ŊWED ESEME 4 - Efik Old Bible With Sectional Headings

Uyɔhɔ Ufen Emi Esimde Zion

1GOLD anam didie akabare ebire! ata eti gold anam didie ɔkpuhɔre! Mme itiat edisana ebiet emeduɔŋɔ ke ibuot kpukpru mme efak.

2Ndiye nditɔ-iren Zion emi ekemde ye ata eti gold, anam didie ebat mmɔ nte abaŋ mbat eso eke ubɔk obot-eso anamde!

3Kpa mme jackal esio eba enɔ nditɔ mmɔ ewap: adiaha ikɔt mi amakanare edi afai, ebiet ostrich ke wilderness.

4Nsat-itɔŋ anam edeme eyen nsek adiana enye ke nsiŋ: nditɔ-ɔwɔŋ eyom uyo; owo eke obuŋde ɔnɔ mmɔ iduhe.

5Mmɔ eke ekediade edinem udia esobo ke efak: mmɔ eke ekebɔkde ke ididuot efat ifum.

6Idiɔk ido adiaha oruk mi onyuŋ okpon akan ukwaŋ-ŋkpɔ Sodom, emi okosobode ke idaha kiet, ndien idige ubɔk owo otuk enye.

7Mme Nazirite esie ekesana ekan snow, efia ekan mmɔŋ-eba, ekeyibe idem ekan ruby, iwut-idem mmɔ edi sapphire.

8Iso ke ebire mmɔ akan ubit, owo idiɔŋɔke mmɔ ke efak: ikpɔkidem adiana mmɔ ke ɔkpɔ; amasat, akabare nte eto.

9Ɔfɔn ye mmɔ eke ofut owotde, akan mmɔ eke akaŋ owotde: koro mmɔ oro eyemerede, enyuŋ etie nte ekekim mmɔ, koro mbuŋwum iŋwaŋ miduhe.

10Ubɔk iban emi enyenede esit mbɔm emetem nditɔ mmɔ: mmɔ ekabare edi udia mmɔ ke ŋwure adiaha ikɔt mi.

11Jehovah ama ama ifuresit esie; amaŋwaŋa ikaŋ iyaresit esie. Enye omonyuŋ okim ikaŋ ke Zion, emi atade tutu osim ke isɔŋ esie.

12Ndidem ererimbot ye kpukpru mme andiduŋ ekondo baba kiet ikpenimke ke akpanikɔ, ite ke owo usua ye owo utɔk ekpeduk ke inua-otop Jerusalem.

13Mme idiɔk ido mme prophet esie, mme ukwaŋ-ŋkpɔ mme oku esie, eke ekeduɔkde iyip mme andinen owo ke ufɔt esie,

14esin mmɔ ediyo nte nnan ke mme efak, iyip asabare mmɔ, ndien owo ikemeke ndituk edisine-ŋkpɔ mmɔ.

15Mmɔ efiori ekot mmɔ, ete, Mbufo edaŋa, ke edehe, edaŋa, edaŋa, ekutuk! koro mmɔ efeŋede, enyuŋ ediyo, edɔhɔ ke otu mme idut, ete, Mmɔ ididuŋke aba.

16Iyaresit Jehovah amakabare mmɔ; enye iditiŋke aba mmɔ enyin ke idem: mmɔ iteŋeke mme oku iso, inyuŋ ifɔnke ido ye mbiowo.

17Ke ini nnyin isuk idedu, enyin okim nnyin, ke nnyin isede mmɔ eke ekpeŋwamde nnyin, ikpikpu; ŋnyin ikekpeme ke itie ukpeme, ise idut eke mikemeke ndinyaŋa nnyin.

18Mmɔ ebine ikpat nnyin, ndien nnyin ikemeke ndisaŋa ke aŋwa nnyin: utit nnyin emekpere, mme usen nnyin emeyɔhɔ: koro utit nnyin emedi.

19Mmɔ emi ebinede nnyin esɔp ukot ekan ntrukpom enyɔŋ: mmɔ esɔp ebine nnyin ke enyɔŋ ikpɔ obot, edibe ebet nnyin ke wilder-ness.

20Mmɔ ekeda mme ukpe mmɔ emum ibifik inua nnyin emi Jehovah ekeyetde aran, kpa enye emi nnyin ikɔdɔhɔde ibaŋa, ite, Nnyin iyedu uwem ke idak mfut esie ke otu mme idut.

21O adiaha Edom, emi oduŋde ke isɔŋ Uz, dara nyuŋ bre; cup eyenyuŋ ebe fi ŋko: afo eyeŋwɔŋ akpa, onyuŋ ɔfuhɔre idem fo.

22O adiaha Zion, ufen idiɔk ido fo omokure; enye iditaŋke aba fi ifep: enye eyenɔ fi ufen idiɔk ido, O adiaha Edom; eyeyarare idiɔk ido fo.