JEREMIAH 50 - Efik Old Bible With Sectional Headings

Uyo Abasi ke Abaŋa Mbon Babylon

1UYO emi ke Jehovah ɔkɔdohɔ abaŋa Babylon ye isɔŋ mme Chaldean ke ubɔk Jeremiah prophet.

2Mbufo etiŋ, ke otu mme idut enyuŋ ekwɔrɔ, enyuŋ emenere banner, ekwɔrɔ, ekudip; edɔhɔ ete, Ema emum Babylon, but anam Bel, Merodach amasuana; but anam mbiet esie, ekpat eto esie emesuana.

3Koro idut otode ke edem edere ɔdɔk edi ekɔŋ ye enye, enye eyenam isɔŋ esie edi ndon, ndien baba owo kiet eke oduŋde ke esit ididuhe: owo ye ufene emefeŋe, emedaŋa.

4Jehovah ɔdɔhɔ, ete, Ke mme usen oro ye ke ini oro, nditɔ Israel eyedi, mmɔ ye nditɔ Judah ɔtɔ kiet, eyesaŋa edi etua eyet, eyenyuŋ eyom Jehovah Abasi mmɔ.

5Mmɔ eyebup ebaŋa Zion, ekabare iso esin ke usuŋ eke akade do, ete, Mbufo edi ndien nnyin iyedian idem ye Jehovah, ke nsinsi ediomi eke midifreke.

6Ikɔt mi edi ufene eke esopde: mme ɔbɔk mmɔ enam mmɔ ediyo, enam mmɔ efiak edem ke ikpɔ obot: mmɔ ekpɔŋ akamba obot eka ekpri, emefre ebiet nna mmɔ.

7Kpukpru owo eke ekutde mmɔ edia mmɔ: mme asua enyuŋ edɔhɔ, ete, Nnyin iduehe isop, koro mmɔ ekeduede Jehovah, iduŋ eti ido, edue Jehovah, idorienyin mme ete mmɔ.

8Mbufo edaŋa ke ufɔt Babylon efeŋe, enyuŋ eto ke isɔŋ mme Chaldean ewɔŋɔ, enyuŋ ebiet mme okpo ebot ke iso ufene.

9Koro, sese, ami mmɔŋ ndemere esop ikpɔ mme idut ke idut edere, nyenyuŋ nda mmɔ ndɔk ntiene Babylon: ndien mmɔ eyetim udim ekɔŋ eŋwana ye enye; mmɔ eke etode ke esit eyeda enye: idaŋ mmɔ eyebiet eke owo uko eke enyenede ikike, enye idifiakke ukpɔk.

10Ndien mme Chaldean eyedi ŋkpɔ mbume; kpukpru mmɔ eke ebumede mmɔ eyeyuhɔ, Jehovah ɔdɔhɔ.

11Koro esit ekadatde mbufo, koro mbufo ekebrede mbre, mbufo mme ndibiat udeme mi, koro mbufo efrɔde nte abak uman enaŋ ke mbiet, enyuŋ esiorode uyo nte nyara horse:

12but anam eka mbufo eti-eti; ŋwan emi akamande mbufo okut esuene: sese, akpatre mme idut eyedi wilderness, ye edisat isɔŋ, ye desert.

13Ifuresit Jehovah idiyakke owo oduŋ ke esit, edi ofuri esie eyedi ndon-ndon: kpukpru owo eke ebede Babylon eyekpa idem, enyuŋ esi ebaŋa kpukpru ufen esie.

14Mbufo etim udim ekɔŋ ekan Babylon ekuk: kpukpru mbufo eke enukde utiga, etiga enye, ekufam idaŋ: koro enye anamde idiɔk ye Jehovah.

15Mbufo efiori ekan enye ekuk: enye ɔkɔŋɔ mfaŋ; se enye eberede ke esit ɔmɔduɔ, ibibene esie emewure: koro edide usiene Jehovah; mbufo esio usiene ye enye; enam ye enye kpa nte enye akanamde.

16Mbufo esibe owo eke awaride (mkpasip) ke Babylon efep, ye owo eke akamade ŋkpɔ ukpi ke ini ukpeŋe: ofut afai eyesin kpukpru owo ekabare etiene oruk mmɔ, kpukpru owo eyenyuŋ efeŋe eka idut mmɔ.

17Israel edi erɔŋ eke esuanade: mme lion emebin enye efep: edidem Assyria ama ebem iso adia enye; ndien ke emi Nebucha-drezzar edidem Babylon emi etiene edem obuŋ enye ɔkpɔ.

18Mmɔdo ntem ke Jehovah mme udim Abasi Israel ɔdɔhɔ, ete, Sese, ami mmɔŋ nda ufen nnɔ edidem Babylon ye isɔŋ esie, kpa nte ŋkɔnɔde edidem Assyria ufen.

19Ndien nyeda Israel mfiak ndi ke iduŋ esie, ndien enye eyeta mbiet ke Carmel ye ke Bashan, ukpɔŋ esie eyenyuŋ ɔyuhɔ ke obot Ephraim ye ke Gilead.

20Jehovah ɔdɔhɔ, ete, Ke mme usen oro, ye ke ini oro, eyeyom idiɔk ido Israel, edi ididuhe; eyenyuŋ eyom mme ukwaŋ-ŋkpɔ Judah, edi idikwe: koro nyedahado nnɔ mmɔ eke ndisuhɔde.

21Dɔk ka ekɔŋ ye isɔŋ Mera-thaim, ka ekɔŋ ye enye ye mme andiduŋ Pekod. Jehovah ɔdɔhɔ, ete, Bine mmɔ, sobo, nyuŋ wuri, nyuŋ nam kpukpru kpa nte ŋketemede fi.

22Uyom ekɔŋ odu ke isɔŋ, ye eke akwa ŋwure.

23Hammer ofuri ekondo anam didie asiaha onyuŋ ɔbuŋɔ! Babylon anam didie akabare ŋkpɔ ndyɔ ke otu mme idut!

24Ami ŋkɔkɔk afia nnɔ fi, emenyuŋ emum fi, O Babylon, ndien afo ukɔfiɔkke: ekekut fi enyuŋ emum, koro afo akaŋwanade eŋwan ye Jehovah.

25Jehovah emeberere usuŋ unim-ŋkpɔ esie, ɔmɔnyuŋ osio ŋkpɔ ifuresit esie: koro Ɔbɔŋ Jehovah mme udim enyenede utom ke isɔŋ mme Chaldean.

26Mbufo eto ke ata anyan ebiet etiene enye, eberere usuŋ unim-ŋkpɔ esie: ekubi enye kpa nte otu, enyuŋ esobo enye fap: ekusuhɔ baba ŋkpɔ kiet enɔ enye.

27Mbufo esobo kpukpru mme enaŋ esie; yak mmɔ esuhɔre eka mkpa: ɔdɔdiɔk ɔnɔ mmɔ! koro usen mmɔ edide, kpa ini ufen mmɔ.

28Uyo mmɔ emi efeŋede enyuŋ ebɔhɔde ekpɔŋ isɔŋ Babylon, man ekwɔrɔ usiene Jehovah Abasi nnyin ke Zion, kpa usiene temple esie.

29Mbufo ekot mbon utiga edi ekɔŋ ye Babylon: kpukpru mbufo emi enukde utiga enam nna ekɔŋ ekan enye ekuk; ekuyak baba owo kiet ɔbɔhɔ ke esit, enɔ enye utip nte ekemde ye utom esie; mbufo enam enye kpukpru nte enye akanamde, koro enye ataŋde idem ye Jehovah, ye Edisana Abasi Israel.

30Mmɔdɔ mkparawa esie eyeduɔŋɔ ke aŋwa, kpukpru mbon ekɔŋ esie eyenyuŋ etak ke usen oro, Jehovah ɔdɔhɔ.

31Ɔbɔŋ Jehovah mme udim ɔdɔhɔ, ete, Sese, mmasua fi, O eseri-iseri, koro usen fo emedi, kpa ini eke ndinɔde fi ufen.

32Ndien eseri-iseri eyetuak ukot ɔduɔ, ndien owo eke edimenerede enye onim ke enyɔŋ ididuhe: ndien ami nyekim ikaŋ ke mme obio esie, ndien enye eyeta kpukpru se ikande enye ikuk.

33Ntem ke Jehovah mme udim ɔdɔhɔ, ete, Emefik nditɔ Israel ye nditɔ Judah ɔtɔ kiet: ndien kpukpru owo eke eketaŋde mmɔ efep esɔŋɔ emum mmɔ; inyimeke ndisana mmɔ nyak.

34Andifak mmɔ edi ɔkpɔsɔŋ, Jehovah mme udim edi enyiŋ esie: enye iditreke ndikpe ikpe mmɔ, man anam isɔŋ etie suŋ, onyuŋ anam mme andiduŋ Babylon enyek idem.

35Jehovah ɔdɔhɔ, ete, Ofut omodoro mme Chaldean ke idem, omodoro mme andiduŋ Babylon ke idem, omodoro ke idem mbɔŋ esie, ye eke mme ɔfiɔk-ŋkpɔ owo esie.

36Ofut omodoro mbon mbure ke idem, ndien mmɔ emekabare edi ndisime: ofut omodoro mbon uko esie, ndien idem akpa mmɔ.

37Ofut omodoro horse mmɔ, ye mme chariot mmɔ, ye ke idem mbuaha owo emi edude enye ke esit; ndien mmɔ eyekabare edi iban: ofut omodoro ke ebiet unim ŋkpɔ esie, ndien eyebume mmɔ.

38Eyo ada ke mmɔŋ esie, ndien mmɔ esat: koro enye edide isɔŋ ndisɔi mbiet, ndem ndik mmɔ enyuŋ esin mmɔ edama idat.

39Mmɔdo mme unam desert eyeduŋ ye mme unam ntuaŋa, mme ostrich eyenyuŋ eduŋ ke esit: ndien owo ididuŋke aba enye ke nsi-nsi, idinyuŋ itiehe aba ke esit ke ofuri emana.

40Jehovah ɔdɔhɔ, ete, Kpa nte Abasi okosobode Sodom ye Gomorrah ye mbɔhiduŋ mmɔ, kpa ntre ke owo ididuŋke do, eyen owo idinyuŋ idaŋke ke esit.

41Sese, idut kiet oto ke edem edere edi; ndien akamba idut ye ikpɔ ndidem eyedemere ke mme utit ererimbot.

42Mmɔ eyemum utiga ye eduat: mmɔ edehe ide, idinyuŋ ituaha owo mbɔm: uyo mmɔ eyeyomo nte inyaŋ ibom, mmɔ eyenyuŋ edoro ke horse, etim idem nte owo ekɔŋ eŋwana ye afo,

43O adiaha Babylon. Edidem Babylon okokop etop mmɔ, ndien ubɔk emem enye, nnanenyin omum enye, ye ubiak kpa nte eke aŋwan uman.

44Sese, enye eyeto ke iseri Jordan nte lion, ɔdɔk aka ke iduŋ ata ɔkpɔsɔŋ: koro nyeyip enyin nnam enye oto ke esit efehe, ndien anie edi edimek owo eke ndinimde ke etubom esie? Koro anie ebiet mi? Anie edinyuŋ odori ini ɔnɔ mi? Anie owo onyuŋ edi ɔbɔk ufene eke edidade mi ke iso?

45Mbufo ekop ndien uduak Jehovah, emi enye aduakde abaŋa Babylon; ye mme ekikere esie emi enye ekerede abaŋa isɔŋ mme Chaldean: ata ŋkpɔ ufene iditreke ndiduri mmɔ ke usuŋ: mme iduŋ mmɔ eyekpa idem ebaŋa mmɔ.

46Uyo ete, “Emeda Babylon,” esin isɔŋ enyek, enyuŋ ekop eseme ke otu mme idut.