ŊWED MBON ROME 2 - Efik Old Bible With Sectional Headings

Edinen Ikpe Abasi

1MMƆDO, O owo ekededi eke ekpede ikpe ɔnɔ owo, afo unyeneke se etiŋde anyaŋa idem; koro ke erikpe emi ekpede owo efen oro ke obobiom idem fo; koro afo emi ekpede ikpe anamde kpa ŋkpɔ oro.

2Edi nnyin imɔfiɔk ite ubiere-ikpe Abasi asaŋa ekekem ye akpanikɔ obiom mmɔ emi enamde oruk ŋkpɔ emi.

3Edi O owo, emi ekpede ikpe mme anam oruk ŋkpɔ emi, onyuŋ anamde kpasuk ntre, nte abat ete imɔ iyebɔhɔ ubiere-ikpe Abasi?

4Midige, mme esin uwak mfɔnido ye ndidop ye anyan ime Esie ke ndek, ke mufiɔkke ete mfɔnido Abasi ada fi oduk ke erikabare esit?

5edi ke nsɔŋesit fo ye unana erikabare-esit fo, ɔkɔ iyaresit onim ɔnɔ idem fo ke usen iyaresit ye eriyarare edinen ubiere-ikpe Abasi;

6emi edinɔde kpukpru owo kiet nte ekemde ye utom esie.

7Enye eyeda nsinsi uwem ɔnɔ mmɔ emi eyirede ke erinam eti ido eyom ubɔŋ ye ukpono ye uwem eke midibiarake:

8edi iyaresit ye ifuresit eyetiene mmɔ emi edide mbon ndomo-idem, minyuŋ isukke ibuot inɔ akpanikɔ, edi esukde idem enɔ ukwaŋido.

9Ukut ye ɔkpɔsɔŋ ndutuhɔ eyedoro kpukpru ukpɔŋ owo eke enamde idiɔk-ŋkpɔ, odoro Jew ke akpa-itie, onyuŋ odoro Greek ŋko;

10edi ubɔŋ ye ukpono ye emem eyedoro kpukpru owo eke enamde eti ido, odoro Jew ke akpa-itie, onyuŋ odoro Greek ŋko:

11Koro Abasi miteŋeke owo enyin.

12Koro adaŋa owo nte ekenamde idiɔk-ŋkpɔ nte mme anana-ibet, nte mme anana-ibet ke eyenyuŋ etak; ndien kpukpru mmɔ emi ekenamde idiɔk-ŋkpɔ ke idak ibet, ke eyeda ibet ekpe ikpe ye mmɔ:

13koro idige mme okop-ibet edi ndinen owo ke iso Abasi, edi ikpe eyetebe mme enim-ibet.

14(Koro ke adaŋemi mme Gentile emi minyeneke ibet enamde ke erimehe se ibet etemede, edi esit mmɔ ɔnɔnɔ mmɔ item, okposuk edi nte mmɔ minyeneke ibet:

15mmɔ eyarare erinim-ibet eke item oro ewetde ke esit mmɔ etemede, esit mmɔ enyuŋ etiene erinnim-ibet oro edi ntiense mmɔ, ekikere mmɔ enyuŋ eneni ye kiet eken, edori mmɔ ikɔ, midige, etebe mmɔ ikpe):

16ke usen eke Abasi edibierede ndibe ŋkpɔ owo ke ubɔk Jesus Christ, nte gospel mi owutde.

17Edi edieke afo ekerede enyiŋ Jew, onyuŋ eberide edem ke ibet,

18onyuŋ oburede ke Abasi, onyuŋ ɔfiɔkde se Enye amade, onyuŋ odomode ŋkpɔ eke efɔnde ekan ama mmɔ, sia ema eda ibet ekpep fi;

19onyuŋ onimde ete imɔ idi andida mme nnan usuŋ, ye uŋwana inɔ mmɔ emi edude ke ekim, ye anditeme mme ɔkɔi,

20Ye andikpep nsek-nditɔ, sia inyenede mbiet ifiɔk ye akpanikɔ ke ibet.

21Afo emi ekpepde owo efen, nte ukpepke idem fo? afo emi ɔkwɔrɔde ete owo okuyip inɔ nte omoyip ke idem fo?

22afo emi ɔdɔhɔde ete owo okusin efibe, nte emesin efibe? afo emi abatde ndem ke mbubiam, nte omowo ŋwo ke mme temple?

23afo emi oburede mbure ke ibet, nte emesuene Abasi ke eribiat ibet?

24Koro ewet ete, Oto mbufo ke esuŋi enyiŋ Abasi ke otu mme Gentile.

25Koro ke akpanikɔ mbobi ɔfɔn fi edieke ononim ibet; edi edieke edide abiat-ibet, mbobi fo amakabare nte ŋkpɔ eke munaŋa mbobi.

26Mmɔdo owo emi minaŋa mbobi ama onim mme item ibet, nte idibatke unana erina mbobi esie nte mbobi?

27Ndien owo emi minaŋa mbobi obukidem ama onim ibet, nte enye idikpehe ikpe inɔ fi emi edide abiat-ibet, okposuk edi nte afo enyenede ŋwed ibet onyuŋ anade mbobi?

28Koro idige owo emi edide Jew enyɔŋ-enyɔŋ edi ata Jew; inyuŋ idige enyɔŋ-enyɔŋ mbobi, emi esinede ke obukidem, edi ata mbobi:

29edi ata Jew edi enye edide Jew ke esit-esit; ata mbobi onyuŋ edi ŋkpɔ ɔwɔŋesit, odu ke spirit, iduhe ke item eke ewetde; itoro esie inyuŋ itoho owo, edi oto Abasi.