1NDIEN Naaman, etubom mbon-ekɔŋ Syria, edi akamba owo ke iso ɔbɔŋ esie, onyuŋ enyene ukpono, koro Jehovah akadade ubɔk esie ɔnɔ Syria erinyaŋa: ndien owo oro edi owo uko, edi ɔdɔŋɔ akpa-mfia.
2Ndien Syria ekewɔŋɔ udim-udim, ndien emum ekpri eyen-aŋwan kiet ke isɔŋ Israel enyɔŋ; ndien enye anam ŋkpɔ ŋwan Naaman.
3Ekem eyen oro ɔdɔhɔ eka esie, ete, Ete mi akpakam odu ke iso prophet emi odude ke Samaria! enye akpanam ndien akpa-mfia okure enye.
4Ndien owo kiet oduk eketiŋ ɔnɔ ete esie, ete, Ntem, ntem ke eyen aŋwan oro okotode ke isɔŋ Israel ɔdɔhɔ.
5Ekem edidem Syria ɔdɔhɔ ete, Nam ka, nyenɔ ŋwed esɔk edidem Israel. Ntre ke enye aka, onyuŋ ada talent silver duop, ye tɔsin shekel gold itiokiet, ye ukpuhɔ ɔfɔŋ-idem duop, akama ke ubɔk aka.
6Ekem enye ada ŋwed oro ɔsɔk edidem Israel, ete, Ke ini ŋwed emi osimde fi, sese, mmɔdɔŋ Naaman owo mi etiene fi, man afo anam akpa-mfia okure enye.
7Edikem ke ini edidem Israel okotde ŋwed oro, enye awai ɔfɔŋ-idem esie, ete, Nte ami ndi Abasi, eke ŋwotde, nnyuŋ nnimde owo uwem, eke esinde owo emi ɔdɔŋ owo etiene mi, ete nnam akpa-mfia okure enye? Mbɔk, mbufo efiɔk, ndien, enyuŋ ese nte enye oyomde mi ikɔ.
8Edikem ke ini Elisha, owo Abasi, okopde ete ke edidem Israel ama asiak ɔfɔŋ-idem esie, enye ɔdɔŋ ekedɔhɔ edidem, ete, Nsinam afo akasiakde ɔfɔŋ-idem fo? Yak enye etiene mi, ndien enye eyefiɔk ete ke prophet ododu ke Israel.
9Ntre ke Naaman edi, ye horse esie, ye chariot esie, edida ke enyin-usuŋ ufɔk Elisha.
10Ndien Elisha ɔdɔŋ isuŋutom etiene enye, ete, Ka keyere mmɔŋ ke Jordan utim ikatiaba, ndien obukidem fo eyefiak oduk fi ke idem, ndien afo eyesana.
11Edi Naaman akpaha esit adaha, onyuŋ ɔdɔhɔ ete, Sese, Ŋkese nte ke enye ediwɔrɔ ada, okot enyiŋ Jehovah Abasi esie, onyuŋ ofuŋ ubɔk esie ke ɔtɔ, ndien anam akpa-mfia okure.
12Ŋkɔm Abanah ye Pharpar, akpa Damascus, efɔn ekan kpukpru mmɔŋ Israel? Nte ŋkemeke ndiyere ke mmɔ nnyuŋ nsana? Ndien enye akabare ɔnyɔŋ ke ikpahesit.
13Ndien ikɔt esie esaŋa ekpere ekedɔhɔ enye, ete, Ete mi, prophet akpasiak akamba ŋkpɔ ɔnɔ fi, ukpanamke? Nwaŋwa ediso, ndien, ke enye ɔdɔhɔde fi, ete, Yere, ndien sana.
14Ndien enye ɔsuhɔre, okoduk ke Jordan utim ikatiaba, ke uyo owo Jehovah: ndien obuk esie akabare nte obuk ekpri eyenɔwɔŋ, enye onyuŋ asana ŋko.
15Ekem, enye ye ofuri udim esie efiak ekesim owo Abasi, edi edida enye ke iso: ndien enye ɔdɔhɔ ete, Mbɔk, sese, mmɔfiɔk nte ke baba Abasi kiet iduhe ke ofuri ereri-mbot, ke mibɔhɔke ke Israel: mbɔk ndien, bɔ owo fo ŋkpɔ mfɔn.
16Edi enye ɔdɔhɔ ete, Ma uwem Jehovah emi ami ndade enye ke iso, mbɔhɔ. Ndien Naaman eyire enye, ete, ɔbɔ; edi enye esin.
17Ndien Naaman ɔdɔhɔ ete, Midige, mbɔk, yak enɔ ofin fo ntan adaŋa nte mule iba ebiomde: koro owo fo miwaha aba edifɔp uwa ye uwa ekɔm inɔ Abasi efen, ke mibɔhɔke Jehovah.
18Yak Jehovah adahado ɔnɔ owo fo ke ŋkpɔ emi, adaŋemi ɔbɔŋ mi odukde ke ufɔk Rimmon, ndibɔŋ akam do, enye onyuŋ eberide idem esie ke ubɔk mi, ami nnyuŋ ntuak ibuot ke ufɔk Rimmon: mbɔk, yak Jehovah adahado ɔnɔ owo fo ke ŋkpɔ emi.
19Ndien enye (Elisha) ɔdɔhɔ enye, ete, Ka ke ifure. Ntem ke enye ɔnyɔŋ ɔkpɔŋ enye esisit.
20Ndien Gehazi akparawa Elisha, owo Abasi, ɔdɔhɔ ete, Sese, ete mi etre ndibɔ Naaman eyen Syria emi se enye akadade ke ubɔk edi: ma uwem Jehovah nyefehe mbine enye, nyuŋ mbɔ enye ŋkpɔ.
21Ntre ke Gehazi ebine Naaman. Ekem adaŋemi Naaman okutde ete ke ebine imɔ, enye oto ke chariot esie ɔsuhɔre edisobo ye enye, ndien obup enye, ete, Nte ŋkpɔ ɔfɔn?
22Ndien enye ɔbɔrɔ ete, Ɔfɔn. Ete mi ɔmɔdɔŋ mi utom, ete, Sese, mkparawa iba emi etode ke nditɔ mme prophet, emeto ke obot Ephraim edi ke ɔtɔ mi, ke idahemi: mbɔk, nɔ mmɔ talent silver kiet, ye ukpuhɔ ɔfɔŋidem iba.
23Ndien Naaman ɔdɔhɔ ete, Kusin, bɔ talent iba. Ndien enye enyik enye, onyuŋ ada talent silver iba ɔbɔp ke ekpat iba, ye ukpuhɔ ɔfɔŋ-idem iba, ɔnɔ mkparawa esie iba; ndien mmɔ ebiom ebem enye iso.
24Ekem adaŋemi enye osimde obot, enye ɔbɔ mmɔ ke ubɔk ada okonim ke ufɔk: ndien ayak mbon oro enyɔŋ.
25Ekem enye oduk akada ke iso ete esie. Ndien Elisha ɔdɔhɔ enye, ete, Afo oto mmɔŋ, Gehazi? Ndien enye ɔbɔrɔ ete, Owo fo ikaha baba ebiet kiet.
26Ndien enye ɔdɔhɔ enye, ete, Nte esit mi ikakaha, ke ini owo oro otode ke chariot esie afiak edisobo ye afo? Nte emi edi ini nte owo ɔkpɔbɔde okuk, okponyuŋ ɔbɔde ɔfɔŋ-idem, ye iŋwaŋ olive, ye iŋwaŋ vine, ye erɔŋ, ye enaŋ, ye ifin iren, ye ifin iban?
27Mmɔdo akpa Naaman eyeyire fi, ye ubon fo ke nsinsi. Ndien enye ɔwɔrɔ ɔkpɔŋ enye, ɔdɔŋɔ akpa-mfia nte snow.
Who We AreWhat We EelieveWhat We Do
2025 by iamachristian.org,Inc All rights reserved.
