Eclesiástico 41 - Biblia Guaraní con Deuterocanónicos

Mano

1Ha, mano!

Iroitépa mandu'a nde rehe,

umi imba'eta apytépe

py'a guapýpe oikóvape guarã,

umi oiko rei

ha opa mba'e ho'a porãvape,

hesãiva gueteri

ovy'aháre oiko haguã!

2Ha, mano!

Ovy'aiténepa reju ramo

umi ohasa asýva,

umi ikangypa,

oñepysãnga ha ho'a reíva,

umi ndovy'a véiva

ha noha'arõ véiva mba'eve!

3Ani rekyhyje manógui,

ne mandu'a uvei

ne mboyve guarére

ha nde rire guáre.

4Omanotaha opa oikovéva

he'íma Ñandejára,

ha piko reñemoĩta

upe Yvatetegua rembipotáre?

Yvy guýpe,

avavépe ndou ha ndoho mo'ãi

10, 100 térã 1.000 áño.

Iñañávape oha'arõva

5Tapicha ijaheipy

umi mba'e vai apoha,

iñemoñare kuéra

oiko heko añáva róga rupi.

6Ta'ýra añágui

ou tetã heko añáva,

iñemoñare oikóta

ijaheipýrõ.

7Túva añáme

oja'o ita'ýra kuéra

oikógui

hesehápe jaheipýrõ.

8Pejererekóke

mba'e vai apoha,

pejei haguére

upe Yvatetegua rembipotágui!

9Peju ramo yvy ári,

pejeharu haguã peju,

ha pemano ramo,

jeharu upe pene ra'arõva.

10Opa yvýgui osẽva

yvýpe oho jey,

péicha heko añáva

jeharúgui ñehundípe ohasa.

11Omanóvare ojejahe'orõ

hetekuére ojejahe'o,

iñangaipáva katu

héra jepe opa rei.

12Ne rakate'ỹke nde rérare,

upévante niko opytáta ndéve,

ha heta óro atýgui iporãve.

13Vy'áko ndahi'aréi,

terakuã porã katu

opa árape guarã.

14Arandu kañy

ha pláta yvyguy

oñerenohẽ'ỹva,

mávape piko ou porã?

15Iporãve

pe omokañýva itavyha,

upe iñarandu omokañývagui.Mba'éguipa ñatĩ vaerã

16Che ra'y kuéra,

pehendu ko ha'éva ñemotĩre,

peteĩ che ha'eháicha peẽme:

nda opa mba'éire ñatĩ vaerã

térã opa tova pytãre

ja'e vaerã iporãha.

17Etĩ nde ru kuéragui

ne rembiapo ky'árõ,

ha mburuvichágui nde japúrõ.

18Mbojovakeháragui

nde reko añárõ,

aty guasúgui reporojukárõ,

ne irũ teégui

rembopakova pirérõ.

19Nde róga ykereguágui

nde juru atãrõ,

repyrũgui ne ñe'ẽnguére,

20rejekógui nde jyvangáre

rekaru aja,

nderejaposéigui

ojejeruréva ndéve,

21nderejapóigui mba'evérõ

upe jopói oñeme'ẽva ndéve,

nerembojevýigui

rejererohorýrõ,

22rema'ẽgui

kuña reko vaíre,

reapo'ígui nde róga guápe,

23rerahágui ne mba'erã

pe ambue mba'e rãnguéva,

rema'ẽ hatãgui

kuña omendávare,

24repokógui

ne rembiguái kuñávare,

—aníke reñemboja hupáre—,

25reñe'ẽ reitýgui

ne irũ teépe,

—reme'ẽvo jopói

ani reporoja'o—,

26remyasãigui ñe'ẽ,

remombe'úgui ñemihamegua.

27Upéicharõ retĩta hekópe

ha opa rupi rejehayhúta.