1-2Umiha árape oiko Babilóniape peteĩ karai hérava Joaquín, omendáva Hilquías rajy Susana rehe, kuña neporãva ha imarangatúva.
3Itúva kuéra, ijoheipyréva, oheko mbo'e vaekue chupe Moisés rembiapoukapy he'iháicha.
4Joaquín imba'e rereko heta vaekue, ha hóga jerére ikorapy tuicha henyhẽva yvotýgui. Opavave chupe oguerohorýgui, judío kuéra ohóva jepi oñembyaty hógape.
5Upe áñope, oñemoingo mbojovakehára ramo mokõi karaípe. Umívarema voi Ñandejára he'i vaekue: “Mba'e vai heñói Babilóniape karai kuéra ha mbojovakehára kuéra apytépe, jepe chupe kuéra ojerereko che retãgua sãmbyhyhára ramo.”
6Ko'ã karai oúva jepi Joaquín rógape, ha oime raẽ ojoavýva oñemboja hendápe, ha'e kuéra omohenda haguã hekópe pe ojoavyha.
7Asaje pyte, ojehopa rire, Susana osẽva jepi oguata ikorapy rupi.
8Umi mokõi karai ohecháva jepi chupe oho asajekue pe korapýre, ou iñakã vaiete hese.
9Itarováta hikuái hese. Amo ipahápe hesarái hikuái ñandejáragui ha hembiapógui mbojovakehára ramo.
10Mokõive iñakã raku vai eterei hese. Opáichavo nomombe'úi mba'eve ojupe,
11otĩgui he'i haguã, oñenoseha hikuái Susana ndive.
12Ha oheka hikuái mba'éichapa ojapóta, ohecha haguã chupe opa ára.
13Peteĩ jey he'i hikuái ojupe: “Jaha katu ñande rógape. Jakaru hápema.” Ha mokõive oho hapére.
14Ojevy katu mokõive ra'e, ha oimo'ã'ỹhágui ojotopapaite hikuái. Upépe, omombe'u mante ojupe upe oñandúva Susana rehe, ha oñomoĩ peteĩ ñe'ẽme ojopy haguã pe kuñáme peteĩ ha'eñoháme.
15Peteĩ jey, ha'e kuéra omangea jave hese, Susana oho oguata ikorapýre, ojapoháicha voínte jepi. Omoirũ chupe mokõi kuñataĩ hembiguáiva. Ha imbyry'águi oñandu ojahuseha.
16Upépe ndaipóri avave, umi mokõi karai mante oĩ, yvyra kupégui omangeáva hese.
17Susana he'i hembiguái kuérape: “Peru chéve havõ ha mba'e ryakuã porã, ha pemboty pe okẽ tajahu.”
18Umi kuñataĩ omboty pe okẽ, ha osẽ ambue okẽ korapy yke pegua rupi ogueru haguã Susánape umi mba'e ha'e ojerure vaekue. Ha'e kuéra ndoikuaái umi mokõi karai okañyha hína upépe.
19Osẽvo umi kuñataĩ, umi karai opu'ã ha ojeity Susana ári, ha he'i chupe:
20“Okẽ oñembotýma, ha ndaipóri ñande recháva. Ore roikose ne ndive.
21Nereñeme'ẽi ramo oréve, ro'éta peteĩ karia'y oĩ hague ne ndive, ha upévare remosẽ hague ne rembiguái kuérape.”
22Susana hi'ãho ipy'aite guive ha he'i: “Na che pohãi voínte. Añeme'ẽ ramo peẽme aje jukáta,Lv 20.10; Dt 22.22. ha nahániri ramo, peẽ che rundíta.”
23Ndajapo mo'ãi ivaíva Ñandejára renondépeGn 39.9. añeme'ẽvo peẽme. Pejapo pejaposéva che rehe”.
24Susana hatã osapukái, ha umi karai avei oñemoĩ osapukái.
25Peteĩ pya'e oho oipe'a pe okẽ.
26Opavave oĩva pe ógape, ohendúvo upe jesapukái, pya'e oho oike pe korapy okẽ ijykeregua rupi ohecha haguã mba'épa ojehu.
27Umi karai omombe'u ha'e kuéra ohechaháicha gua'u, ha opavave okirirĩ. Araka'eve avave nde'íriva mba'eve peichagua Susana rehe.
28Upe ára ambuépe oikóvo ñembyaty iména rógape, oguahẽ avei umi karai, oúva ojukauka haguã Susánape.
29Ha'e kuéra he'i opavave renondépe: “Peru ko'ápe Hilquías rajy, Joaquín rembireko Susánape.” Ojeho ipiári.
30Ou ha'e, itúva ha isy ndive, imemby ha opa ipehẽngue kuéra reheve.
31Kuña porã ha ijukýva niko Susana.
32Ojehova aho'ígui, umi tekove ahẽ oipe'auka chugui hova mo'ãha, ikatu haguãicha ha'e kuéra omaña hese.
33Ipehẽngue kuéra ha umi upépe oĩva hasẽmba joa.
34Umi mokõi karai opu'ã opavave rovake ha omoĩ ipo Susana akã ári.Lv 24.14.
35Ha'e, hesay hováre, ojesaupi yvágape, ojeroviágui ipy'aite guive Ñandejára rehe.
36Umi karai he'i: “Ore roguata aja pe korapy rehe, ko kuña oike upépe mokõi hembiguái kuñataĩva ndive. Omondo upégui hembiguái kuérape ha upéi omboty pe okẽ.
37Upéi osẽ peteĩ karia'y okañýva vaekue hína, ha oho oñeno hendive.
38Ore, roĩva hína pe korapy ruguáre, rohechávo ko mba'e, pya'e roñemboja upépe.
39Rohecha oñoañua hína hikuái. Pe karia'ýpe katu ndaikatúi rojoko, imbaretevégui ore hegui. Oipe'a pe okẽ ha okañy.
40Ko kuña katu rojoko, ha roporandu chupe mávapa pe karia'y.
41Nde'iséi oréve mávapa. Ore rohecha ko'ã mba'e romombe'úva peẽme.” Opavave oguerovia chupe kuéra. Umíva niko ikaraipáma, ha upéi, mbojovakehára voi ha'e kuéra. Ha upévare oñeguahẽ peteĩ ñe'ẽme Susana ojejuka vaerãha.
Daniel oipytyvõ Susánape42Susana hatã osapukái: “Tupã, opa ára reikovéva, ndaipóri niko mba'eve okañýva nde hegui,Pr 15.11; Heb 4.13. nde reikuaa opa mba'e ojehu mboyve.
43Nde reikuaa porã ko'ã karai ijapuha. Reiete niko amanóta, ajapo'ỹ rehe upe ha'e kuéra he'íva che rehe.”
44Ñandejára ohendu chupe.
45Ha Susana ojererahávo ojejuka haguã, opoko peteĩ karia'y hérava Daniel py'a rehe.
46Ha'e hatã osapukái:
—Ko kuña jejukápe, ani chéve che moinge.”
47Opavave ojere ha oporandu chupe:
—Mba'e piko pe ereséva péicharõ?
48Ha oñembo'yhápe opavave apytépe he'i chupe kuéra:
—Pende tarova mba'e piko peẽ Israelgua? Mba'éicha piko peraháta pejuka kuña ñane retãgua, peikuaa porã'ỹre mba'épa ojehu?
49Jaha jey mbojovakehápe. Japu meme niko upe ko'ã karai ombojáva ko kuñáre.
50Ojevypaite hikuái, ha myakãhára*f** kuéra he'i Daniélpe:
—Eju eguapy ore apytépe ha emombe'u oréve ne remiandu. Ñandejára niko ne myakã porã vaicha, ha ku ikaraipáma vaicha reñe'ẽ.
51Daniel he'i chupe kuéra:
—Peipe'a umíva ojuehegui, ha añe'ẽta peteĩ-teĩme ha'eño.
52Oñemoha'eño rire hikuái, Daniel ohenói peteĩme, ha he'i chupe:
—Ndé, tuja reko aña, ko'ágã oguahẽ hu'ãme umi ne angaipa, ha ko'ágã oñemyengoviapáta ndéve.
53Reporombojovake vaekue hekope'ỹ, rejukauka ojapo'ỹvape mba'eve ivaíva ha reheja rei heko añávape. Péicha rejapo Ñandejára he'i ramo jepe: “Ani rejuka ojapo'ỹvape mba'eve ivaíva ha imarangatúvape.”Ex 23.7.
54Rehecha rire añetehápe mokõivépe oñondive, ere oréve mba'eichagua yvyra guýpepa oĩ ra'e hikuái.
Pe karai he'i:
—Peteĩ jukeri guýpe.
55Daniel he'i chupe:
—Nde japu haguére reñeñakã'óta. Tupã he'íma hemimboúpe upe ojapo vaerã, ha oúma nemboja'óvo.
56Ojereraha rire pe karai, ohenói pe ambuépe ha Daniel he'i chupe:
—Nde hína Canaán, ndaha'éi Judá ñemoñare! Kuña porãre ne akã vai, ha chupe rerekoségui ne mbopy'a tyai.
57Upéichante voi pejapóva jepi kuña Israel guáre. Ha ha'e kuéra okyhyjégui pende hegui, oñeme'ẽva peẽme. Peína ápe peteĩ ojeguarúva pende reko ahẽgui.
58Ko'ágã ere oréve mba'eichagua yvyra guýpepa rehecha chupe kuéra oñondive.
Pe karai he'i:
—Peteĩ kuri'y guýpe.
59Daniel he'i chupe:
—Nde avei nde japu haguére reñeñakã'óta. Ñandejára remimbou ne ra'arõ kyse puku ipópe ne mboja'o haguã. Péicha peikopáta hese.
60Upépe, opavave osapukaipa oguerohorývo Tupãme, oipe'áva jejopy vaígui umi hese ojeroviávape.
61Upéi, opavave opu'ã mbaite umi mokõi karai tuja rehe. Daniel, ijuru kuéra rupi, oity chupe kuéra ha ohechauka ijapu hague hikuái. Umi karaíre ojejapo upe ha'e kuéra ojapouka mo'ã vaekue hapicháre.
62Ha ojejapo haguã Moisés rembiapoukapyDt 19.16-21. he'iháicha, umi karai ojereraha ha ojejuka. Péicha upe árape ndojejukái pe kuña ojapo'ỹ vaekue mba'eve ivaíva.
63Hilquías, hembireko ndive, oguerohory Ñandejárape itajýra Susana rekovére. Upéicha avei iména Joaquín ha opa hogagua, ndojejuhúi haguére Susana rehe mba'eve hekope'ỹ.
64Upe ára guive Daniel oñepyrũ ika'avo hetãgua apytépe.
Who We AreWhat We EelieveWhat We Do
2025 by iamachristian.org,Inc All rights reserved.
