Eclesiástico 8 - Biblia Guaraní con Deuterocanónicos

1Ani rejohova api

imbaretéva ndive,

ndere'aséi ramo ipoguýpe.

2Ani reñorãirõ

mba'e rerekoha ndive,

tuicha mba'éko pe viru

ha resẽ vaíne.

Viru ohundi vaekue hetápe,

ha omombía hapégui

mburuvicha guasu kuérape.

3Ani reñoñe'ẽ joapi

oñe'ẽ reíva ndive:

rehatapyñavéta niko

hataypy.

4Ani rembojaru

ijuru guasúvape,

cháke imandu'a vaíne

nde ru kuérare.

5Ani reja'o ombyasývape

hembiapo vaikue,

ne mandu'áke opavave

jajapoha ivaíva.

6Ani reapo'i itujávape,

opavave niko

ñande tujáta.

7Ani revy'a

avave omano haguére,

opavave niko japa vaerã.

8Ani rembohasa rei

iñarandúva oñe'ẽ ramo,

eñamindu'u mante uvei

umi mba'e he'i vaekuére.

Chugui kuéra reikuaáta

mba'éicha reiko vaerã

ipoguasúva apytépe.

9Ani rejei itujáva

oñemongetahágui.

Ha'e kuéra he'íva niko

ohendu vaekue

itúva kuéragui.

Chugui kuéra reikuaáta

akã porã,

ha mba'éichapa eréta

heko ha henda itépe

upe ere vaerã.

10Ani rehatapyña

iñangaipáva rata,

cháke rekáine.

11Ani reñombojovake

hova atãva ndive,

ha péicha reme'ẽ chupe

jurujái ne moñuhãvo.

12Ani reiporuka

nde hegui imbaretevévape,

ha oimérõ reiporuka ra'e,

eñembyesaráintema.

13Ani ere remyengoviataha

pe mávare,

hetave ikatúvagui.

Péicha rejapo ramo,

opẽta nde rehe.

14Ani reñombojovake

mbojovakehára ndive,

resẽ vaíta katuete.

15Ani resẽ

ipy'a tarováva ndive,

nerembojo'aséirõ

ivaíva nde jupe.

Ha'e nde reraháta

ohosehápe,

ha opẽta nde rehe

itarovakue.

16Ani reñorãirõ

ipochy vaíva ndive,

ha ani resẽ hendive

kavaju ári.

Chupe guarã

mba'eve nde'iséi porojuka.

Reimévo ne año,

ojeitýne nde ári

ha nde jukáne.

17Itavývape

ani remombe'u nde py'apy.

Mba'eve noguerokirirĩ

kuaái.

18Oime raẽva rovake

ani rejapo

reipota'ỹva ojekuaa,

nde reikuaái niko

mba'épa ojehúta.

19Ani reñemombe'u

oimeraẽvape,

ha ani reheja oimeraẽva

ojehu ndéve.