŋ ndɔhɔ nte, Mi ke afo edisim, edi ubehe do: ndien mi ke edinyuŋ enim adaŋa enɔ iseri odut fo?
12Nte afo okowuk usenubɔk toto nte afo akamamana; okonyuŋ owuk usiere itie esie?
13Man enye omum mme utit ererimbot, man enyuŋ ekeŋ mme idiɔk owo ke esit efep?
14Enye akabare nte mbat ufik-ŋkpɔ, onyuŋ ada nte ɔfɔŋ-idem.
15Enyuŋ esin mme idiɔk owo uŋwana mmɔ, enyuŋ ebuŋ edimenere ubɔk.
16Nte afo ama oduk ke iso idim akwa mmɔŋ: mme asaŋa ke udem inyaŋ ibom?
17Nte emeberede enyin-usuŋ mkpa enɔ fi? Nte onyuŋ okut inua-otop mfut mkpa?
18Nte otim okut ubom ererimbot? Edieke afo ɔfiɔkde enye kpukpru, tiŋ.
19Enye usuŋ emi uŋwana oduŋde? Ekim ŋko-enye ɔtɔ esie,
20Koro afo adade enye aka ke adaŋa esie, koro afo onyuŋ otimde ɔfiɔk usuŋ ufɔk esie?
21Afo ɔmɔfiɔk, koro akamanade ke ini oro: ibat usen fo omonyuŋ awak.
22Nte afo ama oduk ke ebiet unim snow? Ama onyuŋ okut ebiet-unim edim-itiat,
23Emi nnimde mbet ini ufen, mbet usen eŋwan ye ekɔŋ?
24Ewe edi usuŋ nte ebaharede uŋwana, nte ofum ikɔrabak asuanade ke iso ererimbot?
25Anie akasiak udiɔŋ mmɔŋ ɔnɔ ukwɔ? ye usuŋ obuma, ye uyom enyɔŋ?
26Onyuŋ esin edim edep ke isɔŋ, eke owo miduhe; ke wilderness eke owo miduhe ke esit;
27Anam ikpikpu ye edibiara isɔŋ ɔyuhɔ; onyuŋ anam ebiet eke mbiet ɔkɔride afiari?
28Nte edim enyene ete? Anie ŋko obon ntɔi mbara?
29Ice oto ke idibi anie? Anie onyuŋ aman hoar frost enyɔŋ?
30Mmɔŋ odibe nte itiat, iso mmɔŋ onyuŋ ɔsɔsɔŋ.
31Nte afo emekeme nditebe Pleiades ke ubɔp-ŋkpɔ, nnyuŋ ntat uruk Orion?
32Nte emekeme ndida Mazzaroth ŋwɔrɔ ke edikem ini esie? nnyuŋ nteme Arcturus ye nditɔ esie usuŋ?
33Nte afo ɔmɔfiɔk mme ewuhɔ ikpa-enyɔŋ? Nte afo omonim ubɔŋ esie ke ererimbot?
34Nte emekeme ndimenere uyo fo ke enyɔŋ, man ata ediwak mmɔŋ ofuk fi?
35Nte emekeme ndidɔŋ obuma ɔwɔrɔ, man mmɔ eka, enyuŋ edɔhɔ fi, ete, Se nnyin mi?
36Anie esin ifiɔk ke ekput? Anie onyuŋ ada asian ɔnɔ esit?
37Anie ekeme ndibat mbubit enyɔŋ ke ifiɔk?
38Anie ekeme ndiŋwaŋa ikpa-mmɔŋ heaven? Ke ini ntan obohode edi mbat, ebok onyuŋ adiana ke ebok.
39Nte afo ebine unam ɔnɔ uman lion? onyuŋ osuk eyen biɔŋ ɔyuhɔ,
40Adaŋemi mmɔ enade ke obube mmɔ ena ke mfuhɔ ikɔt edibe?
41Anie otim udia ɔnɔ raven, adaŋemi nditɔ esie esemede enɔ Abasi? mmɔ ediyo koro udia miduhe.
Who We AreWhat We EelieveWhat We Do
2025 by iamachristian.org,Inc All rights reserved.
