1 CHRONICLES 16 - Efik Old Bible With Sectional Headings

Edidem David Ɔkwɔ Ikwɔ Itoro Ɔnɔ Jehovah

1NTRE ke mmɔ eda ekebe Abasi eduk ekediɔk ke esit tent oro David okowukde ɔnɔ enye: mmɔ enyuŋ ewa edifɔp uwa ye uwa emem ke iso Abasi.

2Ndien adaŋemi David etrede ndifɔp edifɔp uwa ye uwa emem, enye ada enyiŋ Jehovah ɔdiɔŋ kpukpru owo.

3Onyuŋ ada ubak uyo, ye ŋwa unam, ye ebok edisat grape, edeme ɔnɔ kpukpru owo Israel kiet kiet, ke eren ye ŋwan.

4Enye onyuŋ ada ndusuk mme Levite emi enamde utom, onim ke iso ekebe ediomi Jehovah, ete etoro, enyuŋ ekɔm, enyuŋ ekwɔ enɔ Jehovah Abasi Israel;

5Asaph etubom, ye Zechariah adiana enye, ye Jeiel, ye Shemiramoth, ye Jeiel, ye Mattithiah, ye Eliab, ye Benaiah, ye Obed-edom, ye Jeiel, ekama ŋkpɔ nte psaltery ye harp; edi Asaph akama cymbal, man ebre ɔkpɔsɔŋ;

6Benaiah ŋko, ye Jahaziel mme oku, ekama ukorowo kpukpru ini ke iso ekebe ediomi Abasi.

7Ekem ke usen oro, ndien David onim (mmɔ) ke mme etubom, ete ekɔm Jehovah, ke ubɔk Asaph ye nditɔ ete esie.

8Mbufo ekɔm Jehovah; eseme ekot enyiŋ esie; emen se enye anamde etaŋa enɔ kpukpru owo.

9Ekwɔ enɔ enye; ekwɔ ikwɔ enɔ enye; ekere kpukpru mme utibe ŋkpɔ esie.

10Ebure ke edisana enyiŋ esie: yak esit adat mmɔ eke eyomde Jehovah.

11Mbufo ebine Jehovah ye odudu esie; eyom iso esie kpukpru ini.

12Eti mme utibe ŋkpɔ esie emi enye akanamde, ŋkpɔ ndyɔ esie, ye mme item inua esie,

13mbufo ubon Israel owo esie, mbufo nditɔ Jacob emi enye emekde.

14Enye edi Jehovah Abasi nnyin; mme ikpe esie edu ke ofuri ererimbot.

15Mbufo eti ediomi esie ke nsinsi, ikɔ oro enye okowukde ɔnɔ tɔsin emana:

16emi enye okodiomide ye Abraham, ye uŋwɔŋɔ oro enye ɔkɔŋwɔŋɔde ɔnɔ Isaac;

17onyuŋ anam enye ɔsɔŋ ada ɔnɔ Jacob ke ewuhɔ, ɔnɔ Israel ke nsinsi ediomi, Ete,

18“Nyenɔ fi isɔŋ Canaan, ke uruk udeme mbufo;”

19ke ini mbufo miwakke, ekpride, enyuŋ edi isen owo ke esit.

20Ndien ke ini mmɔ esaŋade ekpɔŋ idut kiet eka obio efen;

21enye iyakke owo otuk mmɔ edi ɔnɔ ndidem ufen abaŋa mmɔ ete,

22Mbufo ekutuk enye emi nyetde aran nnim ke edidem mi, ekunyuŋ enam mme prophet mi idiɔk-ŋkpɔ.

23Mbufo, ofuri ererimbot, ekwɔ enɔ Jehovah; ekwɔrɔ erinyaŋa esie kpukpru usen.

24Etiŋ ubɔŋ esie ke otu mme idut; etiŋ mme utibe-ŋkpɔ esie ke kpukpru obio.

25Koro Jehovah omokpon, onyuŋ ɔfɔn nte etorode enye eti-eti: onyuŋ ɔfɔn nte ebakde enye ekan kpukpru abasi.

26Koro kpukpru abasi mme idut edi mbiet ŋkpɔ: edi Jehovah akanam enyɔŋ.

27Ubɔŋ ye ukpono edu enye ke iso; odudu ye idaresit edu ke ebiet esie.

28Mbufo, ubon ererimbot, enɔ Jehovah, enɔ Jehovah ukpono ye odudu.

29Mbufo enɔ Jehovah ubɔŋ enyiŋ esie: emen uwa edi enye ke iso: etuak ibuot enɔ Jehovah ke uyai edisana ido.

30Mbufo, ofuri ekondo, enyek idem ke iso esie: ererimbot eyesɔŋ ada, idi nyuŋ isehekede.

31Yak enyɔŋ edat esit, yak isɔŋ onyuŋ enem esit: yak esian mme idut, ete ke Jehovah edi edidem.

32Yak inyaŋ okpot, ye se iyɔhɔde enye ke esit: yak obot adara, ye kpukpru se idude ke esit.

33Ndien mme eto akai eyefiori Jehovah ke iso, koro enye edide ndikpe ikpe ekondo.

34Mbufo ekɔm Jehovah; koro enye ɔfɔnde; koro ufɔn esie onyuŋ ebigide ke nsinsi.

35Mbufo enyuŋ edɔhɔ, ete, Nyaŋa nnyin, O Abasi emi anyaŋade nnyin, nyuŋ sio nnyin ke mme idut, taŋ bon ɔtɔ kiet, man nnyin ikɔm edisana enyiŋ fo, inyuŋ ibure ke itoro fo.

36Mbufo ekɔm Jehovah Abasi Israel ke nsinsi nsinsi. Ndien kpukpru owo ebɔ, ete, Amen, enyuŋ etoro Jehovah.

37Ntre ke enye ɔkpɔŋ Asaph ye nditɔ-ete esie do ke iso ekebe ediomi Jehovah, ete enam ŋkpɔ ke iso ekebe kpukpru ini, nte ekemde kpukpru usen:

38ye Obed-edom ye nditɔ-ete esie, owo ata ye itiaita; ye Obed-edom eyen Jeduthun, ye Hosah, ke mme etie-usuŋ:

39ye Zadok oku, ye nditɔ ete esie, mme oku ke iso ebiet-iduŋ Jehovah, ke edikɔŋ ebiet emi odude ke Gibeon,

40ete enye awa edifɔp uwa ɔnɔ Jehovah ke itie edifɔp uwa kpukpru ini ke usenubɔk, ye ke mbubreyo, onyuŋ anam kpukpru se ewetde ke ŋwed mbet Jehovah emi enye eketemede Israel;

41Heman, ye Jeduthun ŋko ye mmɔ, ye mbio eken emi ekemekde, emi ekewetde mmɔ enyiŋ, ete ekɔm Jehovah, koro ufɔn esie ebigide ke nsinsi;

42Heman, ye Jeduthun ŋko ye mmɔ, ete enam uyom ke ukorowo, ye ke cymbal, ye ke ikwɔ, eno Abasi. Nditɔ-iren Jeduthun ŋko enyuŋ etie ke usuŋ.

43Ekem kpukpru owo enyɔŋɔ ufɔk mmɔ: David onyuŋ akabare aka ndidiɔŋ ufɔk esiemɔ.