DEUTERONOMY 21 - Efik Old Bible With Sectional Headings

Ikpe Uwot Owo Emi Owo Midiɔŋɔke Andiwot

1KE adaŋemi edikutde okpo owo eke akpade afai ke isɔŋ emi Jehovah Abasi fo ɔnɔde fi, ete ada enye enyene, nte enye anade ke ikɔt, ndien mifiɔkke owo emi okowotde enye:

2ndien yak mbiowo fo ye mme ebierikpe fo ewɔrɔ, eka ekedomo esim obio eke ekande owo oro akpade afai ekuk.

3Ndien ama ekem, obio eke ekperede owo oro akpade afai, kpa mbiowo obio oro eyeda abak unam enaŋ, eke owo mikadaha enye inam ŋkpɔ, eke mika-inyuŋ idudike ke ɔkpɔnɔ;

4ndien yak mbiowo oro eda uman enaŋ oro esuhɔre ke ebedeŋ eke enyenede idim, eke owo mifuŋke isɔŋ, minyuŋ itɔhɔ ŋkpɔ, ndien eyɔk enaŋ oro itɔŋ ke idim:

5ndien yak mme oku, nditɔ Levi, esaŋa ekpere: koro Jehovah Abasi fo ama emek mmɔ ndinam ŋkpɔ esie, nnyuŋ nda enyiŋ Jehovah ndiɔŋ owo; ndien kpukpru ikpe ye kpukpru ufene eyenyuŋ esaŋa ke uyo mmɔ:

6ndien yak kpukpru mbiowo obio eke ekperede owo oro akpade afai, eyet ubɔk mmɔ ke enyɔŋ enaŋ emi eyɔkde enye itɔŋ ke idim oro:

7ndien yak mmɔ ebɔrɔ, ete, Idige ubɔk nnyin ɔkɔduɔk iyip emi, enyin nnyin ikonyuŋ ikwe:

8Dahado nɔ ikɔt fo Israel, emi afo, O Jehovah akafakde; kunyuŋ uda iyip owo emi miduehe isop udori ikɔt fo Israel. Ndien eyedahado ke iyip oro enɔ mmɔ.

9Ntem ke afo edisio iyip owo eke miduehe isop ke otu fo efep, ke ini afo anamde se inende ke iso Jehovah.

10Ke adaŋemi afo ediwɔrɔde aka ekɔŋ ye mme asua fo, Jehovah Abasi fo onyuŋ adade mmɔ esin fi ke ubɔk afo onyuŋ omum mbuot-ekɔŋ;

11onyuŋ okut ediye ŋwan kiet ke otu mbuot-ekɔŋ oro, onyuŋ ama enye onyuŋ ada enye ɔdɔ:

12ndien da enye duk ke ufɔk fo: yak enye onyuŋ okporo idet esie, onyuŋ afat mbara esie;

13ndien yak enye osio ɔfɔŋ-idem eke enye esinede ke ini ekemumde enye, efep ke idem esie, onyuŋ etie ke ufɔk fo, onyuŋ atua ete esie ye eka esie ke ɔfiɔŋ kiet: ndien tiene enye, nyuŋ di ebe esie enye onyuŋ edi ŋwan fo.

14Ndien ama ekem, edieke enye minemke fi esit, yak enye aka ke ebiet eke enye amade; edi kunyam enye ubɔ okuk, kunyuŋ unyik enye: koro afo asabarede enye.

15Ke owo edinyene iban iba, kiet ŋwan ima, kiet eken ŋko eke usua, ndien mmɔ ema eman nditɔ enɔ enye, ŋwan ima, ye ŋwan usua; ndien akpan edi eyen aŋwan usua:

16ndien ama ekem, ke usen eke enye edidemede inyene esie ɔnɔ nditɔ esie, enye okunim eyen aŋwan ima ke itie akpan ɔkpɔŋ eyen aŋwan usua eke edide ata akpan:

17edi yak enye ɔdiɔŋɔ eyen aŋwan usua ke akpan, ke erinɔ enye udeme kpukpru inyene esie mbiba: koro enye edide akpa odude esie; itie akpan enyene enye.

18Ke ini owo edinyenede eyen itun ye eke usɔŋ-enyin, eke mikopke ete esie ye eka esie uyo, ndien mmɔ ema enyuŋ enɔ enye ufen, edi enye mikopke uyo mmɔ:

19ndien yak ete esie ye eka esie emum enye ɔwɔrɔ, eda esɔk mbiowo obio mmɔ, ke enyin-usuŋ ebiet mmɔ;

20ndien yak mmɔ edɔhɔ ye mbiowo obio mmɔ, ete, Eyen nnyin emi edi itun, onyuŋ ɔsɔŋɔ enyin, ikopke uyo nnyin; enye edi owo ndion ye owo mmin.

21Ndien yak kpukpru mbio-obio mmɔ etɔŋɔ enye ke itiat ewot. Ntem ke afo edisio idiɔk ke otu fo efep; ndien ofuri Israel eyekop, enyuŋ edikhe.

22Ke adaŋemi owo ediduede isop mkpa, ndien mmɔ eka ndiwot enye, afo ama onyuŋ eyiri enye ke eto:

23kuyak okpo esie adaŋ ke eto ofuri okoneyo, kunyuŋ utre ndibuk enye kpa usen oro: koro se eyiride edi ŋkpɔ isuŋi Abasi; kubiat ndien isɔŋ fo emi Jehovah Abasi fo ɔnɔde fi ke udeme.