EZEKIEL 7 - Efik Old Bible With Sectional Headings

Nsobo Emi Edidede Ekpere

1EKEM uyo Jehovah osim mi, ete,

2Ndien afo ŋko eyen owo, ntem ke Ɔbɔŋ Jehovah ɔdɔhɔ isɔŋ Israel, ete,

3Utit, ata utit emedi ke edem isɔŋ mbinaŋ. Ke emi utit omosim fi, ndien nyedɔŋ iyaresit mi etiene fi, nnyuŋ ŋkpe ikpe ye afo, nte asaŋade ye ido fo; nnyuŋ mmen kpukpru mbubiam fo ndori fi ke idem.

4Ndien enyin mi idituaha fi mbɔm, ndinyuŋ nyakke koro mmende usuŋ fo ndori fi ke idem; mbubiam fo eyenyuŋ odu ke ufɔt fo: ndien mbufo eyefiɔk ete ke ami ndi Jehovah.

5Ntem ke ɔbɔŋ Jehovah ɔdɔhɔ, ete,

6Idiɔk-ŋkpɔ, idiɔk-ŋkpɔ kierakiet, sese, emedi, utit emedi, utit emedi; emedemere ebet fi, sese, emedi.

7Usenubɔk omosim fi, O andiduŋ isɔŋ: ini emedi; usen ndutime emekpere: ndien idige mkpo ikpɔ obot.

8Ke emi ndibigike, nyeŋwaŋa fi ifuresit mi ke idem, nnyuŋ mma fi iyaresit mi ke idem; nnyuŋ ŋkpe ikpe ye afo nte asaŋade ye usuŋ fo; nnyuŋ nda ofuri mbubiam fo ndori fi ke idem.

9Enyin mi idinyuŋ ituaha fi mbɔm, ndinyuŋ nyakke: nyenɔ fi nte ekemde ye usuŋ fo; ŋkpɔ mbubiam fo eye-nyuŋ edu ke ufɔt fo; ndien mbufo eyefiɔk ete ke edi ami Jehovah mmia.

10Se usen: sese, emedi: usiere ɔmɔwɔrɔ: eto emesehe: iseri amasiaha ikɔŋ.

11Ŋkanubɔk ɔmɔkɔri edi eto idiɔk ŋkpɔ: baba owo mmɔ kiet iduhe, baba owo otu mmɔ kiet, baba inyene mmɔ, baba mkpo inyuŋ iduhe ke otu mmɔ.

12Ini emedi usen emekpere: owo eke edepde ididatke esit; owo eke anyamde idinyuŋ ituaha: koro ifuresit odorode ofuri otu owo esie.

13Koro owo eke anyamde ŋkpɔ midifiakke ibɔ se enyamde, okposuk edi nte mmɔ edude ke otu mme odu-uwem: koro ŋkukut abaŋade ofuri otu esie, owo idifiakke; baba owo kiet idinyuŋ isɔŋke itɔŋ uwem esie ke idiɔk ido esie.

14Mmɔ efuri ukorowo enyuŋ enam kpukpru ŋkpɔ ebeŋe; edi baba owo kiet ikaha ekɔŋ: koro ifuresit mi odorode ofuri otu mmɔ ke idem.

15Ofut odu ke esien, udɔŋɔ ye biɔŋ enyuŋ edu ke esit ufɔk: owo eke odude ke iŋwaŋ eyekpa ke ofut; biɔŋ ye idiɔk udɔŋɔ eyenyuŋ eta mmɔ eke edude ke obio.

16Ndien mbon itɔk mmɔ eyebɔhɔ; enyuŋ edu ke ikpɔ obot ebiet mme ibiom itihere; kpukpru mmɔ eseme, owo kiet kiet ke idiɔk ido mmɔ.

17Kpukpru ubɔk eyemem, kpukpru edɔŋ eyesaŋa nte mmɔŋ.

18Mmɔ eyebɔbɔ ɔfɔŋ idet ke idem; ndik eyenyuŋ ofuk mmɔ ke idem; but eyenyuŋ ofuk mmɔ kpukpru iso: ibɔ eyenyuŋ odu mmɔ kpukpru ke ibuot.

19Mmɔ eyemen silver mmɔ eduɔk ke esien; gold mmɔ eyenyuŋ akabare edi ndek: silver mmɔ ye gold mmɔ idikemeke ndinyaŋa mmɔ ke usen ifuresit Jehovah: mmɔ idiyuhɔke ukpɔŋ mmɔ, ŋkpɔ idinyuŋ iyɔhɔke mmɔ ke idibi: koro enye edide ŋkpɔ iduɔ idiɔk ido mmɔ.

20Enye onyuŋ onim ediye mbana esie ke iseri: mmɔ enyuŋ enam mbiet mbubiam ŋkpɔ mmɔ, ye ŋkpɔ ndek mmɔ ke esit: oro esin ami nnim enye ke ndek nnɔ mmɔ.

21Mmonyuŋ nda enye nsin ke ubɔk esen owo ke mbume; ke ubɔk mme idiɔk owo ererimbot ke ŋkpɔ ŋwo; ndien mmɔ eyesabare enye.

22Nyenyuŋ ŋkabare iso mi ŋkpɔŋ mmɔ: ndien mmɔ eyesabare ndibe ebiet mi: mbon afai eyenyuŋ eduk ke esit, enyuŋ esabare enye.

23Nam ŋkpɔkɔbi: koro ikpe obom ɔyɔhɔde ke isɔŋ, afai onyuŋ ɔyɔhɔ ke obio.

24Ndien nyeda ata mme idiɔk idut ndi: ndien mmɔ eyeda ufɔk mbufo enyene: nyenyuŋ ndop mkpɔsɔŋ owo iseri; ndien eyesabare ndisana ebiet mmɔ.

25Nsobo emedi; ndien mmɔ eyeyom emem, edi iduhe.

26Idiɔk eyetiene idiɔk; etop eyenyuŋ ɔkɔrɔ ke etop; ndien mmɔ eyeyom ŋkukut prophet: ewuhɔ oku eyenyuŋ atak, ye item mbio-owo.

27Edidem eyetua, ɔbɔŋ eyeda mkpa-idem esine, ubɔk eyenyuŋ etimere mbio-obio: nyenam mmɔ nte ekemde ye usuŋ mmɔ, nnyuŋ nda ikpe mmɔ ŋkpe ye mmɔ: ndien mmɔ eyefiɔk ete ke ami ndi Jehovah.