NUMBERS 28 - Efik Old Bible With Sectional Headings

Uwa Emi Enyenede Ndiwa Kpukpru Usen

1NDIEN Jehovah ɔdɔhɔ Moses, ete Wuk nditɔ Israel, nyuŋ dɔhɔ mmɔ, ete,

2Mbufo etiŋ enyin ke ndida enɔ mi, kpa udia uwa ikaŋ mi, ke edinem utebe, nnɔ mi ke ekem ini esie.

3Nyuŋ dɔhɔ mmɔ, ete, Emi edi uwa ikaŋ eke mbufo ediwade enɔ Jehovah; nditɔ erɔŋ isua kiet kiet iba eke efɔnde ema, kpukpru usen, ke nsinsi edifɔp uwa.

4Wa eyen erɔŋ kiet ke usenubɔk, nyuŋ wa eyen erɔŋ eken ke mbubreyo:

5ye omer kiet eti ndom-uyo ke inuak-udia, emi abuahade ye quart editim aran;

6nsinsi edifɔp uwa oro ekewade ke Sinai, ke edinem utebe, uwa ikaŋ Jehovah.

7Nyuŋ wa ediŋwɔŋ uwa esie, quart kiet ye eyen erɔŋ kiet: ŋwaŋa wine ke ediŋwɔŋ uwa nɔ Jehovah ke edisana ebiet.

8Ndien ŋko wa eyen erɔŋ eken ke mbubreyo: kpa nte inuak-udia usenubɔk, ye nte ediŋwɔŋ uwa esie edide, ke afo ediwa uwa ikaŋ ɔnɔ Jehovah, ke edinem utebe.

9Ndien ŋko ke usen sabbath, wa nditɔ erɔŋ isua kiet kiet iba eke efɔnde ema, ye omer eti ndom-uyo iba, ke inuak-udia, eke abuahade ye aran, ye ediŋwɔŋ uwa esie:

10edifɔp uwa sabbath ke kpukpru usen sabbath kɔrɔ ke nsinsi edifɔp uwa, ye ediŋwɔŋ uwa esie.

11Ndien ŋko mbufo eda edifɔp uwa esɔk Jehovah ke iso ɔfiɔŋ mbufo; abak enaŋ iba, ye okukim kiet, ye nditɔ erɔŋ isua kiet kiet itiaba, eke efɔnde ema;

12omer eti ndom-uyo ita, ke inuak-udia, emi abuahade ye aran, enyuŋ esaŋa ye enaŋ kiet; omer eti ndom-uyo iba emi abuahade ye aran, ke inuak-udia, esaŋa ye okukim kiet;

13omer eti ndomo-uyo kiet emi abuahade ye aran, ke inuak-udia, onyuŋ asaŋa ye eyen erɔŋ kiet, ke edifɔp uwa eti utebe, uwa ikaŋ Jehovah.

14Ndien ediŋwɔŋ uwa mmɔ edidi wine ke qaurt iba ke enaŋ kiet, ye qaurt ye udori ke okukim kiet, ye quart kiet ke eyen erɔŋ kiet: emi edide edifɔp uwa kpukpru ɔfiɔŋ, ke ofuri ɔfiɔŋ isua.

15Mbufo enyuŋ ewa okpo ebot kiet enɔ Jehovah ke uwa idiɔk ido, ekɔrɔ ke nsinsi edifɔp uwa, ye edinwɔŋ uwa esie.

16Ndien ŋko mbufo enim passover enɔ Jehovah, ke ɔyɔhɔ usen akpa ɔfiɔŋ duopenaŋ.

17Mbufo enyuŋ edia usɔrɔ ke ɔyɔhɔ usen ɔfiɔŋ emi efut: enyuŋ eta uyo eke leaven miduhe, ke ofuri usen mbitiaba.

18Mbufo esop edisana esop ke akpa usen; ekunam baba ubɔk-utom ke esit:

19ndien mbufo ewa uwa ikaŋ, kpa edifɔp uwa enɔ Jehovah; abak enaŋ iba, ye okukim kiet, ye nditɔ erɔŋ isua kiet kiet itiaba: mbufo eyom eke efɔnde ema:

20mbufo ewa omer ita ye enaŋ, wa omer iba ye okukim;

21nyuŋ da omer kierakiet wa ye eyen erɔŋ kiet, ke ofuri nditɔ erɔŋ mbitiaba:

22ye okpo ebot kiet ke uwa idiɔk ido, man osio isop mbufo.

23Mbufo enyene ndiwa mme mmɔ emi ŋkɔrɔ ke edifɔp uwa usenubɔk eke edide nsinsi edifɔp uwa.

24Ke ntem ke mbufo ediwa inuak-udia uwa ikaŋ, ke edinem utebe, enɔ Jehovah, kpukpru usen, ke ofuri usen mbitiaba: ewa enye ekɔrɔ ke nsinsi edifɔp uwa, ye ediŋwɔŋ uwa esie.

25Ndien ke ɔyɔhɔ usen itiaba ke mbufo esop edisana esop; ekunam baba ubɔk-utom kiet.

26Ndien ŋko ke usen akpa mfri, ke ini mbufo ewade obufa inuak udia enɔ Jehovah, ke mme urua mbufo ekurede, ke mbufa edisop edisana esop; mbufo ekunam baba ubɔk-utom kiet:

27ndien mbufo ewa edifɔp uwa enɔ Jehovah ke edinem utebe: abak enaŋ iba, ye okukim kiet, ye nditɔ erɔŋ isua kiet kiet itiaba;

28ye inuak-udia mmɔ ke eti ndom-uyo eke abuahade ye aran, omer ita esaŋa ye enaŋ kiet, omer iba ye okukim kiet,

29ewa omer kierakiet ye eyen erɔŋ kiet, ke ofuri nditɔ erɔŋ mbiatiaba:

30ye okpo ebot kiet eke edade esio isop mbufo.

31Mbufo enyene ndiwa mmɔ ŋkɔrɔ ke nsinsi edifɔp uwa, ye inuak-udia esie (mbufo eyom eke efɔnde ema), ye mme ediŋwɔŋ uwa mmɔ.