JUDGES 3 - Efik Old Bible With Sectional Headings

Mme Idut Emi Ekesuhɔde Ke Isɔŋ Udeme Nditɔ Israel

1NDIEN edi mme idut emi ke Jehovah akayak, ete ida mmɔ idomo Israel, kpa kpukpru mmɔ eke mikefiɔkke kpukpru ekɔŋ Canaan;

2man mme emana nditɔ Israel edi edifiɔk, man enyuŋ eteme mmɔ ekɔŋ, kpa mmɔ eke mikebemke iso ifiɔk enye;

3mbɔŋ mme Philistine ition, ye kpukpru mme Canaanite, ye mme Zidonian, ye mme Hivite emi eduŋde ke obot Lebanon, ɔtɔŋɔde ke obot Baal-hermon tutu osim ke ebiet uduk Hamath.

4Ndien mmɔ edi se edade edomo nditɔ Israel, man efiɔk mme eyenim ibet Jehovah, emi enye eketemede mme ete mmɔ ke ubɔk Moses.

5Ntre ke nditɔ Israel eduŋ ke otu mme Canaanite, ye mme Hittite, ye mme Amorite, ye mme Perizzite, ye mme Hivite, ye mme Jebusite;

6ndien mmɔ eda nditɔ-iban mmɔ ke idem mmɔ edɔ, enyuŋ eda nditɔ-iban idem mmɔ enɔ nditɔ mmɔ, enyuŋ enim ido ndem mmɔ.

7Ndien nditɔ Israel enam idiɔk ke enyin Jehovah, enyuŋ efre Jehovah Abasi mmɔ, enyuŋ enam ido Baalim ye eke Ashtaroth.

8Ndien Jehovah ayat esit ye Israel, onyuŋ ada mmɔ anyam esin ke ubɔk Cushan-rishathaim, edidem Mesopotamia: ndien nditɔ Israel enam ŋkpɔ Cushan-rishathaim ke isua itiaita. Ekem,

9adaŋemi nditɔ Israel esemede enɔ Jehovah, Jehovah edemere andinyaŋa ɔnɔ nditɔ Israel, eke anyaŋade mmɔ, kpa Othniel eyen Kenaz, ekpri eyen ete Caleb.

10Ndien spirit Jehovah edidoro enye ke idem, ndien enye ekpe ikpe Israel, onyuŋ ɔwɔrɔ aka ekɔŋ, ndien Jehovah emen Cushan-rishathiam edidem Mesopotamia esin enye ke ubɔk: ubɔk esie onyuŋ ɔsɔŋɔ akan Cushan-rishathaim.

11Ntre ke isɔŋ ana suŋ ke ofuri isua aba. Ekem Othniel eyen Kenaz akpa.

12Ndien nditɔ Israel etɔŋɔ ntak enam idiɔk ke iso Jehovah: ndien Jehovah ɔsɔŋ Eglon edidem Moab ubɔk ndikan Israel: koro mmɔ ekenamde idiɔk ke iso Jehovah.

13Ndien enye osop nditɔ Ammon ye Amalek adian ke idem, ndien aka akasuan Israel, ndien mmɔ eda obio eyop enyene.

14Ntre ke nditɔ Israel enam ŋkpɔ enɔ Eglon edidem Moab ke ofuri isua efureta.

15Ekem adaŋemi nditɔ Israel esemede enɔ Jehovah, Jehovah edemere andiyaŋa kiet ɔnɔ mmɔ, kpa Ehud eyen Gera, eyen Benjamin kiet, owo ufien: ndien nditɔ Israel esin enye enɔ ke ubɔk, ete enye ada ɔsɔk Eglon edidem Moab.

16Ndien Ehud anam ikwa iso iba ɔnɔ idem esie, emi uniɔŋ esie edide ibio idomo-okuk kiet; ndien ada enye etebe ke idak ɔfɔŋidem esie ke ifuhi nnasia.

17Ndien enye emen enɔ oro ɔsɔk Eglon edidem Moab: ndien Eglon edi owo ubom eti-eti.

18Ekem adaŋemi enye ama ɔkɔnɔ enɔ oro ama, enye ada mme mmɔ emi ekebiomde enɔ akayak.

19Ndien enye akabare ke ɔtɔ usɔi-itiat emi odude ke Gilgal, afiak edidɔhɔ ete, Mmenyene ikɔ owo iba eke ndɔhɔde fi, O edidem. Ndien enye ete, Dop. Ndien kpukpru owo eke edude ye enye ewɔŋɔ ekpɔŋ enye.

20Ekem Ehud etiene enye; ndien enye etie ke ubet usuhɔ-idem emi enye enyenede ke idem esie ikpɔŋ. Ndien Ehud ete, Mmenyene ikɔ Abasi eke ndɔhɔde fi.

21Ndien enye adaha ke itie esie ada. Ndien Ehud anyan ubɔk ufien esie osio ikwa ke ifuhi nnasia esie, ndien onuk esin enye ke idibi;

22ndien ito etiene idem ikwa oduk; ikpɔŋ onyuŋ omum idem ikwa, iyakke enye osio enye ikwa ke idibi efep; ndien enye (ikwa) ɔwɔrɔ enye ke asaha-edem.

23Ndien Ehud ɔwɔrɔ ke etehe, esin usuŋ ubet abaha enye, ɔkɔbi.

24Adaŋemi enye ɔwɔrɔde, ikɔt esie (Eglon) edi edise; ndien, sese, ekekɔbi usuŋ ubet, ndien mmɔ edɔhɔ, ete, Mme enye ke ofuk ukot esie ke ubet usuhɔ-idem.

25Ndien mmɔ ebet tutu but anam mmɔ: ndien, sese, enye isioho usuŋ ubet; ndien mmɔ eda ukpɔhɔre ekpɔhɔre usuŋ: ndien sese, ete mmɔ ɔduɔ ana ke isɔŋ akpa.

26Edi Ehud ɔbɔhɔ ke ini mmɔ ebigide, onyuŋ ebe ɔtɔ usɔi-itiat, ndien ɔbɔhɔ okosim Seirah.

27Edikem adaŋemi enye edide, enye ofuri ukorowo ke obot Ephraim, ndien nditɔ Israel etiene enye eto ke obot esuhɔre, enye onyuŋ ebem mmɔ iso.

28Ndien enye ɔdɔhɔ mmɔ, ete, Mbufo etiene mi ke edem: koro Jehovah adade mme asua mbufo Moab esin mbufo ke ubɔk. Ndien mmɔ etiene enye esuhɔre ekeda mme ebiet ube Jordan emi esede Moab, ndien iyakke owo ndomo kiet ebe.

29Ndien mmɔ ewot Moab tɔsin owo duop ke usen oro, kpukpru edi mbon ubom, kpukpru enyuŋ edi mbon uko; baba owo kiet inyuŋ ibɔhɔke.

30Ndien Moab osuk idem ke usen oro esine ke idak ubɔk Israel. Ndien isɔŋ onyuŋ ana suŋ ke ofuri isua anaŋ.

31Ndien Shamgar eyen Anath, etiene enye edem odu, ndien enye ada eto-ukim enaŋ owot mme Philistine owo ikie itiokiet: enye onyuŋ aŋyaŋa Israel ŋko.