2 CHRONICLES 13 - Efik Old Bible With Sectional Headings

Ini Ukara Abijah

1KE ɔyɔhɔ isua edidem Jeroboam efureta, Abijah ada ubɔŋ Judah.

2Enye edi edidem ke Jerusalem ke isua ita: ndien enyiŋ eka esie ekere Micaiah eyen Uriel a Gibeah aŋwan. Ekɔŋ onyuŋ odu ke ufɔt Abijah ye Jeroboam.

3Ndien Abijah ada udim mkpɔsɔŋ mbon-ekɔŋ, tɔsin edimek owo itie ikie inaŋ, eyi ekɔŋ: Jeroboam onyuŋ ada tɔsin edimek owo itie ikie itiaita, eke edide mbon-uko, oduk ke ekɔŋ ye enye.

4Ndien Abijah adaha ada ke ibuot Zemaraim, emi odude ke obot Ephraim, onyuŋ ɔdɔhɔ, ete, Mbufo Jeroboam ye ofuri Israel, ekop uyo mi.

5Nte mbufo ikemeke ndifiɔk, ete ke Jehovah Abasi Israel akada ubɔŋ Israel ɔnɔ David ke nsinsi, kpa enye ye nditɔ esie ke ediomi inuŋ?

6Edi Jeroboam eyen Nebat, owo Solo-mon, eyen David, amadaha ke enyɔŋ, edisɔŋ ibuot ye ete esie.

7Mbukpo owo emenyuŋ esop ye enye, kpa mme oburobut owo emi esɔŋde ido ye Rehohoam eyen Solomon, ke ini Rehoboam edide eyenɔwɔŋ, onyuŋ ememde esit minyuŋ ikemke ubɔk ye mmɔ.

8Ndien ke emi mbufo ekere, ete imekem ubɔk ye ubɔŋ Jehovah ke ubɔk nditɔ David; ndien mbufo edi ata akamba otu owo, nditɔ-enaŋ o-gold oro Jeroboam akanamde ɔnɔ mbufo ke abasi, enyuŋ edu ye mbufo.

9Nte mbufo ikebinke mme oku Jehovah, nditɔ Aaron, ye mme Levite, ifep, inyuŋ inim oku ke idem mbufo, nte mbio mme idut enamde? Owo ekededi eke adade enaŋ eyen ufene, ye okukim itiaba, edi ndiyɔhɔ ubɔk esie, kpasuk enye eyedi oku mme mmɔ eke midige Abasi.

10Edi ema edi nnyin, Jehovah edi Abasi nnyin, nnyin inyuŋ ikpɔŋke enye; mme oku, nditɔ Aaron, enyuŋ enam ŋkpɔ Jehovah, mme Levite enyuŋ enam utom mmɔ;

11ndien kpukpru usenubɔk ye kpukpru mbubreyo mmɔ efɔp edifɔp uwa, ye edinem incense enɔ Jehovah, enyuŋ ediɔŋ ediɔk uyo ke edisana okpokoro; ye udiɔk-utuen-ikaŋ o-gold, ye mme utuenikaŋ esie, man asak kpukpru okoneyo: koro nnyin inimde item Jehovah Abasi nnyin; edi mbufo emekpɔŋ enye.

12Ndien, sese, Abasi odu ye nnyin ke etubom, ye mme oku esie, ye mme ukorowo uyom emi edade enam uyom ebaŋa mbufo. Mbufo, nditɔ Israel, ekuŋwana ekɔŋ ye Jehovah Abasi mme ete mbufo: koro mbufo midikwe unen.

13Edi Jeroboam anam mbon-ekɔŋ ekabare eda ke edem mmɔ ke ndibe: ntre ke mmɔ edu Judah ke iso, mbon-udibe enyuŋ edu mmɔ ke edem.

14Ekem Judah ekabare, ndien, sese, ekɔŋ odu mmɔ ke iso ye ke edem: ndien mmɔ eseme enɔ Jehovah, mme oku enyuŋ efuri ukorowo.

15Nditɔ Judah enyuŋ ekpɔk: ndien, edikem ke ini mbio Judah ekpɔkde, Abasi asuan Jeroboam ye ofuri Israel ke iso Abijah ye Judah.

16Nditɔ Israel enyuŋ efeŋe ke iso Judah: Abasi onyuŋ ada mmɔ eken esin mmɔ ke ubɔk.

17Ndien Abijah ye ikɔt esie ewot mmɔ ata ediwak owo: Israel enyuŋ eduɔŋɔ afai, esim tɔsin edimek owo ikie ition.

18Ntre ke nditɔ Israel esuk ibuot ke ini oro, nditɔ Judah enyuŋ ekabare esɔŋ, koro mmɔ ebuɔtde idem mmɔ ye Jehovah Abasi mme ete mmɔ.

19Abijah onyuŋ ebine Jeroboam, onyuŋ ɔbɔ enye obio, Bethel ye mme obio iŋwaŋ esie, ye Jeshanah ye mme obio iŋwaŋ esie, ye Ephraim ye mme obio iŋwaŋ esie.

20Ndien Jeroboam ikopke aba odudu ke usen Abijah: ekem Jehovah ɔtɔ enye owot.

21Edi Abijah ɔsɔŋɔ etie, onyuŋ ɔdɔ iban duopenaŋ, onyuŋ obon nditɔ-iren edip ye iba, ye nditɔ iban efurekiet.

22Ndien ekewet ŋkpɔ Abijah emi esuhɔde, ye ido esie, ye ikɔ esie, esin ke mbuk prophet Iddo.