Tobit 5 - Biblia Guaraní con Deuterocanónicos

Tobías oho Médiape

1Upévo Tobías he'i itúvape kóicha:

—Nde reipotaháicha ajapóta.

2Mba'épa ajapóta Gabael ome'ẽ haguã chéve pe pláta? Ha'e niko nda che kuaái ha che ndaikuaái chupe. Mba'éichapa ajekuaaukáta chupe oikuaa haguã mávapa che, ha che rerovia ha ome'ẽ haguã chéve pe pláta? hi'ári, che ndaikuaái upe tape ohóva Médiape.

3Tobit he'i chupe:

—Gabael ome'ẽ vaekue chéve peteĩ kuatia ha che avei ame'ẽ chupe peteĩ. Umívare mokõivéva romoĩ vaekue ore réra. Upéi amondoro mbyte rupi ha peteĩ ipehẽngue ame'ẽ chupe ha upe che mba'éva aheja upe pláta reheve. Ojapóma hína 20 áño aheja hague upépe upe pláta. Ko'ágã che ra'y, eheka peteĩ kuimba'e ikatuha jajerovia, oho haguã ne ndive. Ñame'ẽta chupe oipotáva peju jey rire. Tereho eru ñandéve upe pláta.

Tobías ojejuhu Tupã remimbou Rafael ndive

4Tobías osẽ oheka peteĩ oho vaerã hendive oikuaáva upe tape Médiape ohóva. Okápe ojejuhu Tupã remimbou Rafael ndive. Tobías ndoikuaái ha'e Tupã remimbouha,Heb 13.2.

5ha upévare oporandu chupe:

—Nde piko moõgua?

Tupã remimbou he'i chupe:

—Che niko ndéicha, Israelgua hína. Aju ko'ápe amba'aposégui.

Tobías oporandu chupe:

—Nde piko reikuaa tape ohóva Médiape?

He'i chupe Tupã remimbou:

6—E'a! Mba'ére piko ndaikuaa mo'ãi! Py'ỹi ahámiva upépe ha aikuaa porã Mba'éichapa ñaguahẽ vaerã. Ahávami ha apyta Gabael rógape. Ha'e niko Israelgua avei ha oiko Raguéspe, tetã Médiape. Ecbatana guive Ragues peve ñaguahẽ hína mokõi árape jaguata pya'e ramo, mokõive táva oĩ hína yvyty pa'ũme.

7Tobías he'i chupe:

—Che ra'arõmi sapy'aite tamombe'u che rúpe. Aikotevẽta nde rehe reho haguã che ndive. Ame'ẽta ndéve reipotáva.

8Tupã remimbou he'i chupe:

—Ápe roha'arõta. Anínte nde aretei.

9Tobías oike hógape ha he'i itúvape:

—Ajuhúma peteĩ ohótava che ndive, Israelgua avei ha'e.

Tobit he'i chupe:

—Ere chupe tou ápe, taikuaami máva ñemoñare ha máva mávapa ipehẽngue kuéra. Upéicharõ jaikuaáta ikatúpa jajerovia hese oho haguã ne ndive.

10Tobías osẽ ohenói Rafaélpe:

—Nde karai, che ru ne renói.

Tupã remimbou oike pe ógape ha Tobit raẽ omomaitei chupe. Ha Rafael he'i chupe:

—Tereime porãite kena.

Tobit katu he'i chupe:

—Mba'éicha piko aime porãta? Ndahechavéi niko. Kuarahy ohesape ramo jepe ndahechavéi. Ajogua umi omanóvape pytũ ojaho'íva. Ahendu peteĩ oñe'ẽ ramo, ha ndaikatúi ahecha mávapa.

Tupã remimbou he'i chupe:

—Ani rejepy'apy. Tupã ohupytykáta ndéve tesãi reikotevẽva.

Tobit he'i chupe:

—Che ra'y Tobías ohose Médiape. Ikatúnepa nde reho rehechauka haguã chupe tape? Rejeruréva ame'ẽta ndéve.

Tupã remimbou he'i chupe:

—Ikatúta aha hendive. Aikuaapaite umi tape, py'ỹi aju ha aháva Médiape ha aikuaa umi tape ohóva ñu rupi ha umi ohasáva yvyty pa'ũ rupi avei.

Tobit oporandu chupe:

11—Che irũ, máva ñemoñarépa nde? Máva mávapa ne pehẽngue kuéra?

Tupã remimbou he'i chupe:

12—Maerã piko reikuaase máva ñemoñarépa che?

He'i jey chupe Tobit:

—Che irũ, aikuaase mávapa nde ha Mba'éichapa nde réra.

Tupã remimbou he'i chupe:

13—Che hína Azarías, Ananías tuja remineno. Ha'e Israelgua ndeichagua avei.

14Tobit he'i chupe:

—Iporã iterei! Nde rógape reime hína. Ani nde pochy aporandu haguére ne pehẽngue kuérare. Nde niko ore rehegua voi ra'e. Che aikuaa Ananías ha Natánpe, Semelías ra'y kuéra. Rohómi vaekue oñondive Jerusalénpe romomba'e guasu haguã Tupãme ha araka'eve ndojeíri hikuái tape porãgui. Nde rogagua kuimba'e marangatu hína ha nde upéicha avei. Avy'a reimégui ore ndive!

15Ha upéi he'i jey:

—Ame'ẽta ndéve opa omba'apóvape oñeme'ẽva ára ohasávare, ha hi'ári opa mba'e reikotevẽva, che ra'ýpe ame'ẽháicha.

16Tereho che ra'y ndive ohotahápe, ha upéi ambojo'avéta ndéve.

17Tupã remimbou he'i chupe:

—Aháta hendive ha ndojehu mo'ãi mba'eve ivaíva oréve. Ani rejepy'apy upévare.

Tobit he'i:

—Tupã ta nde rovasa che irũ!

Upéi ohenói ita'ýrape ha he'i chupe:

—Che ra'y, eñembosako'i reho haguã ne irũ ndive. Tupã, yvágape oĩva, ta pene pytyvõ pejere porãite haguã, ha hemimbou toho pene ndive.

Tobías ohetũ itúva ha isýpe oho haguã.

Tobit he'i ta'ýrape:

—Tereho porãite!

18Tobías sy hasẽ ha he'i Tobítpe:

—Maerã piko remondo che membýpe ambue tetãme? Ha'e niko pe oikóva ñande reheve ha oĩva ñande ykére opa ára.

19Maerã piko jaipota pláta? Jahecha ramove vaerã ñane mitã, pláta jaipota eterei rangue.

20Ñandejára ome'ẽmbáma ñandéve opa ñaikotevẽva jaiko porã haguã.

21Tobit katu he'i chupe:

—Ani rejepy'apy! Ou porã jeýta niko ha'e, ko ohoháicha. Ndete voi rehecháta ágã upéicha ojehutaha. Anive rejepy'apy, ndojehu mo'ãi chupe kuéra mba'eve ivaíva.

22Tupã remimbou peteĩ ohóta hendive ha osẽ porãta opa mba'épe, ha hesãita ou jeývo.

23Ha upépe ae nahasẽvéi ha'e.