San Marcos 9 - Biblia Guaraní con Deuterocanónicos

1Jesús he'i avei chupe kuéra:

—Añetehápe ha'e peẽme, ko'ápe oĩva apytépe oĩ nomano mo'ãiva ohecha mboyve Tupã sãmbyhy.

Jesús omimbipárõ guare(Mt 17.1-13; Lc 9.28-36)

2Upe rire, 6 ára haguépe Jesús oho peteĩ yvyty yvatépe ha ogueraha hendive Pedro, Santiago ha Juánpe.

12Ha'e he'i chupe kuéra:

—Añete niko Elías raẽ ou vaerãha, ha ha'e omoĩmba porã vaerã opaite mba'e hekópe. Ha mba'ére piko he'i Ñandejára ñe'ẽ pe yvypóraicha ou vaekue ohasa asy vaerã ha ojeapo'i vaerãha?

13Ha che ha'e peẽme Elías oúma hague ha ha'e kuéra ojapo hague hese ojaposéva, he'iháicha Ñandejára ñe'ẽ, ojehúta hague chupe.

Jesús omonguera peteĩ mitã kuimba'e oĩva mba'epochy poguýpe(Mt 17.14-21; Lc 9.37-43)

14Ou jeývo oĩháme hemimbo'e kuéra, ohecha peteĩ aty guasu ojeréva hese kuéra ha Moisés rembiapoukapy mbo'eha oñoñe'ẽ apíva hendive kuéra.

15Ohechávo Jesúspe opavave oho pya'e huguãitĩvo ha ohecha ramo chupe.

16Ha'e oporandu chupe kuéra:

—Mba'ére piko peñoñe'ẽ api hendive kuéra?

17Peteĩ ha'e kuérava he'i:

—Ápe aru ndéve che ra'y, oguereko niko peteĩ mba'e pochy omoñe'ẽngúva chupe.

18Mamo ha'e oĩháme pe mba'epochy oity chupe yvýre, ijuru ryjuipa, omopururũ hãi nguéra ha hatãmba opytávo. Ajerure ne remimbo'e kuérape omosẽ haguã chugui pe mba'epochy ha ndaikatúi omosẽ.

19Jesús he'i:

—Há, tekove jerovia'ỹ! Araka'e peve piko aiméta pene ndive, araka'e peve piko aikóta pende reheve? Peru chéve pe mitã rusu.

20Ogueraha hikuái pe mitã rusu Jesús rendápe. Pe mba'e pochy ohechávo Jesúspe katu, oityvyro pe mitã rusúpe ha upéva ho'a ojapajeréi yvýre, ha ijuru ryjuipa.

21Jesús oporandu itúvape:

—Araka'e guive piko ojehu chupe kóva?

Itúva he'i:

—Imitã guive.

22Ha heta jey pe mba'epochy oity vaekue chupe tatápe ha ýpe ojuka haguã. Oĩrõ ikatúva rejapóna ore poriahurereko ha ore pytyvõmi.

23Jesús he'i chupe:

—Mba'ére piko ere ‘ikatúrõ’? Opa mba'e ikatu ojeroviáva peguarã!

24Upérõ pe mitã rusu ru osapukái:

—Che ajerovia. Che pytyvõna ajeroviave haguã!

25Jesús ohechávo hetaveha umi oñembyatýva, oja'o pe mba'epochýpe he'ívo:

—Espíritu ñe'ẽngu ha rehendu'ỹva, ha'e ndéve resẽ haguã pe mitã rusúgui ha anive haguã reike pype.

26Pe mba'epochy osapukái ha oityvyro jey pe mitã rusúpe. Upéi osẽ chugui ha oheja omanóva ramo, ha upévare heta oĩ he'íva omano hague.

27Jesús katu ipóre ipojáivo, omopu'ã chupe ha pe mitã rusu oñembo'y.

28Upéi Jesús oike peteĩ ógape ha hemimbo'e kuéra oporandu chupe ha'eñoháme:

—Mba'ére piko ndaikatúi ra'e ore romosẽ pe mba'epochy?

29Ha Jesús he'i chupe kuéra:

—Koichagua mba'epochy, ñembo'e rupi ha karu'ỹme jehasa rupi mante ikatu oñemosẽ.

Jesús he'i jey omanotaha(Mt 17.22-23; Lc 9.43-45)

30Ohóvo upégui ohasa hikuái Galiléa rupi. Jesús katu ndoipotái avave oikuaa,

31ombo'égui hína hemimbo'e kuérape. He'i chupe kuéra:

—Che, yvypóraicha aju vaekue, ha'áta hína yvypóra kuéra pópe. Ha'e kuéra che jukáta. Ha mbohapy ára amano haguépe katu, aikove jeýta.

32Chupe kuéra nahesakãi pe ha'e he'íva, ha okyhyje hikuái oporandu haguã chupe.

Mávapa tuichave(Mt 18.1-5; Lc 9.46-48)

33Oguahẽ hikuái Cafarnaúmpe. Oĩmarõ hikuái hógape, Jesús oporandu chupe kuéra:

—Mba'ére piko peñoñe'ẽ api pejúvo tapére?

34Ha'e kuéra katu okirirĩ. Tapére niko oñoñe'ẽ api ra'e, mávapa upe mba'e guasuvéva ijapytépe kuéra.

36Upéi omoĩ peteĩ mitãme ijapytépe kuéra, ha ohupívo ijyva ári he'i chupe kuéra:

37Oimeraẽva, che rérape oguerohorýva peteĩ mitã koichagua, chéve che rerohory. Ha upe chéve che rerohorýva, nda chéve añói che rerohory, upe che mbouharépe ave.Upe noñemoĩriva ñande rehe, oĩ ñane ndive(Mt 10.42; Lc 9.49-50)

38Juan he'i chupe:

—Mbo'ehára, rohecha peteĩ omosẽva mba'e pochy nde rérape, ha rojoko, ndaha'éigui ore apytepegua.

39Jesús he'i:

—Ani pejoko, peteĩ ojapóva hechapyrãva che rérape niko upéi noñe'ẽ vai mo'ãi che rehe.

40Upe noñemoĩriva ñande rehe, oĩ ñane ndive.Re'átarõ ivaívape(Mt 18.6-9; Lc 17.1-2)

42Oimeraẽ oitýva angaipápe peteĩ mitãicha che rehe ojeroviávape, iporãve vaerã ojeitýrõ chupe yguasúpe ita guasu ijajúri.

43Ha nde po nde reitýtarõ angaipápe, eikytĩ. Iporãve reikove ramo Tupã ndive nde po peteĩ reheve, ha ani nde po mokõive reheve rejeity aña retãme, pe tata ogue'ỹháme araka'eve,Mt 5.30.

44umi yso omano'ỹháme ha tata máramo ogue'ỹháme.

45Ha nde py nde reitýtarõ angaipápe, eikytĩ. Iporãve reikérõ jeikovépe peteĩ nde py reheve ha ani mokõive nde py reheve rejeity aña retãme,

46umi yso omano'ỹháme ha tata máramo ogue'ỹháme.

47Ha nde resa nde reitýtarõ angaipápe, eipe'a. Iporãve reike nde resa peteĩ reheve Tupã oisãmbyhyhápe, ha ani mokõive nde resa reheve rejeity aña retãme,Mt 5.29.

48umi yso omano'ỹháme ha tata máramo ogue'ỹháme.Is 66.24.

49Opavave niko oñembojuky vaerã tatápe.

50“Juky niko iporã, ha nahe'ẽvéi ramo niko ndaikatu véima oñemohe'ẽ jey, naiporã véima mba'everã.Mt 5.13; Lc 14.34-35. Perekóke juky pende pype ha peiko py'a guapýpe oñondive.”