Eclesiástico 17 - Biblia Guaraní con Deuterocanónicos

1Ñandejára ojapo

yvypórape yvýgui

ha upéi

ojapo jey chugui yvy.

2He'i mboy árapa oikovéta

ha ipoguýpe omoĩ

opa mba'e yvy arigua.

3Chupe ome'ẽ pokatu

ojoguáva ipokatúpe,

ha ojapo chupe ijoguaha.

4Opa oikovévape

omongyhyje chugui,

ha ipo guýpe omoĩ

tymba ha guyra kuéra.

6Ome'ẽ chupe juru, kũ, tesa,

apysa ha akã

opa mba'e oikuaa haguã.

7Omyenyhẽ yvypórape

mba'e kuaa ha arandúgui,

ha ohechauka chupe

ivai ha iporãva.

8Ome'ẽ imba'e kuaágui

ohecha kuaa haguã

hembiapokue porãita,

9oikuaauka haguã imba'e

mombe'upyrã,

10ha ogueropurahéi haguã

héra marangatu.

11Ome'ẽ chupe kuéra arandu

ha imba'erã Tembiapoukapy

oporomoingovéva.

12Ojapo hendive kuéra

ñe'ẽ me'ẽ pave'ỹ,

ha oikuaauka chupe kuéra

hembiapoukapy.

13Ha'e kuéra

ohecha hesa tee rupi

heko mimbipa,

ha ijapysa rupi ohendu

iñe'ẽ marangatu.

14He'i chupe kuéra:

“Ani pejapo ipojoja'ỹva”.

He'i avei mba'éichapa

oiko vaerã hapicha apytépe.

15Henondépe oĩ mante

yvypóra rekove,

mba'eve nokañýi chugui.

16Hape kuéra opia

ivaíva gotyo imitã guive,

ipy'a hatã itáicha

ha ndaikatúi

omyengovia hu'ũvare

17Peteĩ-teĩ tetãme

ome'ẽ huvicharã

Israel katu

Ñandejára mba'erã.

18Ha'e ita'ýra ypykue

ha oheko mbo'e chupe.

Ha ome'ẽ haguére chupe

imborayhu rendy,

ndohejái chupe.

19Opa yvypóra rembiapo

hesakã henondépe

kuarahýicha,

ha oikuaapaite hapykuere.

20Nokañýi chugui

iñangaipa kuéra

ha oikuaa porã umíva.

21Ñandejára imba'e porã

ha oikuaa

upe ha'e ojapo vaekuépe.

Nda hesaráiri chugui

ha oheja rei iñangaipa.

22Ha'e imandu'a mante

tupãmba'e yvypóra ome'ẽvare,

ha oñongatu hesa'ỹicha

hembiapo porãngue.

23Upéi omyengoviáta

chupe kuéra,

hembiapokue ojerureháicha.

24Umi ombyasývape

hembiapo vaikue,

ha'e oheja

oñemboja jey hese,

ha omokyre'ỹ jey

umi ijehe

ndojerovia véimavape.

Ohenói jey chupe kuéra Ñandejára

25Ejevy Ñandejára gotyo

ha anive rejapo ivaíva,

eñembo'e henondépe

ha anive rembopochy chupe.

26Ejevy Yvatetegua gotyo,

ejei ivaívagui

ha nde py'aite guive

ejei tupã gua'úgui.

27Omanóva retãme

avave ndikatúi oguerohory

Ñandejárape,

Oikovéva mante ikatu

oguerohory chupe.

28Omano vaekue ndoiko véima

ha ndaikatúi oguerohory chupe,

oikove ha hesãiva mante.

29Mba'eichaitépa ipy'a porã

Ñandejára,

ha oheja rei hembiapo vaikue

umi hese oñemboja jeývape!

30Na opa mba'éiko

ikatu oguereko yvypóra,

ndaipóri ijapytépe

omano'ỹva.

31Ndaipóri kuarahýgui

omimbivéva,

ha opáichavo

oñemoypytũ avei.

Ko'yteve

umi ho'o ha ikãnguéva,

ivaívante

iñakãme oguerekóva.

32Ñandejára ohecha

opa mbyja yvágape oĩva,

ko'ýte yvypórape,

yvy ha tanimbúnteva voi.