MME HEBREW 7 - Efik Old Bible With Sectional Headings

Akwa Oku Nte Utɔ Melchizedek Asaŋade.

1KORO Melchizedek emi-emi ekedide edidem Salem, ye oku Abasi Ibom, emi osobode ye Abraham ke ini enye otode ndiwot ndidem afiak edi onyuŋ ɔdiɔŋde enye:

2emi Abraham onyuŋ abaharede kpukpru ŋkpɔ ke itie duop osio ubak kiet ɔnɔ enye; (ebem iso ekot enye, ete, Edidem edinen ido, enyuŋ ekot enye, Edidem Salem ŋko, oro ɔwɔrɔ ete,

3Edidem emem; enye inyeneke ete, inyuŋ inyeneke eka, inyuŋ inyeneke oruk iman, inyuŋ inyeneke eritɔŋɔ eyo uwem ye utit uwem, edi enam enye ebiet Eyen Abasi) - osuk ada oku ke nsinsi.

4Ekere ndien adaŋa nte owo emi okponde, emi Abraham, akwa ete nnyin, okosiode ɔyɔhɔ ubak ŋkpɔ duop ke otu nti mbume ɔnɔ enye.

5Ke akpanikɔ ema enɔ nditɔ Levi, emi edade idaha oku, uyo, ete, ebɔ mbio-obio ŋkpɔ kiet ke itie duop, nte ibet etemede; oro ɔwɔrɔ ete, mmɔ ebɔ nditɔ-ete mmɔ, okposuk edi nte mmɔ oro etode Abraham:

6edi enye, emi mibatke ite ntak esie ɔkɔsuŋɔ Levi ke idem, ama ɔbɔ Abraham utomo, onyuŋ ɔdiɔŋ enye emi enyenede uŋwɔŋɔ.

7Edi owo inenike ite, edi akamba akam ɔdiɔŋ ekpri.

8Ndien ke ŋkaŋ emi, mmɔ emi edikpade ebɔ utomo; edi ke ŋkaŋ oko, edi enye emi edɔhɔde ete, enye ke odu uwem.

9Ntre ke owo ekeme ndidɔhɔ ete, kpa Levi emi ɔbɔde utomo, okonyuŋ ɔnɔ utomo ke idem Abraham;

10koro enye okodu adaŋoro ke idem ete esie, ke adaŋemi Melchizedek osobode ye enye.

11Edi edieke mfɔn-mma okpotode ke idaha oku Levi (koro ekenɔ mbio-obio ibet ke idak idaha oku oro), ekpenam didie eyom oku efen adaha ada nte utɔ Melchizedek asaŋade, ekukɔm enye nte utɔ Aaron asaŋade?

12Koro ke adaŋemi ema ekpuhɔre idaha oku, ana nte ekpuhɔre ibet ŋko.

13Koro Enye, emi edɔhɔde mme ŋkpɔ emi edian Enye, oto ke esien efen, emi baba owo kiet mitoho ke esit ikada mbet ke itie-uwa.

14Koro aŋwaŋa ete Ɔbɔŋ nnyin okoto ke Judah; ndien akanam Moses itiŋke baba ŋkpɔ kiet eke abaŋade oku idian esien emi.

15Ndien se itiŋde ototim aŋwaŋa akan, edieke oku efen emi ebietde Melchizedek adahade ada;

16emi midaha item ibet obukidem inim Enye nte oku, edi edade odudu uwem eke midikemeke ndibiara, enim Enye;

17koro etiŋ ebaŋa Enye ete,

Afo edi oku ke nsinsi

Nte utɔ Melchizedek asaŋade.

18Koro ekpɔnɔre ibet emi okodude ke mbemiso enim ŋkaŋ kiet, sia enye edide mmeme, minyuŋ inamke ufɔn

19(koro ibet minamke baba ŋkpɔ kiet ɔfɔn ama), enyuŋ eda idori-enyin eke ɔfɔnde akan edian, emi nnyin isaŋade ke esit ikpere Abasi.

20Ndien kpa nte ekedade uŋwɔŋɔ enim Enye ke oku

21(koro ikadaha uŋwɔŋɔ inam nditɔ Levi edi oku; edi Abasi, emi ɔkɔdɔhɔde abaŋa Enye ete,

Jehovah omotomo Idem Esie, idinyuŋ ituaha mkpɔfiɔk ete,

Afo edi oku ke nsinsi,

22Ada uŋwɔŋɔ anam Enye edi oku); adaŋa ntre ŋko ke Jesus amakabare edi ubiɔŋ ediomi eke ɔfɔnde akan.

23Ke akpanikɔ ekonyuŋ enam ediwak owo edi oku, koro mkpa miyakke mmɔ esuk edu uwem:

24edi Enye, koro Enye odude uwem ke nsinsi, enyene idaha oku eke mikemeke ndikpuhɔre.

25Ke ntak emi Enye onyuŋ ekeme ndinyaŋa mmɔ emi esaŋade ke Enye ekpere Abasi ɔyɔhɔ-ɔyɔhɔ, sia enye odude uwem ke nsinsi ndinam mkpe-ubɔk nnɔ mmɔ.

26Emi edi oruk Akwa Oku emi ekemde ye nnyin, emi asanade, minyeneke ŋkari, minyuŋ iduehe, emi misaŋake ye mme anam-idiɔk, emi ema enyuŋ emen enim okoŋ akan mme heaven;

27emi minyeneke ndiwa uwa kpukpru usen mbaŋa idiɔk-ŋkpɔ idem esie kaŋa, ndien enye ediwa abaŋa mme idiɔk-ŋkpɔ mbio obio, nte ikpɔ oku oro ekam enamde: koro Enye akanam emi ama ini kiet, ke adaŋemi Enye awade Idem Esie.

28Koro ibet emekde mme owo, emi enyenede mmem-idem, onim ke ikpɔ oku; edi ikɔ uŋwɔŋɔ, eke etienede ibet ke edem, emek Eyen onim, emi ema enam Enye ɔfɔn ama ke nsinsi.