Sabiduría 1 - Biblia Guaraní con Deuterocanónicos

Teko joja rayhu

1Tetã sãmbyhyhára

pehayhúke teko joja.

Pene mandu'a hekópe

Ñandejárare,

ha peheka chupe

pende py'aite guive.

2Ha'e ojejuhukáne

umi chupe oipy'a ra'ã'ỹvape,

ha ojekuaaukáne

umi hese ojeroviávape.

3Py'a mokõi

oporomomombyry Tupãgui,

ha ipokatu

oñeha'ãvo ojekuaa

omokañy itavývape.

4Arandu ndoikéi

mba'e vai apoha py'apýpe,

ha heko ky'áva retépe

ndoikói.

5Espíritu marangatu,

ñane mbo'éva,

ojere japúgui

ha ojei výro reígui,

ha oñeñandu ndaijái

teko joja oĩ'ỹháme.

6Arandu niko

espíritu ohayhúva

yvypórape,

ha ndoheja rei mo'ãi

iñe'ẽ guasúvape.

Tupãme guarã hesakã

opa oñandúva,

oikuaa opa ipy'ápe

oguerekóva,

ha ojapysaka opa

mba'e he'ívare.

7Ñandejára Espíritu

omyenyhẽ ko yvy

ha oguereko ipópe

opa mba'e,

oikuaapa opa oje'éva.

8Upévare,

yvypóra iñe'ẽ ky'áva

nokañy mo'ãi chugui,

ha Ñandejára

ombojovakéta katuete chupe.

9Heko porã'ỹva rembiapo

oñehesa'ỹijóta,

iñe'ẽngue

oguahẽta Ñandejárape,

ojekuaapa haguã

iñangaipa.

10Tupã, ojapysaka kuaáva,

ohendu,

ha ñemiháme oje'éva jepe

nokañýi chugui.

11Pejehejáke aipórõ

ñe'ẽ reígui

ha ani peje mba'eve ivaíva,

ñemiháme oje'éva jepe

ndoje'e reíri,

Ijapúva ikatu ñande juka.

12Ani peru pende ári mano

peikove vai rupi

ha peñehundi

pene rembiapo vai rupi.

13Ñandejára

ndojapói vaekue mano,

ha ndovy'ái ohundívo

yvypórape.

14Opa mba'e ha'e ojapo

oikove haguã,

ha opa mba'e ojapo vaekue,

hesãi,

ndaipóri pype kuéra

oporojukáva,

ha omanóva retã noisãmbyhýi

yvy ári.

15Teko joja nomanói.

16Umi iñañáva katu

ohenói mano,

hayhuhárõ oguereko

ha iñakã vai hese,

ha oñemoĩ hendive

peteĩ ñe'ẽme,

ojokupytýgui mano ndive.