ŊWED JOB 34 - Efik Old Bible With Sectional Headings

Elihu Etiŋ Ete ke Abasi Enen

1NDIEN Eihu ɔbɔrɔ onyuŋ ɔdɔhɔ, ete,

2Mbufo mbon eti-ibuot, ekop uyo mi: mbufo mme ɔfiɔk ŋkpɔ owo enyuŋ ekpaŋ utɔŋ enɔ mi.

3Koro utɔŋ odomode ikɔ, nte emi nsiŋ atabide udia.

4Yak nnyin imek se inende ke idem nnyin; yak nnyin ifiɔk ŋkpɔ eke ɔfɔnde ke otu nnyin.

5Koro Job ɔdɔhɔde, ete, “Ami mmɔfɔn; Abasi omonyuŋ ɔbɔ mi se inende ye ami.

6Nte ŋkposu nsu ndian edinen ido mi?

7Unan mi omodoro ufiɔn, ndien isop iduhe.” Anie owo ebiet Job?

8Enye ɔŋwɔŋ nsahi nte mmɔŋ: Onyuŋ aka akabuana ŋkpɔ ye mme anam-idiɔk, onyuŋ asaŋa nsaŋa ye mme idiɔk owo:

9Koro enye ɔdɔhɔde ete, “Idoroke owo udori, ke owo anamde ufan ye Abasi.”

10Mbufo mbon eti-ibuot, ekop ndien uyo mi. Nsa Abasi, enye idiɔkke. Nsa Abasi Ibom, enye inamke ukwaŋ-ŋkpɔ.

11Koro enye eyeda se owo anamde osio usiene ye owo, onyuŋ anam owo okut nte asaŋade ye ido owo.

12Kakpan Abasi ikemeke ndinam idiɔk, Abasi Ibom inyuŋ ikwaŋake ikpe.

13Anie owo okonim enye, ete enye akama isɔŋ? Anie onyuŋ otim ererimbot kpukpru?

14Edieke enye ekerede owo, onyuŋ ataŋde spirit esie ye ibifik esie ɔnɔ idem esie;

15Ofuri obukidem eyekpa ini kiet: owo onyuŋ afiak ke ntan.

16Kam nyene ibuot, kop ikɔ emi, nyuŋ kpaŋ utɔŋ ke uyo ikɔ mi.

17Nte owo eke asuade se inende ŋko edida ubɔŋ? Nte afo onyuŋ ekeme ndinam ikpe otip eti ye ɔkpɔsɔŋ owo?

18Nte owo edidɔhɔ edidem, ete, Oburobut owo? ɔdɔhɔ ikpɔ owo, ete, Idiɔk?

19Man ɔdɔhɔ enye emi miteŋeke mbɔŋ enyin, minyuŋ isehe mbon inyene ikan ubuene: koro edi ubɔk esie akanam kpukpru.

20Mmɔ ekpaŋa ke idaha kiet; ke ufɔt okoneyo ke mbio-obio etimere enyuŋ edaŋa: eda mkpɔsɔŋ owo efep, inamke ke ubɔk.

21Koro enyin esie esede usuŋ owo, onyuŋ okutde kpukpru ikpat esie.

22Ekim iduhe, mfut mkpa inyuŋ iduhe, eke mme anam-idiɔk ekemede ndidibe do.

23Koro enye mikpaha nditiŋ enyin esie ke idem owo anyan ini, ke ini owo akade ikpe ke iso Abasi.

24Enye anuak mkpɔsɔŋ owo mbak-mbak, ndien iduŋɔke, onyuŋ emenere owo efen onim ke itie mmɔ.

25Mmɔdo enye otimde ɔfiɔk se mmɔ enamde, oyut mmɔ akabare onim ke okoneyo, ndien mmɔ enuaha.

26Koro mmɔ ediɔkde, enye ɔtɔ mmɔ ke ɔtɔ eke kpukpru owo ekutde;

27Oto koro mmɔ ekefiakde ekpɔŋ enye, minyuŋ ikereke usuŋ esie baba kiet;

28Ndinam eseme mme ubuene osim enye, ndien enye okop eseme mbon-ukut.

29Ke ini enye ɔnɔde owo ifure, anie ekeme ndinam ikpe otip owo? Ndien adaŋemi enye ofukde iso, anie ekeme ndise enye? Anam ubɔk kiet ye ofuri idut ye owo kiet:

30Man oburobut owo okuda ubɔŋ, okunyuŋ omum mbio-obio ke afia.

31Nte owo edidɔhɔ abasi, ndien, ete, Mmada ufen, ndien nnamke idiɔk?

32Afo teme mi kɔrɔ ye se ŋkutde: edieke ŋkanamde idiɔk, ndinamke aba.

33Nte enye edisio usiene nte afo esede? koro afo asuade, mmɔdo afo enyenede ndimek, idige ami: dɔhɔ ndien se afo ɔfiɔkde.

34Mbon eti ibuot eyedɔhɔ mi, ye ɔfiɔk ŋkpɔ owo eke okopde uyo mi, ete,

35Job idɔhɔkɔ ke ifiɔk, uyo esie inyuŋ idige ɔniɔŋ.

36Mmoyom nte ekpedomode Job ekure, ebaŋa ibɔrɔ esie ke otu mme idiɔk owo.

37Koro enye ɔkɔrɔde nsɔŋ ibuot ke idiɔk ido esie: akwak ubɔk ke otu nnyin: onyuŋ etiŋ ediwak ikɔ abaŋa Abasi.