Sabiduría 8 - Biblia Guaraní con Deuterocanónicos

1Ha'e ojepysopaite

ko yvy tuichakue,

ha oisãmbyhy

hekópe opa mba'e.

2Ahayhu vaekue ha aha'arõ

che mitã rusu guive;

aipota vaekue

che rembirekorãicha,

che tavyete voi iporãnguére.

3Jeiko Tupã

opa mba'e Jára

chupe ohayhúva ndive

omboheko porãve chupe,

4Oikuaa opa mba'e ñemi

Tupã oikuaáva,

ha oipytyvõ chupe

upe ojaposévape.

5Jarerekosérõ heta mba'e

ko yvy ári,

Máva piko oguereko hetavéta

Arandúgui, ko ha'e opa mba'e

apoharéva?

6Mba'e apokuaa iporãrõ,

máva piko

ndaha'éi ramo Arandu,

ojapo ra'e oĩva guive

yvy ha yvágape?

7Oĩrõ ohayhúva teko joja

imarangatúne oñeha'ã rupi.

Arandu ombo'éne akã guapy,

jejoko kuaa, avei teko joja

ha pu'aka,

yvypóra hekovépe

ndojuhúi chéne

mba'eve ko'ãvagui iporãvéva.

8Oĩ ramo ohupytyséva

tembiasa porã

arandu oikuaapa ohasáva

ha oútava hína.

Oikũmby ñe'ẽ kuaa

ha omyesakã ojekuaa'ỹva,

ha mba'épepa opáta

sapy'aitegua, ha areguáva.

9Upévare ajehe'áta hese

aikove aja,

oikuaágui ohechaukataha chéve

iporãva,

ha ombovevyitaha chéve

jepy'apy ha mba'e mbyasy.

10Hese ae che rerohorýta

che irũ nguéra,

ha che mitã ramo jepe,

itujáva che apóta mba'érõ.

11Che akã porãta

ahecha kuaa haguã iporãva

ha ivaíva,

ha mburuvicha guasu kuéra

che recha ramóta.

12Akirirĩ ramo

añeha'arõta añe'ẽ peve,

añe'ẽ ramo

che renduséta opavave,

ha añe'ẽ puku ramo

ojejuru mbotýta hikuái.

13Arandúre ae

namanói chéne araka'eve,

ha ahejáta mandu'a iporãva

che rapykuerépe oúvape.

14Aporosãmbyhýta

ha amoĩta che poguýpe tetã;

15Poguasu ojekyhyjeha

oñemondýita

ohendúrõ che réra,

che retãgua ndive

che mba'e porãta

ha ñorãirõháme

che katupyrýta.

16Aju jeývo ógape,

apytu'úta ijykére,

hendive ningo javy'a

ha ndajaiko asýi

ñaimérõ hendive

javy'a avei.

17Ko'ã mba'ére

añamindu'úrõ, ha'e che jupe,

Mano'ỹ he'ise,

jeikokuaa arandu ndive.

18Jeikokuaa hendive,

he'ise vy'a;

hembiapokue ha'e

mba'e reta opa'ỹva,

jeiko mante hendive,

he'ise jeikokuaa

ñañe'ẽ hendive,

ogueru terakuã porã,

upéicha rupi aheka opa rupi

jahecha ndaraháipa ógape.

19Ché che mitãrõ

che reko porã vaekue voi

che jeheguínte,

che py'a potĩ vaekue,

20ja'e porãsérõ guarã

che mba'e porãgui aike

peteĩ tete imarã'ỹvape.

21Ha añandúvo che arandu

Tupã ome'ẽrõ chéve mante,

--jaikuaárõ

mamóguipa ou ko jopói

he'iséma ñane aranduha--,

aha Tupã rendápe

ha ajerure asývo chupe,

kóicha añembo'e

che py'aite guive: