1 PETER 2 - Efik Old Bible With Sectional Headings

Odu-Uwem Itiat ye Idut Emi Abasi Emekde

1MMƆDO eduɔŋɔ kpukpru udu, ye kpukpru ŋkari, ye mbubik, ye ufup, ye kpukpru idiɔk ibaŋa;

2nte nsek-nditɔ, eyom ata mmɔŋ-eba Spirit, man mbufo eda enye ekɔri esim erinyaŋa,

3edieke mbufo ema eketabi efiɔk ete Ɔbɔŋ ɔfɔn ido.

4Mbufo ema enyuŋ etiene Enye, emi edide odu-uwem Itiat, emi mme owo ekesinde, edi Abasi ekemekde, onyuŋ abatde ke ŋkpɔ uto,

5eyeda mbufo nde, nte mme odu-uwem itiat, ebɔp esin ke ufɔk eke spirit, enyuŋ enam mbufo edi ndisana oku, ndiwa uwa spirit, eke Abasi adarade ndibɔ oto ke Jesus Christ.

6Koro ewet ntem ke Ŋwed Abasi, ete,

Sese, mmonim akwa Itiat ke Zion, Edimek Itiat, ɔsɔŋ-urua Itiat inuk;

Owo eke ɔbuɔtde idem ye Enye ididiaha but.

7Enye ɔsɔŋ urua ke enyin mbufo emi ebuɔtde idem ye Enye; edi ama edi mmɔ emi mibuɔtke idem ye Enye,

Itiat emi mme ɔbuɔp-ufɔk ekesinde

Amakabare edi Etubom inuk;

8Ye,

Itiat utuaha ye akwa itiat eke esinde owo eduɔŋɔ.

Mmɔ etuak ukot, koro mmɔ misukke ibuot inɔ ikɔ Abasi; oro onyuŋ edi se inade inɔ mmɔ.

9Edi mbufo edi ubon eke emekde; edi mme oku edidem, edi edisana obio, edi ikɔt eke Abasi onimde ɔnɔ Idem Esie, man mbufo eka ekataŋa mme utibe erinam Esie, emi okokotde mbufo osio ke ekim, esin ke utibe uŋwana esie;

10mbufo, emi mikedige ikɔt baba ete kiet ke eyo oko, eyedi ikɔt Abasi ke emi; emi mikatuaha mbufo mbɔm, edi ke emi ema etua mbufo mbɔm.

11Ndima mi, mmebeŋe mbufo nte oduduŋ ye mbon isaŋ, nte, edianare ekpɔŋ idiɔk udɔŋ obukidem, emi eŋwanade ye ukpɔŋ owo.

12Ekama idem nte odotde ke iso mme Gentile, man ke nde eke mmɔ etiŋde ŋkpɔ ebiat mbufo ete edi mme anam-idiɔk, mmɔ ekpada nti ido mbufo, emi edikutde ke ini eke edide ndidomo mbufo nse, enɔ Abasi ubɔŋ.

13Esuk idem enɔ kpukpru idaha eke enimde ke otu owo kabaŋa Ɔbɔŋ; enɔ edidem nte andikara kpukpru owo;

14ye mbɔŋ eken, nte mmɔ emi enye osiode ɔdɔŋ, ete enɔ mme anam-idiɔk usiene, enyuŋ enɔ mme anam nti ŋkpɔ itoro.

15Koro Abasi aduak ntem ete, mbufo eda nti ido ekibi inua mbon ndisime, eke mifiɔkke se mmɔ etiŋde.

16Edu uwem nte mmɔ emi enyenede unen ke idem mmɔ, edi ekusaŋa ke unen oro efuk udu, edi esaŋa nte ifin Abasi.

17Ekpono kpukpru owo. Ema nditɔ-ete. Eteŋe Abasi. Ekpono edidem.

18Nditɔ-ufɔk, esuk idem enɔ mme ete ufɔk mbufo ke ata ndik; idige enɔ mmɔ emi efɔnde ido enyuŋ etiede suŋ-suŋ ikpɔŋ, edi enɔ mmɔ emi ekwaŋade ido ŋko.

19Koro edi se inemde Abasi esit, edieke owo obiomde ndutuhɔ onyuŋ ɔbɔde ufen eke midotke, kabaŋa erifiɔk eke enye ɔfiɔkde Abasi.

20Nso ukpono odu do, edieke mbufo emede ime ke ini esɔŋde ido ye mbufo ke eridue ndudue? Edi edieke mbufo emede ime ke ini ekutde ndutuhɔ ke erinam nti ŋkpɔ, oro edi se inemde Abasi esit.

21Ekekot mbufo ete edinam oro; koro Christ ke Idem Esie ama okut ndutuhɔ kabaŋa mbufo, onyuŋ ɔkpɔŋ uwut-ŋkpɔ ɔnɔ mbufo, ete, mbufo ekpetiene esaŋa ke nde ikpat Imɔ.

22Enye ikanamke idiɔk-ŋkpɔ, akanam inyuŋ ikwe Enye abiaŋa ke inua.

23Ke ini owo osuŋide Enye, Enye isuŋike mmɔ usiene; ke ini Enye ebede ke ndutuhɔ, Enye itiŋke ikɔ ndige; edi ayak ikɔ Esie esin ke ubɔk Andikpe edinen ikpe.

24Enye ke Idem Esie obiom mme idiɔk-ŋkpɔ nnyin ke ikpɔhidem Esie ke eto, man nnyin ikpakpa ikpɔŋ idiɔk-ŋkpɔ, inyuŋ idu uwem inɔ edinen ido.

25Nde unan Esie enam udɔŋɔ okure mbufo. Koro mbufo ekasasaŋa eyo nte erɔŋ, edi ke emi emafiak etiene Andibɔk ye Andikpeme ukpɔŋ mbufo.