JEREMIAH 46 - Efik Old Bible With Sectional Headings

Ubiom-Ikpe Abasi Esim Egypt

1UYO Jehovah emi okosim Jeremiah prophet abaŋa mme idut.

2Eke Egypt, abaŋa mbon-ekɔŋ Pharaoh Neco edidem Egypt, emi okodude ke mben akpa Euphrates ke Carchemish, emi Nebuchadrezzar edidem Babylon asuande, ke ɔyɔhɔ isua Jehoiakim eyen Josiah edidem Judah, inaŋ.

3Mbufo etim akamba otu ekɔŋ ye ekpri, enyuŋ eyi ke ekɔŋ.

4Ebɔp horse ŋkpɔ ke idem; mbufo mbon horse edɔk, enyuŋ eyara ndun ukwak, edaha eda; etuk eduat, esine edisine-ŋkpɔ-ekɔŋ.

5Nnam didie ŋkut mmɔ edikhe? Mmɔ ekabare efiak edem; mbon uko mmɔ enyuŋ esuana, enyuŋ efeŋe itɔk, inyuŋ ikabakede ise. Ndik akan okuk; Jehovah ɔdɔhɔ.

6Mbon nsɔp itɔk idifeheke, owo uko idifeheke, owo uko idinyuŋ ibɔhɔke; mmɔ eyetuak ukot eduɔŋɔ ke edem edere, ke mben akpa Euphrates.

7Anie owo ɔdɔk emi ebiet inyaŋ? Mmɔŋ esie oyok nte mme akpa.

8Egypt ke ɔdɔk nte inyaŋ, mmɔŋ onyuŋ oyok nte mme akpa; enye onyuŋ ɔdɔhɔ ete, Nyedɔk mfuk isɔŋ; nyesobo obio ye mme andiduŋ enye.

9Mbufo mme horse edɔk; yak mme chariot edama; yak mbon uko enyuŋ ewɔŋɔ; Ethiopia ye Put emi ekamade otu ekɔŋ; ye mme Ludim emi ekamade enyuŋ enukde utiga.

10Koro mfin emi enyenede Ɔbɔŋ Jehovah mme udim, usen usiene eke enye osiode usiene ye mme asua esie: ndien ofut eyedia ɔyuhɔ, onyuŋ ɔŋwɔŋ iyip mmɔ ɔyuhɔ: koro Ɔbɔŋ Jehovah mme udim oninim uwa ke edem edere, ke mben akpa euphrates.

11O adiaha Egypt eyenɔwɔŋ, dɔk ke Gilead ka da balsam: afo eyenam ibɔk awak ke ikpikpu; idige nte ekɔkde fi.

12Mme idut emekop esuene fo, mfiori fo omonyuŋ ɔyɔhɔ ke isɔŋ: koro owo uko atuakde owo uko ke idem, mbiba eduɔ ɔtɔ kiet.

13Uyo emi ke Jehovah ɔdɔhɔ ye Jeremiah prophet, ke ini Nebuchadrezzar edidem Babylon edide ndisuan isɔŋ Egypt.

14Mbufo etiŋ ke Egypt, enyuŋ ekwɔrɔ ke Migdol, enyuŋ ekwɔrɔ ke Noph, enyuŋ edɔhɔ ke Tahphanhes, ete, Nim idem, nam ŋkpɔ beŋe ke idem fo; koro ofut adiade akan fi okuk. Ata mkpɔsɔŋ owo fo enam didie eduɔhɔ?

15Mmɔ idaha da, koro Jehovah onukde mmɔ ɔduɔk.

16Mmɔ eke eduɔŋɔde ewak, owo onyuŋ ɔduɔ mbɔhiduŋ esie ke idem: ndien mmɔ edɔhɔ ete, Daha ke enyɔŋ, ndien nnyin iyefiak ke ɔtɔ oruk nnyin, ye ke isɔŋ emana nnyin, mbak ofut afai.

17Mmɔ ekekwɔrɔ do, ete, Pharaoh edidem Egypt omosobo; amayak ini ebe.

18Edidem emi enyiŋ esie edide Jehovah mme udim ɔdɔhɔ, ete, Ma uwem mi, nte Tabor ke otu ikpɔ obot, ye nte Carmel ke mben inyaŋ, enye eyedi.

19O adiaha emi oduŋde ke Egypt, nam ŋkpɔ ntaŋ-mfep nnɔ idem fo: koro Noph eyekabare edi ŋkpɔ nsobo, eyenyuŋ abiara, ndien owo eke oduŋde ididuhe.

20Egypt edi ata ediye abak uman enaŋ; nsobo oto ke edem edere edi.

21Mbon-ekɔŋ emi enye ekpede okuk ŋko enyuŋ ebiet enaŋ isek ke otu esie, edi mmɔ ŋko ekabare efeŋe ikpat kiet: ikemeke ndida, koro usen nditaha mmɔ omosim mmɔ, kpa ini ufen mmɔ.

22Uyo esie eyewɔrɔ nte eke urukikɔt; koro mmɔ esaŋade ke udim ekɔŋ, enyuŋ eda ekuri eduk enye ke esit, kpa nte mme ekpeŋe eto.

23Jehovah ɔdɔhɔ ete, Mmɔ eyekpeŋe akai esie, koro mikemeke ndiduŋɔre enye; koro mmɔ ewakde ekan ŋkukuŋkpɔyɔriyɔ, ndien minyeneke ibat.

24Mmɔ esuene adiaha Egypt; eda enye esin ke ubɔk mbon edere.

25Jehovah mme udim Abasi Israel ɔdɔhɔ, ete, Sese, ami mmɔŋ nda ufen ntiene Amon emi otode ke No, ye Pharaoh ye Egypt ye mme abasi mmɔ, ye ndidem mmɔ; kpa Pharaoh ye mmɔ eke ebuɔtde idem mmɔ ye enye.

26Nyenyuŋ nda mmɔ nsin ke ubɔk mmɔ eke eyomde uwem mmɔ, ye ke ubɔk Nebuchadrezzar edidem Babylon, ye ke ubɔk ikɔt esie; ndien ke ini oro ebede owo eyeduŋ ke esit kpa nte ke eset: emi edi uyo Jehovah.

27O Jacob, owo mi, afo kufehe, ndien, O Israel kunyuŋ ukpa idem: koro, sese, ami nyenyaŋa fi nsio ke anyan ebiet, nyenyaŋa ubon fo nsio ke isɔŋ ntaŋ-mfep mmɔ; ndien Jacob eyefiak edem, onyuŋ etie suŋ, onyuŋ oduŋ ke ifure, ndien baba owo kiet eke anamde enye ndik ididuhe.

28Jehovah ɔdɔhɔ ete, Afo owo mi Jacob, kufehe: koro ami ndude ye afo: koro nyesobo kpukpru mme idut emi ŋkebinde fi nsin do: edi ndisoboke fi mma, edi nyetunɔ fi ke ufat; ndien ndiyakke fi ɔbɔhɔ ikpikpu.