1 Batedaloni 3 - Sechuana Tlhaping Moffatt Bible 1890（TSN1890）

1KI gona erileñ re sa kake ra tlola re iphapanya, re le ra kaea ha go le molemo go tlogeloa mo Atene rosi;

2Mi ra roma Timoteo mokauleñue oa rona, le moriheri oa Morimo, le moriheri le rona mo tiheloñ ea evangelio ea ga Keresete, go lo tlomamisa, le go lo gomotsa kaga tumelo ea lona;

3Gore go si ne ope eo o tsikiñoañ ki lipogisho tse; gone loa itse ka losi, ha re emisericoe mouo.

4Gone erile ka re na le lona re le ra lo bulelela pele ha re tla bogisioa; yaka go rihahetse, mi loa itse mouo.

5Ki gona ka mouo, erile ki sa kake ka tlola ki iphapanya ka keleco euo, ka mo roma go itse ga tumelo ea lona, gore e se re khotsa moraeri a ba a lo raetse, mi tihelo ea rona ea na lehela.

6Mi yana erile Timoteo a sina coa go lona a tla go rona, a re leretsa litaeco tse ri molemo tsa tumelo le lorato loa lona, le gona ka loa bo lontse lo re gopola ka khopolo tse ri molemo, lo eletsa segolu go re bona, yaka le rona go lo bona;

7Ki gona yalo, bakauleñue, re gomoricoeñ mo lipogishoñ le tlalelo cotle tsa rona ka ntla ea tumelo ea lona;

8Gone yana rea tsela, ha lo ema ka tlomamo mo Moreneñ.

9Gone boitumelelo yo re ka ba ra bo lo nelela Morimoñ ki bohe, ka ntla ea boitumelo yotle yo re itumelañ ka yona ka ntla ea lona ha pele ga Morimo oa rona;

10Ka go rapela bogolu ka bosigo le motsegare, gore re bone hatlogo tsa lona, le go tlatsa se se tlokahalañ mo tumeloñ ea lona?

11Yana Morimo le Rra ecu, ka esi, le Yesu Keresete Morena oa rona, a a siamisetse tsela ea rona go ea go lona.

12Mi Morena a lo atise le go lo totisa mo thatanoñ, le mo go rateñ botle, yaka rona re lo rata.

13Gore a tlomamise pelu tsa lona, go na go sina molatu mo boitsephoñ ha pele ga Morimo, eboñ Rra ecu, mo go tleñ ga Yesu Keresete Morena le bagalaleri ba gague botle.