1EDIKEM ke ɔyɔhɔ isua ikie inaŋ ye anaŋ, nte nditɔ Israel eketo ke isɔŋ Egypt, ke ɔyɔhɔ isua inaŋ, ke ɔfiɔŋ Ziv (oro edi udiana-akpa ɔfiɔŋ), nte Solomon akada ubɔŋ Israel, enye ɔtɔŋɔ ndibɔp ufɔk Jehovah.
2Ndien uniɔŋ ufɔk emi Solomon ɔbɔpde ɔnɔ Jehovah edi ibio idomo-okuk ata, ubom esie onyuŋ edi ibio idomo-okuk edip, idaha esie onyuŋ edi ibio idomo-okuk edip ye duop.
3Ndien uniɔŋ etehe emi odude ke iso temple ufɔk edi ibio idomo-okuk edip, ekem ye ubom ufɔk; ubom esie onyuŋ edi ibio idomo-okuk duop ke iso ufɔk.
4Enye onyuŋ anam window emi ibiɔŋ eto mmɔ emumde ibibene, esin ke ufɔk.
5Enye onyuŋ ɔbɔp ufɔk enyɔŋ adian ye ibibene ufɔk akan ibibene ufɔk okuk, akan temple ye ubet-etak okuk: ntem ke enye anam ubet-ubet akan okuk.
6Ndien ubom deck ke isɔŋ edi idomo-okuk ition, ubom eke ufɔt onyuŋ edi ibio-idomo-okuk itiokiet, ubom eke ɔyɔhɔ ita onyuŋ edi ibio-idomo-okuk itiaba: koro enye afarade ibibene ke edem esie akan okuk, man ekusin mme beam ke ibibene ufɔk.
7Ndien adaŋemi ebɔpde ufɔk, mmɔ ebɔp ke itiat emi ema ekesɔi ema ke ebiet usɔi itiat; ndien ikopke baba hammer, ye ekudi, ye ŋkpɔ-ukwak ekededi, ke ufɔk adaŋemi ebɔpde enye.
8Enyin-usuŋ esine-ufɔt ubet odu ke ŋkaŋ ufɔk nnasia: ndien mmɔ eduk ke udigukot emi akabarede esim deck emi esinede ke ufɔt, ndien eto ke esine-ufɔt deck edɔk ke ɔyɔhɔ ita.
9Ntem ke enye ɔbɔp ufɔk oro, onyuŋ ama enye: ndien enye ada beam ye obubɔk cedar ɔkɔŋ ufɔk.
10Enye onyuŋ ɔbɔp ufɔk enyɔŋ emi idaha esie edide ibio-idomo-okuk ition, adian ke ŋkaŋ ofuri ufɔk, ndien enye (ufɔk enyɔŋ) omum (ata) ufɔk ke eto cedar.
11Ekem uyo Jehovah osim Solomon, ete,
12Ama edi ufɔk emi afo ɔbɔpde, afo ama asaŋa ke mme ewuhɔ mi, onyuŋ anam mme item mi, onyuŋ onim ibet mi kpukpru, onyuŋ asaŋa ke esit; ndien nyenam uyo mi oro ŋkodɔhɔde David usɔ,
13osu ɔnɔ fi; nyenyuŋ nduŋ ke otu nditɔ Israel; ndinyuŋ ŋkpɔŋke Israel ikɔt mi.
14Ntem ke Solomon ɔbɔp ufɔk oro, onyuŋ ama enye.
15Ndien enye ada obubɔk cedar ɔkɔŋ ibibene esit ufɔk, ɔkɔŋ obukpɔk ke esit, ɔtɔŋɔde ke isɔŋ ufɔk tutu osim ke deck ɔkɔm; enye onyuŋ ada obukpɔk cypress ɔkɔŋ isɔŋ ufɔk.
16Enye onyuŋ osibe ibio-idomo-okuk edip ke etak ufɔk ada obukpɔk cedar ɔkɔŋ ke esit ufɔk ɔnɔ enye, ke eke ubetetak, man edi ata edisana ebiet.
17Ndien ata ufɔk edi ibio-idomo-okuk aba; enye edi temple ke iso.
18Mmɔ enyuŋ ekap cedar ke esit ufɔk enam ikpɔk-ekpo ye edisiaha ikɔŋ; ofuri-ofuri edi cedar: ikwe baba itiat
19Ndien enye ɔdiɔŋ ubet-etak ke esit ufɔk, man eda ekebe ediomi Jehovah esin do.
20Ndien esit ubet-etak edi ibio idomo-okuk edip ke uniɔŋ, ye ibio-idomo-okuk edip ke ubom, ibio-idomo-okuk edip onyuŋ edi idaha esie: ndien enye ada ata eti gold adian ofuk enye. Enye onyuŋ ada cedar ofuk itie-uwa.
21Solomon onyuŋ ada ata eti gold adian ofuk esit ufɔk; onyuŋ anam ŋkpɔkɔbi gold asaŋa ke iso ubet-etak: onyuŋ ada gold adian ofuk enye.
22Enye onyuŋ ada gold adian ofuk ofuri ufɔk, tutu enye ama ofuri ufɔk: onyuŋ ada gold adian ofuk itie-uwa ubet-etak.
23Ndien enye ada eto olive anam cherubim iba onim ke esit ubet-etak, emi idaha mmɔ edide ibio idomo-okuk duop.
24Mba cherub kiet edi ibio-idomo-okuk ition; mba cherub eken onyuŋ edi ibio idomo-okuk ition: ɔtɔŋɔde ke uti mba kiet tutu osim ke utit mba eken edi ibio-idomo-okuk duop.
25Cherub eken onyuŋ edi ibio-idomo-okuk duop: mme cherubim mbiba esaŋa idomo kiet ye oruk kiet.
26Idaha cherub kiet edi ibio-idomo-okuk duop, cherub eken onyuŋ etie kpasuk ntre.
27Ndien enye onim mme cherubim ke ufɔt ufɔk eke odude ke esit; mmɔ enyuŋ etat mba mme cherubim, ndien mba kiet atuak ke ibibene kiet, mba cherub eken onyuŋ atuak ke ibibene eken; mba mmɔ enyuŋ esobo ke ufɔt ufɔk,
28mba eyi ye mba. Enye onyuŋ ada gold ofuk mme cherubim.
29Enye onyuŋ akap ofuri ibibene akan okuk, anam mbiet cherubim, ye eke eyop, ye eke edisiaha mfri, ke esit ye ke edem.
30Enye onyuŋ ada gold okubi isɔŋ ufɔk ke esit ye ke edem.
31Ndien enye ada eto olive anam itim ɔnɔ usuŋ ubet-etak: lintel, ye obubɔk usuŋ ekem ye ɔyɔhɔ ubak ibibene ition.
32Mmɔ enyuŋ eda eto olive enam itim iba; enyuŋ ekap cherubim, ye eyop, ye edisiaha mfri, esin ke esit, enyuŋ eda gold ekubi, enyuŋ efuk gold oro ke mme cherubim, ye ke eyop.
33Ndien kpasuk ntre enye ada eto olive anam obubɔk enyin-usuŋ temple ekem ye ɔyɔhɔ ubak ibibene inaŋ.
34Enyuŋ eda obubɔk cypress enam itim iba: ebahare itim kiet ke mbak iba, ebahare itim kiet eken ke mbak iba.
35Enye onyuŋ akap cherubim, ye eyop, ye edisiaha mfri, esin ke esit, onyuŋ ada gold otim okubi se ekapde.
36Ndien enye ɔbɔp okure esit-esit ke udim itiat emi ekediɔŋde, ita, ye udim eto cedar kiet.
37Mmɔ etɔŋɔ ndibɔp ufɔk Jehovah ke ɔyɔhɔ isua inaŋ, ke ɔfiɔŋ Ziv:
38ndien ke ɔyɔhɔ isua duope-kiet, ke ɔfiɔŋ Bul (enye edi ɔyɔhɔ ɔfiɔŋ itiaita) mmɔ ema ufɔk, nte kpukpru ŋkpɔ esie edide. Ntem ke enye ada isua itiaba ɔbɔp enye.
Who We AreWhat We EelieveWhat We Do
2025 by iamachristian.org,Inc All rights reserved.
