AMOS 5 - Efik Old Bible With Sectional Headings

O Ufɔk Israel Ewɔŋɔde Ekpɔŋ Idiɔk Ido Mbufo

1MBUFO ekop uyo emi ami mmende ntiŋ mbaŋa mbufo, kpa ikwɔ eseme, O ufɔk Israel.

2Adiaha Israel ɔmɔduɔ, idinyuŋ idahake aba ke enyɔŋ: eduɔk enye ke isɔŋ esie; baba owo kiet eke emenerede enye ke enyɔŋ iduhe.

3Koro ntem ke Ɔbɔŋ Jehovah ɔdɔhɔ, ete, Obio eke tɔsin owo ekewɔŋɔde eyesuhɔ ikie, ndien obio eke owo ikie ewɔŋɔde eyesuhɔ duop, ɔnɔ ufɔk Israel.

4Koro ntem ke Jehovah ɔdɔhɔ ufɔk Israel, ete, Mbufo etiene mi, enyuŋ edu uwem:

5ndien mbufo ekuyom Bethel, ekunyuŋ eka ke Gilgal, ekunyuŋ ebe ekesim Beer-sheba: koro miditreke nditaŋ Gilgal nnyɔŋ, Bethel eyenyuŋ akabare edi ikpikpu.

6Mbufo eyom Jehovah, enyuŋ edu uwem, mbak enye edibumere nte ikaŋ ke ufɔk Joseph, onyuŋ ata enye, ndien baba owo kiet eke onimede enye iduhe ke Bethel.

7Mbufo emi ekabarede ikpe edi etidot, enyuŋ emen se inende eduɔk ke isɔŋ;

8enye akanam Pleiades ye Orion, onyuŋ akabare mfut mkpa edi usenubɔk, anam uwemeyo ebire nte okoneyo: okot mmɔŋ inyaŋ edi, onyuŋ aŋwaŋa enye ke iso isɔŋ: Jehovah edi enyiŋ esie.

9Emi esinde nsobo abuat ɔkpɔsɔŋ owo nte usiere, nsobo onyuŋ osim ɔkpɔsɔŋ ebiet.

10Mmɔ esua owo eke aduaride owo ke inua-otop, enyuŋ eda owo eke ɔdɔhɔde edinen, ese ke mbubiam.

11Mmɔdo, koro mbufo edigide mbon unana, enyuŋ ebɔde mmɔ utomo ibokpot: mbufo ebɔp ufɔk ke ndisɔi itiat, edi ididuŋke ke esit; enyuŋ etɔ edifɔn iŋwaŋ-vine, edi idiŋwɔŋke wine mmɔ.

12Koro mmɔfiɔk ediwak mme idiɔk ido mbufo, ye mkpɔsɔŋ ukwaŋ-ŋkpɔ mbufo: ke etuk nti owo, ke ebɔ utip, enyuŋ enuk mme ubuene efep ke inua-otop.

13Mmɔdo owo eke edide ɔniɔŋ ke ini oro eyedop inua: koro edide idiɔk ini.

14Mbufo eyom eti ŋkpɔ, ekuyom idiɔk, man edu uwem: ndien ntem ke Jehovah Abasi mme udim edidu ye mbufo, kpa nte mbufo ekedɔhɔde.

15Mbufo esua idiɔk, enyuŋ ema eti, enyuŋ ewuk edinen ikpe ke inua-otop: mme Jehovah Abasi mme udim eyetua nsuhɔ Joseph mbɔm.

16Mmɔdo ntem ke Jehovah Abasi mme udim, Ɔbɔŋ, ɔdɔhɔ, ete, Ntuaŋa odu ke kpukpru mme aŋwa; mmɔ enyuŋ edɔhɔ, ete, “Mbɔm! mbɔm!” ke kpukpru efak; mbufo ekot mbio iŋwaŋ edi eseme, enyuŋ ekot mmɔ eke efiɔkde ikwɔ edi ntuaŋa.

17Ntuaŋa onyuŋ odu ke kpukpru iŋwaŋ-vine: koro nyesaŋa ke ufɔt fo mbe; Jehovah ɔdɔhɔ.

18Ɔdɔdiɔk ɔnɔ mbufo emi eyomde usen Jehovah ke idem mbufo! mbufo esaŋa nso ye usen Jehovah? Enye edi ekim, idige uŋwana.

19Kpa nte owo efehede ɔbɔhɔ lion, ndien bear osim enye: ye nte owo odukde ke ufɔk akadian ubɔk ke ibibene, ndien urukikɔt odom enye.

20Nte usen Jehovah idige ekim? Nkɔm idige uŋwana. Nte idige ɔkposɔŋ ekim? Ŋkɔm uyama iduhe ke esit.

21Nsua, nsin ikpɔ usen mbufo ke ndek, ndinyuŋ ŋŋwuneke mme usɔrɔ mbufo.

22Edieke mbufo ediwade ndifɔp uwa ye inuak-udia mbufo enɔ mi, ndibɔhɔ mmɔ: ndinyuŋ nsehe uwa emem eke etode ke ndisehe unam mbufo.

23Men uyom ikwɔ fo fep kpɔŋ mi; ndien nyomke ndikop ikwɔ ndido fo.

24Edi yak ikpe ɔfiɔrɔ nte mmɔŋ, ye edinen ido nte nsinsi akpa.

25O ufɔk Israel, nte mbufo ekeda uwa emem ye inuak-udia esɔk mi ke wilderness ke isua aba?

26Edi mbufo ekebiom ataya edidem mbufo, ye Chiun mbiet-ŋkpɔ mbufo, ntantafiɔŋ abasi mbufo, emi mbufo ekenamde ke idem-mbufo.

27Ndien nyetaŋ mbufo mfep nnim ke edem Damascus oko; Jehovah, emi enyiŋ esie edide Abasi mme udim, ɔdɔhɔ ntre.