OBADIAH 1 - Efik Old Bible With Sectional Headings

Abasi Ɔŋwɔŋɔ Ndisuhɔre Edom ke Ntak Ntaŋidem Mmɔ

1NKUKUT OBADIAH. Ntem ke Ɔbɔŋ Jehovah ɔdɔhɔ abaŋa Edom; ete, Nnyin imekop etop emi otode Jehovah; emenyuŋ edɔŋ mme isuŋ utom ke otu mme idut, ete, Mbufo edaha ke enyɔŋ, nnyin idaha ke enyɔŋ ika ekɔŋ ye enye.

2Sese, mmanam fi akabare ekpri ke otu mme idut: emesin fi ke ndek eti-eti.

3Iseri esit fo ememenere fi ke enyɔŋ; afo oduŋ ke ndudu ikpɔ itiat: ebiet iduŋ esie omokoŋ; enye ɔdɔhɔ ke esit esie, ete, Anie edisuhɔre mi onim ke isɔŋ?

4Jehovah ɔdɔhɔ, ete Afo ama onim efɔk fo edikoŋ nte ntrukpom, onyuŋ onim enye ke otu ntantafiɔŋ, nyesio fi do nsuhɔre nnim.

5Inɔ ema ekpedi ke ebiet fo, ye mbon-ŋwo ke okon-eyo, (afo abiara didie!) nte mmɔ ikpeyipke se ikemde? Mme etet-mfri vine ema ekpedi ke ebiet fo, nte mmɔ ikpesuhɔke baba ŋkeŋe-ŋkeŋe?

6Enam didie eyep Esau? eduŋɔre ndibe-ndibe ebiet esie?

7Kpukpru mmɔ emi ediomide ediomi ye afo esin fi ke adaŋa: mmɔ emi etiede ufan-ufan ye afo ebiaŋa fi enyuŋ ekan fi: mmɔ emi etade uyo fo ekɔk afia esin ke idak ukot fo: eti ibuot iduhe enye ke idem.

8Jehovah ɔdɔhɔ ete, Nte ndisoboke mme ɔfiɔkŋkpɔ owo mfep ke Edom, ye eti-ibuot ke obot Esau ke usen oro?

9Ndien idem eyekpa mbon-uko fo, O Teman, man esibe owo ke obot Esau efep ke afai.

10Afai oro afo akanamde ye Jacob eyen-usɔ eyesin but ofuk fi, eyenyuŋ esibe fi efep ke nsinsi.

11Ke usen oro afo akadade ke edem usua, ke usen emi isen owo eketaŋde mbon-ekɔŋ esie efep, emi isen owo enyuŋ edukde ke inua-otop esie, enyuŋ esinde afia ebaŋa Jerusalem, afo ŋko eketie nte owo mmɔ kiet.

12Edi ukpesehe ke usen eyen-usɔ, ke usen oro enye akabarede edi esen owo; ukponyuŋ udatke esit ubaŋa nditɔ Judah, ke usen oro ekesobode mmɔ; ukponyuŋ ubureke mbure ke usen nnan-enyin.

13Ukpodukke ke inua-otop ikɔt mi ke usen nsobo mmɔ; afo ŋko ukponyuŋ usehe idiɔk itie mmɔ ke usen nsobo mmɔ, ukponyuŋ udorike ubɔk ke inyene mmɔ ke usen nsobo mmɔ;

14ukponyuŋ udaha ke ŋwaŋa-usuŋ usibe mmɔ eke edide esie eke ebɔhɔde ufep; ukponyuŋ umenke mmɔ eke edide esie eke esukde, uyak unɔ, ke usen nnanenyin mmɔ.

15Koro usen emi Jehovah edinamde ikɔ ye kpukpru mme idut emekpere: kpa nte afo akanamde, kpa ntre ke edinam ye afo: utip fo eyefiak ɔtɔ fi ke ibuot.

16Koro kpa nte emi mbufo ekeŋwɔŋde ke enyɔŋ edisana obot mi, kpukpru mme idut eye-ŋwɔŋ kpukpru ini, mmɔ eyenyuŋ eŋwɔŋ, enyuŋ emen esin ke idibi, ndien eyetie nte se mikoduhe.

17Edi ubɔhɔ eyedu ke obot Zion, enye eyenyuŋ edi edisana; ufɔk Jacob eyenyuŋ eda udeme mmɔ.

18Ndien ufɔk Jacob eyedi ikaŋ, ufɔk Joseph eyenyuŋ edi edeme-ikaŋ, ufɔk Esau eyenyuŋ edi mbio, ndien mmɔ eyesak ke esit, enyuŋ eta mmɔ; ndien baba ŋkpɔ kiet idisuhɔke inɔ ufɔk Esau; koro Jehovah ɔdɔhɔ.

19Ndien mbon edem usuk eyeda obot Esau; mbon una-isɔŋ edem-inyaŋ eyenyuŋ eda mme Philistine: mmɔ eyenyuŋ eda obot-iŋwaŋ Ephraim, ye obot-iŋwaŋ Samaria: ndien Benjamin eyeda Gilead.

20Ndien akwa otu nditɔ Israel emi eketaŋde efep, emi edude ke otu mme Canaanite, tutu osim ke Zarephath, ye mbio-obio Jerusalem emi eketaŋde efep, emi edude ke Sepharad, eyeda mme obio edem usuk.

21Ndien mbon eke enyaŋade eyedɔk ke obot Zion, edikpe ikpe obot Esau, ndien Jehovah eyeda ubɔŋ.