1Oh, mbufo kpukpru emi itɔŋ asatde, edi ke mmɔŋ! ye owo eke minyeneke okuk! mbufo edi edep enyuŋ edia! enyuŋ edi edep wine ye mmɔŋ-eba, idige ke okuk, inyuŋ idige ke ekɔm-urua.
2Nsinam mbufo edomode silver enɔ ke se midige uyo? ye utom mbufo ke se miyuhɔke? Etim ekop uyo mi, enyuŋ edia se ifɔnde, yak ukpɔŋ mbufo onyuŋ enem esit ke isek.
3Mbufo ekpaŋ utɔŋ mbufo, enyuŋ edi etiene mi: ekop, ndien ukpɔŋ mbufo eyedu uwem; ndien nyenam nsinsi ediomi ye mbufo, kpa ŋkpɔ ima David eke edide akpanikɔ.
4Sese, mmonim enye ke ntiense mme idut, ɔbɔŋ ye etubom mme idut.
5Sese, afo eyekot idut eke mufiɔkke, ndien idut eke mifiɔkke fi eyefehe ebine fi, abaŋa Jehovah ye Edisana Abasi Israel: koro enye ɔnɔde fi ubɔŋ.
6Mbufo eyom Jehovah, ke ini ekemede ndikut enye, eseme ekot enye, ke ini enye ekperede:
7yak idiɔk owo ɔkpɔŋ usuŋ esie, yak oburobut owo ɔkpɔŋ ekikere esie: onyuŋ afiak etiene Jehovah: ndien enye eyetua enye mbɔm; etiene Abasi nnyin, koro Enye eyewak ndidahado.
8Koro mme ekikere mbufo midige mme ekikere mi, mme usuŋ mbufo minyuŋ idige usuŋ mi: emi edi uyo Jehovah.
9Koro kpa nte enyɔŋ okoŋde akan isɔŋ, kpa ntre ke mme usuŋ mi ekoŋ ekan mme usuŋ mbufo, mme ekikere mi enyuŋ ekoŋ akan mme ekikere mbufo.
10Koro kpa nte edim ye snow etode ke enyɔŋ esuhɔre, ndien ifiakke ika do, tutu ebit isɔŋ, enyuŋ enam enye afiari onyuŋ otibe, enyuŋ eda mkpasip enɔ andisuan, eda udia enɔ andidia:
11kpa ntre ke ikɔ mi emi ɔwɔrɔde mi ke inua editie: idifiakke itiene mi ubɔk-ubɔk, tutu enye anam se mmade, onyuŋ okut unen ke utom emi ndɔŋde enye.
12Koro mbufo eyeda idara ewɔŋɔ, owo eyenyuŋ eda mbufo usuŋ ke emem: ikpɔ obot ye ŋkpri eyebumere ekwɔ ke iso mbufo, kpukpru eto akai eyenyuŋ ekwak ubɔk.
13Cypress eyetibe ke itie akpap, myrtle eyetibe ke itie ŋkukim: ndien eyedi ke eke enyiŋ Jehovah, ye ke nsinsi idiɔŋɔ eke midisibeke ifep.
Who We AreWhat We EelieveWhat We Do
2025 by iamachristian.org,Inc All rights reserved.
