MATTHEW 24 - Efik Old Bible With Sectional Headings

Jesus Etiŋ Abaŋa Se Editibede ke Ukperedem Ini(Mk 13.1-23; Lk 21.5-24)

1EKEM Jesus ɔwɔrɔ ke temple aka Esiemɔ ndien mbet Esie etiene Enye, ete iwut Enye mme ufɔk temple.

2Edi Enye ɔbɔrɔ mmɔ ete, Nte mbufo ikwe kpukpru ŋkpɔ emi? Ke akpanikɔ ke ndɔhɔ mbufo, Idikpɔŋke itiat kiet ke enyɔŋ itiat efen eke mididorokere enye iduɔk.

3Edi nte Enye etiede ke Obot Olive, mbet Esie etiene Enye ke idem mmɔ, ete, Sian nnyin ini eke mme ŋkpɔ emi edidide; nso idinyuŋ idi idiɔŋɔ eridi Fo, ye eke akpatre ini eyo emi?

4Ndien Jesus ɔbɔrɔ mmɔ ete, Ekpeme mbak owo baba kiet ididaha mbufo iwaha ikpɔŋ usuŋ.

5Koro ediwak owo eyedi ke enyiŋ Mi, ete, Ami ndi Christ: eyenyuŋ eda ediwak owo ewaha ekpɔŋ usuŋ.

6Mbufo eyenyuŋ ekop ebaŋa ekɔŋ ye etop ekɔŋ; ekpeme ekutimere esit; koro mme ŋkpɔ emi enyene ndiwɔrɔ; edi idige utit kaŋa.

7Koro idut eyedaha aŋwana ye idut, obio edidem kiet enyeyuŋ adaha aŋwana ye obio edidem efen: akaŋ ye unyek-isɔŋ eyenyuŋ edu ke nsio-nsio ebiet.

8Kpukpru ŋkpɔ emi edi ntɔŋɔ ubiak -uman.

9Ke ini oro ke eyeda mbufo eyak enɔ ukut, enyuŋ ewot mbufo: kpukpru mme idut eyenyuŋ esua mbufo kabaŋa enyiŋ Mi.

10Ekem ediwak owo eyeduɔ, eyenyuŋ eda kiet eken enɔ, eyeyuŋ esua kiet eken.

11Ndien ediwak prophet nsu eyedaha eda enam ediwak owo ewaha ekpɔŋ usuŋ.

12Ndien sia mme ukwaŋido editɔtde, ima ediwak owo eyesuhɔ.

13Edi eyenyaŋa owo eke edimede ime tutu osim akpatre.

14Eyenyuŋ ekwɔrɔ gospel Ubɔŋ Abasi emi ke ofuri ekondo nte ntiense enɔ kpukpru mme idut, ndien adaŋoro ke utit eyedi.

15 Mmɔdo ke adaŋemi mbufo edikutde ŋkpɔ mbubiam nsobo, emi prophet Daniel eketiŋde abaŋa, nte adade ke edisana ebiet (yak enye eke okotde ŋwed otim ɔfiɔk),

16adaŋoro yak mmɔ eke edude ke Judaea efeŋe eka ikpɔ obot;

17yak owo eke odude ke enyɔŋ ufɔk okusuhɔre okosio ŋkpɔ eke edude ke ufɔk esie:

18yak owo eke edude ke iŋwaŋ ŋko okufiak edem ekemen ekura esie.

19Edi mbɔm mmɔ emi eyomode, ye mmɔ emi enɔde nditɔ eba ke mme usen oro.

20Edi mbufo ekpe ubɔk ete, itɔk mme imɔ okudi ke ini ukwɔ mme ke sabbath:

21koro ke ini oro akwa ukut eyedu, oruk eke akanam miduhe toto ke eritɔŋɔ ererimbot tutu osim emi, eke midinyuŋ iduhe aba.

22Ndien ke mikpesibeke mme usen oro emuhɔ, baba owo kiet ikpɔbɔhɔke; edi kabaŋa ndimek ikɔt Abasi eyesibe mme usen oro emuhɔ.

23Ekem owo ekededi ama ɔdɔhɔ mbufo, ete, Sese, Christ mmɔmi, mme, Enye mmɔmi; ekunim ke akpanikɔ.

24Koro mme christ nsu ye mme prophet nsu eyedaha eda, enyuŋ ewut ikpɔ mme idiɔŋɔ ye mme utibe-ŋkpɔ man, edieke mmɔ ekpekemede, eda ndimek ikɔt Abasi ewaha ekpɔŋ usuŋ.

25Sese, mmebem iso ntiŋ nnɔ mbufo do.

26Mmɔdo edieke mmɔ edɔhɔde mbufo ete, Sese, Enye odu ke desert; ekuwɔrɔ eka: Sese, Enye odu ke ubet; ekunim ke akpanikɔ.

27Koro nte emireŋ-mireŋ otode ke edem usiaha-utin ɔwɔrɔ ayama osim edem usop-utin, ntre ke eridi Eyen Owo eyedi.

28Ɔtɔ nte okpo odude, do ke mme utere edibono.

29 Edi ukut mme usen oro ama ekebe, idaha oro utin eyekabare okim, ɔfiɔŋ idinyuŋ inɔŋɔ uŋwana esie, mme ntantafiɔŋ eyeyuŋ eto ke ikpa-enyɔŋ eduɔŋɔ, eyenuŋ enyeŋe mme odudu ikpa-enyɔŋ.

30Adaŋoro ke idiɔŋɔ Eyen Owo eyewut idem ke enyɔŋ: adaŋoro ke kpukpru mme idut isɔŋ eyenyuŋ efuhɔ, mmɔ eyeyuŋ ekut Eyen Owo odorode ke obubit enyɔŋ edi ye odudu ye akwa ubɔŋ.

31Ndien Enye eyesio mme angel Esie ɔdɔŋ ye akwa uyom ukorowo, mmɔ eyenyuŋ etaŋ ndimek ikɔt Esie ke ikpehe ofim mbinaŋ ebon ɔtɔ kiet, ɔtɔŋɔde ke utit heaven kiet tutu osim eken.

32 Edi ekpep ŋke ke eto fig: ke ini ŋkɔk esie ama akabare esehe, onyuŋ asiahade ikɔŋ, mbufo efiɔk ete ndaeyo ke ekpere;

33kpasuk ntre mbufo ŋko, ke ini ekutde kpukpru ŋkpɔ emi, efiɔk ete Enye ke ekpere, odu ke enyin-usuŋ.

34Ke akpanikɔ ke ndɔhɔ mbufo, Emana emi idibehe ifep tutu kpukpru ŋkpɔ emi ewɔrɔ esu.

35Enyɔŋ ye isɔŋ eyebe efep, edi ikɔ Mi idibehe ifep.

36Edi baba owo kiet ifiɔkke ibaŋa usen oro mme hour oro, kpa mme angel ke heaven, Eyen inyuŋ ifiɔkke, ke mibɔhɔke Ete ikpɔŋ.

37Koro nte mme usen Noah ekedide, kpasuk ntre ke eridi Eyen Owo eyenyuŋ edi.

38Koro nte mmɔ ediade enyuŋ eŋwɔŋde ŋkpɔ, edɔde ndɔ enyuŋ edade owo enɔ ndɔ ke mme usen eke ekebemde ukwɔ iso, tutu osim usen emi Noah odukde ke ubom,

39minyuŋ ifiɔkke tutu ukwɔ edi edimen mmɔ kpukpru efep; kpasuk ntre ke eridi Eyen Owo eyedi.

40Ke ini oro owo iba eyedu ke iŋwaŋ; eyeda kiet, ekpɔŋ kiet;

41iban iba eyekɔk ŋkpɔ ke itiat ukɔk-ibokpot; eyeda kiet, ekpɔŋ kiet.

42Ekpeme ndien: koro mbufo mifiɔkke usen eke Ɔbɔŋ mbufo edide

43Edi efiɔk emi, ete, edieke enyene-ufɔk ɔkpɔfiɔkde ini eke inɔ edide, enye ekpekpeme, ikponyuŋ iyakke ebuŋ ufɔk esie eduk.

44Mmɔdo mbufo nde ebeŋe idem; koro ke ini eke mbufo midorike enyin, Eyen Owo eyedi.

45Anie ndien edi asaŋutom emi anamde akpanikɔ, onyuŋ enyenede ɔniɔŋ, emi ete esie okonimde ete, akara mbon ufɔk imɔ, onyuŋ ɔnɔ mmɔ udia ke edikem ini?

46Ɔfɔfɔn ɔnɔ asaŋutom oro ete-ufɔk esie edidide okut enye anamde ntre.

47Ke akpanikɔ ke ndɔhɔ mbufo nte, ete-ufɔk esie eyenam enye edi andikara kpukpru se enye enyenede.

48Edi edieke idiɔk asaŋutom oro edidɔhɔde ke esit esie ete, Ete mi ebigi edidi;

49edinyuŋ ɔtɔŋɔde ndimia ekemɔ mme asaŋutom esie, edinyuŋ adiade onyuŋ oŋwɔŋde ye mbon mmin;

50ete-ufɔk owo oro eyedi ke usen eke enye midorike enyin, ye ke hour eke enye mifiɔkke,

51eyenyuŋ amia enye akamba ufen, onyuŋ ɔnɔ enye udeme ye mbon mbubik: do ke eritua eyet ye erita edet eyedu.