MATTHEW 18 - Efik Old Bible With Sectional Headings

Mme Mbet Jesus Ebup Enye Andikpon Ŋkan Ke Obio Ubɔŋ Heaven(Mk 9.33-37; Lk 9.46-48)

1KE ini oro mbet etiene Jesus ete, Anie ndien okpon akan ke Obio Ubɔŋ Heaven?

2Ndien Enye okot ekpri eyenɔwɔŋ edi, onim ke ufɔt mmɔ,

3ete, Ke akpanikɔ ke ndɔhɔ mbufo, ibɔhɔke mbufo ewɔŋɔre ekabare etie nte ŋkpri nitɔwɔŋ, mbufo ididukke ke Obio Ubɔŋ Heaven.

4Mmɔdo owo ekededi eke edisuhɔrede idem nte ekpri eyenɔwɔŋ emi, kpa enye okpon akan ke Obio Ubɔŋ Heaven.

5Owo ekededi eke edinyuŋ adarade oruk ekpri eyenɔwɔŋ emi kiet ke enyiŋ Mi adara Mi:

6edi owo ekededi eke edisinde kiet ke otu ŋkpri nditɔwɔŋ emi ebuɔtde idem ye Ami ɔduɔ, ɔfɔn akan ye enye nte ekpadade akamba itiat ukɔk-ŋkpɔ ekɔŋɔ enye ke itɔŋ, enyuŋ eduɔk enye ke udem inyaŋ.

7Mbɔm ererimbot ke ntak erisin owo ɔduɔ; koro ntak iduɔ enyene ndidi, edi eyedɔdiɔk ɔnɔ owo oro ŋkpɔ iduɔ otode enye.

8Edi edieke ubɔk fo mme ukot fo esinde fi ɔduɔ, sibe enye, top, duɔk; ɔfɔn ye afo ndibe nduk uwem ye unan mme mbuŋɔ, akan afo ndikpenyene ubɔk iba mme ukot iba ndien eduɔk fi ke nsinsi ikaŋ.

9Edieke enyin fo esinde fi ɔduɔ, wobere enye, top, duɔk; ɔfɔn ye afo ndida enyin kiet mbe nduk uwem, akan afo ndikpenyene enyin iba, ndien eduɔk fi ke hell emi asakde ikaŋ.

10 Etiŋ enyin ekusin kiet ke otu ŋkpri nditɔwɔŋ emi ke ndek: koro ndɔhɔ mbufo nte, mme angel mmɔ ke heaven esuk ekut iso Ete Mi emi odude ke Heaven

11koro eyen owo emedi ndinyaŋa mmɔ oro ekesopde.

12Mbufo ese didie? Edieke owo enyenede erɔŋ ikie, ndien kiet osop, nte enye idikpɔŋke anaŋ ye efurenaŋ oro, ika ke mme obot ikoyom kiet oro osopde?

13Ndien ama ɔwɔrɔ ete okut enye, ke akpanikɔ ke ndɔhɔ mbufo, enye adat esit abaŋa erɔŋ oro akan anaŋ ye efurenaŋ emi mikosopke.

14Kpasuk ntre idige uduak Ete mbufo ke heaven ete kiet ke otu ŋkpri nditɔwɔŋ emi akpatak.

15 Edi edieke eyen-ete fo eduede fi, ka kasua ndudue esie nɔ enye, suk fi ye enye ikpɔŋ.

16Edieke enye okopde uyo fo, afo amada eyen-ete fo enyene. Edi edieke enye mikopke uyo fo, da owo kiet mme iba dian idem, man ke inua ntiense iba mme ita kpukpru ikɔ ekpɔsɔŋɔ eda.

17Edi edieke enye esinde ndikop uyo mmɔ, men tiŋ nɔ ufɔk Abasi, edi enye esinde ndikop uyo ufɔk Abasi, yak enye etie fi ke enyin nte owo mme idut ye publican.

18Ke akpanikɔ ke ndɔhɔ mbufo nte ŋkpɔ ekededi eke mbufo edibɔpde ke isɔŋ, eyebɔp ke heaven; ŋkpɔ ekededi eke mbufo edinyuŋ etatde ke isɔŋ, eyetat ke heaven.

19Mmonyuŋ ntɔŋɔ ntak ndɔhɔ mbufo nte, owo iba ke otu mbufo ema eduk ediomi ebaŋa ŋkpɔ ekededi eke mmɔ edibeŋede, Ete Mi emi odude ke heaven eyenam ŋkpɔ oro ɔnɔ mmɔ.

20Koro ɔtɔ nte owo iba mme ita esopde idem ke enyiŋ Mi, do ke ndodu ke ufɔt mmɔ.

21Ekem Peter edi edidɔhɔ Enye ete, Ɔbɔŋ, ikafaŋ ke eyen-ete mi edidue mi, ndien ndahado nnɔ enye?

22Jesus ɔbɔrɔ enye ete, Ndɔhɔke fi nte, tutu osim utim ikatiaba, edi tutu osim ikatiaba ke itie ata ye duop.

23Mmɔdo eda Obio Ubɔŋ Heaven edomo ye edidem emi oyomde ndibat ibat ye ifin esie.

24Ndien ke enye ama ɔkɔtɔŋɔ ndibat, eda owo esɔk enye emi akamade enye thousand talent duop.

25Edi sia owo oro minyeneke se adade osio isɔn, ete esie ɔnɔ uyo ete, enyam enye, ye ŋwan esie, ye nditɔ esie, ye kpukpru se enye enyenede, eda esio isɔn.

26Owo oro ɔduɔ ke isɔŋ atuak ibuot ɔnɔ enye, ete, Ɔbɔŋ, me ime ye ami, ndien nyesio kpukpru nnɔ fi.

27Edi ete owo oro okop mbɔm, asana enye ayak, onyuŋ adahado ke isɔŋ esie.

28Edi owo oro adaha ɔwɔrɔ onyuŋ okut eyen-ufɔk ete esie kiet, emi akamade enye okuk ikie; onyuŋ omum enye, efik enye itɔŋ, ete, Sio se akamade mi.

29Ntre ke eyen-ufɔk ete esie ɔduɔ ke isɔŋ ekpe enye ubɔk, ete, Mme ime ye ami, ndien nyesio nnɔ fi.

30Edi enye inyimeke, edi adaha ekesin enye ke ufɔk-ŋkpɔkɔbi, tutu enye osio se akamade.

31Mmɔdo ke adaŋemi nditɔ-ufɔk ete esie ekutde se ikotibede, esit ayat mmɔ eti-eti, mmɔ enyuŋ edi editiŋ enɔ ete mmɔ kpukpru se ikotibede.

32Ekem ete esie okot enye edi, onyuŋ ɔdɔhɔ enye ete, Afo idiɔk owo, ŋkadahado ke kpukpru isɔn oro nnɔ fi, sia ebeŋede mi.

33Nte afo nde ukpatuaha eyen-ete fo mbɔm, kpa nte ŋkatuade fi mbɔm?

34Ndien ete esie ayat esit ye enye, onyuŋ ayak enye esin ke ubɔk mme andituhɔre owo, tutu enye osio kpukpru se enye akamade.

35 Kpasuk ntre ke Ete Mi ke heaven edinam ye mbufo, ke mbufo kiet kiet mifenke eyen-ete mbufo ke ofuri esit.