DEUTERONOMY 27 - Efik Old Bible With Sectional Headings

Ewet Ibet ke Itiat Enyuŋ Enam Itie Uwa Itiat ke Obot Ebal

1NDIEN Moses ye mbiowo Israel ewuk kpukpru owo, ete, Mbufo enim kpukpru mme ewuhɔ emi ami ŋwukde mbufo mfin emi.

2Ndien ama ekem ke usen emi mbufo edibede Jordan eduk ke isɔŋ emi Jehovah Abasi fo ɔnɔde fi, wuk ikpɔ itiat ke idem fo, nyuŋ top mmɔ ndom:

3ndien wet kpukpru ikɔ mbet emi sin ke esit, ke afo ama ekebe, man afo oduk ke isɔŋ emi Jehovah Abasi fo ɔnɔde fi, kpa isɔŋ emi ɔfiɔrɔde mmɔŋ-eba ye aran-ɔkwɔk; kpa nte Jehovah mme usɔ ɔkɔdɔhɔde fi.

4Ndien ama ekem, ke mbufo ema ekebe Jordan, mbufo eda mme itiat emi ami ndɔhɔde mbufo mfin emi ewuk ke obot Ebal, afo nyuŋ top mmɔ ndom.

5Nyuŋ nam itie-uwa do nɔ Jehovah Abasi fo, itie-uwa itiat: kumenere ŋkpɔ ukwak udiɔŋ mmɔ.

6Da mfuri itiat nam itie-uwa Jehovah Abasi fo: nyuŋ wa edifɔp uwa nɔ Jehovah Abasi fo ke esit:

7nyuŋ wa uwa emem, nyuŋ dia ŋkpɔ do, nyuŋ dat esit ke iso Jehovah Abasi fo.

8Ndien tim wet kpukpru ikɔ mbet emi kap ke itiat oro.

9Ekem Moses ye mme oku, mme Levite, edɔhɔ ofuri Israel, ete, O Israel, dop, nyuŋ kop; mfin emi afo amakabare edi ikɔt Jehovah Abasi fo.

10Kop ndien uyo Jehovah Abasi fo, nyuŋ nim mbet esie ye mme ewuhɔ esie emi ami ŋwukde fi mfin emi.

11Ndien Moses eteme kpukpru owo ke usen oro, ete,

12Mme mmɔ emi edida ke obot Gerizim, ndidiɔŋ kpukpru owo, ke mbufo ema ekebe Jordan; Simeon, ye Levi, ye Judah, ye Issachar, ye Joseph, ye Benjamin:

13ndien mme mmɔ emi edinyuŋ eda ke obot Ebal, ndisuŋi; Rueben, ye Gad, ye Asher, ye Zebulun, ye Dan, ye Naphtali.

14Ndien yak mme Levite ebɔrɔ enyuŋ edɔhɔ kpukpru mbon Israel ke ɔkpɔsɔŋ uyo ete,

15Ɔdɔdiɔk ɔnɔ owo eke anamde edisɔi mme editara mbiet, emi Jehovah esede ke mbubiam, utom ubɔk anam-usɔ, ndien emen enye onim ke ndibe ebiet. Ndien yak kpukpru owo ebɔrɔ ete, Amen.

16Ɔdɔdiɔk ɔnɔ owo eke esinde ete esie ye eka esie ke ndek. Ndien yak kpukpru owo edɔhɔ ete, Amen.

17Ɔdɔdiɔk ɔnɔ owo eke eseherede adaŋa mbɔhiduŋ esie. Ndien yak kpukpru owo edɔhɔ ete, Amen.

18Ɔdɔdiɔk ɔnɔ owo eke anamde nnan awaha ɔkpɔŋ usuŋ. Ndien yak kpukpru owo edɔhɔ ete, Amen.

19Ɔdɔdiɔk ɔnɔ owo eke oyutde ikpe esen owo, ye eyen-akpa, ye ebe-akpa. Ndien yak kpukpru owo edɔhɔ ete, Amen.

20Ɔdɔdiɔk ɔnɔ owo eke okotde ŋwan ete esie: koro enye ɔfuhɔrede ufuhɔ-ŋkpɔ ete esie. Ndien yak kpukpru owo edɔhɔ ete, Amen.

21Ɔdɔdiɔk ɔnɔ owo eke ɔfiɔkde unam ekededi. Ndien yak kpukpru owo edɔdɔ ete, Amen.

22Ɔdɔdiɔk ɔnɔ owo eke ɔfiɔkde eyen-ete esie aŋwan, mme eyen-eka esie aŋwan. Ndien yak kpukpru owo edɔhɔ ete, Amen.

23Ɔdɔdiɔk ɔnɔ owo eke ɔfiɔkde eka ŋwan esie. Ndien yak kpukpru owo edɔhɔ ete, Amen.

24Ɔdɔdiɔk ɔnɔ owo eke ɔtɔde mbɔhiduŋ esie ke ndibe. Ndien yak kpukpru owo edɔhɔ ete, Amen.

25Ɔdɔdiɔk ɔnɔ owo eke ɔbɔde okuk aka okowot owo eke miduehe isop. Ndien yak kpukpru owo edɔhɔ ete, Amen.

26Ɔdɔdiɔk ɔnɔ owo eke minimke kpukpru ikɔ mbet emi, inyuŋ inam mmɔ. Ndien yak kpukpru owo edɔhɔ ete, Amen.