EZEKIEL 23 - Efik Old Bible With Sectional Headings

Nditɔ Eka Iba Ediɔkde Ido

1EDIKEM uyo Jehovah osim mi, ete,

2Eyen owo, iban iba, nditɔ eka kiet ekedu:

3ndien mmɔ ekenam use ke Egypt; ekenam use ke ini uyen mmɔ: do ke ekefik mmɔ eba, do ŋko ke ekenuak mmɔ eba uyen.

4Ndien enyiŋ mmɔ ekere Oholah, adiaha, ye Oholibah eyen eka esie: ndien mmɔ enyene mi, enyuŋ eman nditɔ-iren ye nditɔ-iban. Enyiŋ mmɔ etie ntem; Oholah edi Samaria, ndien Jerusalem edi Oholibah.

5Ekem Oholah anam use ke ini enye etiede ye ami; itɔŋ mmɔ emi emade enye, kpa nditɔ Assyria emi edide mbɔhiduŋ, onyuŋ ɔdɔŋ enye.

6Mmɔ esine purple ke idem, kpukpru mmɔ edi mme etubom ye mbɔŋ, ye ata ndiye mkparawa, mbon horse eke edorode mme horse.

7Ndien enye ada use esie ɔnɔ mmɔ; kpukpru mmɔ edi ndimek nditɔ Assyria; ndien kpukpru mmɔ emi itɔŋ mmɔ ɔdɔŋde enye esabare enye ke kpukpru ibɔk mmɔ.

8Enye inyuŋ ikpɔŋke use esie oro otode ke Egypt: koro mmɔ efiɔkde enye ke uyen esie, mmɔ oro enyuŋ enuak enye eba uyen, enyuŋ eŋwaŋa enye use mmɔ ke idem.

9Mmɔdo ndade enye nsin mme andima enye ke ubɔk, kpasuk ke ubɔk nditɔ Assyria, emi itɔŋ mmɔ ɔkɔdɔŋde enye.

10Mmɔ efuhɔre enye iferi: eda nditɔ-iren esie ye nditɔ-iban esie, enyuŋ ewot enye ke ofut: ndien enye akabare edi enyiŋ ke otu iban: ndien mmɔ enɔ enye ufen.

11Ekem adaŋemi Oholibah eyen-eka esie okutde, enye akabare ɔdɔk ke idiɔk itɔŋ esie akan enye eken, use esie onyuŋ akan use eyen-eka esie.

12Itɔŋ nditɔ Assysia ɔdɔŋ enye, mme etubom ye mbɔŋ, mbɔhiduŋ emi esinede ata uyai ke idem, mbon horse emi edorode horse, kpukpru mmɔ edi ata ndimek mkparawa.

13Ndien ŋkut nte enye edehede; mmɔ mbiba enyene ido kiet,

14ndien enye anam use esie awak aka iso: ndien enye okut nte ewetde owo ke ibibene, mbiet mme Chaldean emi ekewetde ke ididuot,

15ebɔbɔ mbɔbɔ ke isin, enyuŋ eyara ediduɔ ŋkpɔ ibuot, kpukpru mmɔ etie nte mme etubom mbon-ekɔŋ, ebiet nditɔ Babylon, emi Chaldea edide isɔŋ emana mmɔ.

16Ndien itɔŋ mmɔ ɔdɔŋ enye, ke ini enye okutde mmɔ ke enyin, ndien enye ɔdɔŋ mme isuŋutom ke ɔtɔ mmɔ ke Chaldea.

17Ndien nditɔ Babylon edi ke ebiet esie ediduk ke mbri ima, enyuŋ esabare enye ke use mmɔ; ntem ke mmɔ esabare enye, ndien itɔŋ mmɔ odorore enye ukpɔŋ.

18Ntem ke enye ayarare use esie, onyuŋ ɔfuhɔre use esie: ndien ukpɔŋ mi odorore enye, kpa nte ukpɔŋ mi okodororede eyen-eka esie.

19Ndien enye ɔdɔdiɔŋ anam ediwak use, onyuŋ eti usen uyen esie, emi enye akanamde use ke isɔŋ Egypt.

20Ndien itɔŋ mme ufan esie emi obukidem mmɔ edide obukidem nyara ass, nsene mmɔ onyuŋ edide nsene horse, ɔdɔŋ enye.

21Ntem ke afo akabare etiene oburobut ido uyen fo, ke ini nditɔ Egypt ekenuakde fi eba, ebaŋa ikpahesit uyen fo.

22Mmɔdo ntem ke Ɔbɔŋ Jehovah ɔdɔhɔ, ete, O Oholibah, sese, ami mmɔŋ ndemere mme andima fi, emi esit fo odororede mmɔ, nnɔ fi, nnyuŋ nda mmɔ ke ŋkan-ŋkutk ntiene fi;

23mmɔ edi nditɔ Babylon ye kpukpru mme Chaldean, Pekod, ye Shoa, ye Koa, kpukpru nditɔ Assyria ŋko; ndimek mkparawa eke owo amade, kpukpru mmɔ edi ikpɔ owo ye mbɔŋ, kpukpru mmɔ edi mme etubom mbon-ekɔŋ ye mme odoro horse eke enyenede etop.

24Ndien mmɔ eyeda ŋkpɔ ekɔŋ, ye chariot, ye wheel, ye akwa otu owo, etiene fi; mmɔ eyeda akamba otu-ekɔŋ ye ekpri ye ndun ukwak ekan fi ekuk eŋwana ekɔŋ: ndien nyeda ikpe nnim ke iso mmɔ, ndien mmɔ eyekpe ikpe ye afo, nte ekemde mme ikpe mmɔ.

25Ndien nyeda ufup mi nnam ikɔ ye afo, ndien mmɔ eyenam fi ŋkpɔ ke iyaresit: eyesibe fi ibuo ye utɔŋ efep; ndien nsuhɔ fo eyeduɔŋɔ ke ofut: mmɔ eyemen nditɔ-iren fo ye nditɔ-iban fo efep; enyuŋ eta nsuhɔ fo ke ikaŋ.

26Ndien mmɔ eyesio fi ɔfɔŋidem fo efep, enyuŋ esioŋo fi ŋkpɔ uyai fo efep.

27Ndien nyanam oburobut ido fo etre ke idem fo, nnam use fo emi otode isɔŋ Egypt etre, ndien afo udumenekede enyin fo use mmɔ, udunyuŋ utihi aba Egypt.

28Koro ntem ke Ɔbɔŋ Jehovah ɔdɔhɔ, ete, Sese, ami mmɔŋ nda fi nsin ke ubɔk mmɔ emi afo asuade, nsin ke ubɔk mmɔ emi esit fo odororede:

29ndien mmɔ eyenam fi usua-usua, enyuŋ ebɔ fi kpukpru utom fo, enyuŋ ekpɔŋ fi iferi ye ikpikpu: ndien eyeyarare iferi use fo, ye oburobut ido fo ye use fo.

30Nyenam fi ŋkpɔ emi, koro afo ebinede mme idut anam use, koro afo asabarede idem ke ibɔk mmɔ.

31Afo asaŋa ke usuŋ eyen-uka aŋwan; ndien mmɔŋ nda cup esie nsin fi ke ubɔk.

32Ntem ke Ɔbɔŋ Jehovah ɔdɔhɔ, ete, Afo eyeŋwɔŋ cup eyen-uka aŋwan emi ɔtuŋɔde onyuŋ aŋwaŋade: afo eyekabare edi ŋkpɔ nsahi ye esuene; enye oduk ediwak.

33Afo eyeyuhɔ mmin ke ubiak, cup mkpa-idem ye nditaha, cup eyen-uka Samaria.

34Afo eyenɔwɔŋ onyuŋ edei enye, ndien ata usiɔŋ esie, onyuŋ odibere eba idem fo efep: koro edi ami ndɔhɔ. Emi edi uyo Ɔbɔŋ Jehovah.

35Mmɔdo ntem ke Ɔbɔŋ Jehovah ɔdɔhɔ, ete, Koro afo efrede mi, onyuŋ emende mi ɔduɔk ke edem fo; afo ŋko enyene ndibiom oburobut ido fo ye use fo.

36Ndien Jehovah ɔdɔhɔ mi, ete, Eyen owo, nte afo eyekpe ikpe Oholah ye Oholibah? Wut mmɔ ndien mbubiam ido mmɔ;

37koro mmɔ esinde efibe, iyip onyuŋ eyerede mmɔ ke ubɔk, mmɔ enyuŋ esinde efibe ye ibɔk mmɔ; mmɔ enyuŋ eda nditɔ-iren mmɔ emi ekemande enɔ mi, esin ke ikaŋ enɔ mmɔ ete man eta mmɔ.

38Mmɔ enyuŋ enam mi ŋkpɔ emi ŋko: esabare ndisana ŋkpɔ mi ke usen oro, enyuŋ ebiat mme sabbath mi.

39Ndien ke ini mmɔ ema ekewot nditɔ-iren mmɔ enɔ ibɔk mmɔ, mmɔ edi ke edisana ufɔk mi ke kpasuk usen oro, edisabare enye; ndien, sese, ntem ke mmɔ enam ke ufɔt ufɔk mi.

40Ndien ŋko mmɔ edɔŋ ekekot owo emi etode ke anyan idut, emi ekedɔŋde isuŋ utom ke ɔtɔ mmɔ; ndien, sese, mmɔ edi: emi afo ekeyetde idem fo, onyuŋ eyet paint ke enyin fo, onyuŋ ada ŋkpɔ mbana abana idem, ɔnɔ mmɔ;

41afo onyuŋ etie ke bed ubɔŋ, okpokoro onyuŋ ɔdiɔhɔ enye ke iso, afo onyuŋ ada incense mi ye aran mi ɔdiɔk ke esit.

42Ndien uyo ata ediwak owo emi etiede ke ifure odu ke esit; ndien mmɔ eda mbon mmin ke wilderness edi, ekɔrɔ ye mmɔ eke etode ke mbio-obio; ndien esine mmɔ (iban oro) okpoho ubɔk ke ubɔk, enyuŋ eyara mmɔ ediye anyanya ke ibuot.

43Ndien ami ndɔhɔ akani esin-efibe, Nte mmɔ eyesin efibe ke emi ye enye, kpa enye?

44Ndien mmɔ eduk etiene enye, nte edukde etiene ŋwan use: ntem ke mmɔ etiene Oholah ye Oholibah, mme oburobut iban oro.

45Ndien ndinen owo eyekpe ikpe mmɔ nte ekemde ye ikpe iban use, ye ikpe iban eke eduɔkde iyip: koro mmɔ edide mme esin-efibe, iyip onyuŋ eyerede mmɔ ke ubɔk.

46Koro ntem ke Ɔbɔŋ Jehovah ɔdɔhɔ, ete, Nyeda akwa otu owo ndɔk ntiene mmɔ; nnyuŋ nnɔ mmɔ nte etuk mmɔ, enyuŋ enam mmɔ ŋkpɔ but.

47Ndien akwa otu owo eyetɔŋɔ mmɔ ke itiat, enyuŋ ekpi mmɔ ke ofut mmɔ; eyewot nditɔ-iren mmɔ, ye nditɔ-iban mmɔ, enyuŋ efɔp ufɔk mmɔ ke ikaŋ.

48Ntem ke ndinam oburobut ido etre ke isɔŋ, man eteme kpukpru iban, ete ekunam ke oburobut ido mbufo.

49Ndien mmɔ eyeda oburobut ido mbufo edori mbufo ke idem, mbufo eyenyuŋ ebiom mme idiɔk ŋkpɔ mbufo, ndien mbufo eyefiɔk ete ke ami ndi Ɔbɔŋ Jehovah.