Judit 7 - Biblia Guaraní con Deuterocanónicos

Holofernes opu'ã Israel guáre

1Pe ára ambuépe Holofernes omondo Betúliare iñorãirõhára kuéra ha opa oĩva hendive, oñemoĩ haguã umi ojehasahape oĩva yvyty rupi, ha oñepyrũ haguã ñorãirõ Israelgua kuéra ndive.

2Upe árape voi iñorãirõhára kuéra ojapo upéicha. Oho 170.000 ñorãirõhára yvy rupigua ha 12.000 kavaju arigua, ojepapa'ỹre umi mba'e rerojaha ha ambue kuéra ohóva yvy rupi hendive kuéra.

3Oñemohenda hikuái Betulia ypýpe, yvu ykére. Iñasãi hikuái pe ñúre, ipekuévo, Dotán gotyo, Ibleam peve, ha ipukukuévo, Betulia guive Ciamón peve, oĩva Esdrelón rovái.

4Israelgua kuéra ohechávo heta itereiha hikuái, opyta okyhyje ha he'i ojupe: “Ko'ãva niko ohundipáta opa ko yvy. Umi yvyty ijyvatevéva, umi yvyty pa'ũ térã umi yvyty karape jepe ndaikatu mo'ãi ojoko chupe kuéra.”

5Upérõ, peteĩ-teĩva, mba'e ñorãirõrã ipópe ombojepota tata umi óga yvatépe ha opyta hikuái upépe ñangarekohárõ upe pyhare.

6Ára mokõiháme, Holofernes ombohasa iñorãirõhára kuéra kavaju arigua, umi Israelgua resa renondépe, oĩva hína Betúliape.

7Upéi oho ohecha umi táva ojeikeha, umi yvu kuéra hoy'uhágui tavagua ha oñemomba'e ko'ãvare, ohejávo upépe oñangareko vaerã, ha upéi ojevy oñemohenda haguépe.

8Upérõ oñemboja hendápe umi Edom ha Moab pegua mburuvicha kuéra, avei umi mburuvicha y rembe'y pegua, ha he'i chupe:

9“Ore ruvicha, ore rendu ramo ndaipóri mo'ãi omanóva ne ñorãirõhára apytépe.

10Ko'ã Israelgua niko ndojeroviái ikyse yvukúre. Ha'e kuéra ojerovia umi yvyty ha'e kuéra oikoháre, hasýgui oñeguahẽ haguã.

11Upévare, eñorãirõ'ỹ hendive kuéra, ani haguã omano peteĩnte jepe ne ñorãirõhárava.

12Epytánte ko'ápe ne ñorãirõhára kuéra reheve. Peñemomba'e umi yvu kuérare,

13upépe ohógui y rekávo umi Betuliagua. Omanombotávo hikuái yuhéigui, ome'ẽta ndéve itáva kuéra. Upe aja, ore rojupíta umi hi'aguĩháme, ropytáta upépe, ha roñangarekóta ani haguã avave osẽ upe távagui.

14Ha'e kuéra, hembireko, ita'ýra ha itajýra kuéra ndaipu'aka mo'ãi ijehe kuéra ñembyahýigui, ha ojejuka mboyve kyse pukúpe ha'e kuéra ho'apátama umi tape rupi.

15Upéicha ojehúta chupe kuéra opu'ã ha nosẽi haguére ne ruguãitĩvo, mburuvicha Holofernes.”

16Ko'ã ñe'ẽ ho'a porã Holofernes ha ipytyvõhára kuérape, ha he'i ojejapo haguã péicha.

17Umi Moabgua kuéra, 5.000 Asírio ñorãirõhára kuéra reheve, oho oñemohenda ñúme, ha oñemomba'e umi Israelgua yvu kuérare.

18Umi edomíta ha amoníta oñemohenda yvyty kuéra rupi, Dotán rovái, ha omondo iñorãirõhára kuéra yvy gotyo, Egrebel rovái, Cus gotyo, oĩva ysyry Mocmur rembe'ýpe. Umi Asírio hembýva oñemohenda upe ñúme, hóga vakapi ha umi mba'e ogueraháva iñasãi upe ñúre heta itereígui hikuái.

Israelgua kuéra ojepy'apy

19Umi Israelgua, ohecha kuaávo omongoraha chupe kuéra umi hese ija'e'ỹva, oñembo'e Tupãme oipytyvõmi haguã chupe kuéra.

20Asírio ñorãirõhára kuéra oĩ haguéicha, umi yvy rupigua, kárro ha kavaju arigua, omongora Israelgua kuérape 34 ára pukukue. Umi Betulia guágui opáma ohóvo y.

21Y ryru kuéra nandipáma. Opavavépe oñeme'ẽ y michĩmi ndohupytýiva ijyuhéi ombogue haguã.

22Umi mitã ikangypa, ha umi kuña ha mitã rusu kuéra ijyuhéigui ho'apa rei, pe táva ryepy rupi ha óga rokẽme.

23Upéicha umi tavagua, mitã rusu, kuña ha mitã nguéra oho Ozías ha myakãhára kuéra rendápe. Ha sapukái pópe he'i chupe kuéra:

24“Tupã te'i mávapa ojapo porã, peẽpa térã ore! Peẽ niko pejapo ivaíva ore rehe, napeñemoĩséigui peteĩ ñe'ẽme Asírio kuéra ndive.

25Ko'ágã ndaipóri avave ikatúva ñane pytyvõ. Tupã voi ñanemoĩ ipópe kuéra. Ñamanóta yuhéigui henondépe kuéra, ha ñane rundipáta.

26Pehenói umi Asírio kuérape ha pemoĩ ipópe kuéra ko táva. Tou Holofernes ha ipytyvõhára kuéra toñemomba'e hese.

27Iporãvéta ha'e kuéra ou ramo oñemomba'e ñande rehe, jaiko hembiguái ramo ha jaikove. Upéicha ramo ndajahecha mo'ãi mba'éichapa omano mitã nguéra ñande resa renondépe, térã mba'éichapa omano ñane rembireko ha ñande ra'y kuéra.

28Yvága ha yvýre, Tupã ñande ypy kuéra Jára rehe, ñane nupãva hína ñane angaipáre, rojerure peẽme pejapo haguã ro'eháicha, ani haguã Tupã ojapo ñande rehe upéicha.”

29Ha peteĩcha, opa umi oĩva guive upépe, oñepyrũ tasẽ ha sapukái pópe, ojerure Tupãme oipytyvõ haguã chupe kuéra.

30Upéma ramo Ozías he'i chupe kuéra: “Ani pene kangy. Ñaha'arõve 5 ára, ha Tupã Ñandejára ñande poriahurerekóta. Ha'e ndahesarái mo'ãi ñande hegui!

31Ágã ohasávo ramo umi ára ha na ñane pytyvõi, upépe katu ajapóta peẽ pejeruréra chéve.”

32Upéi omondo opavavépe upégui: kuimba'e kuéra oho umi óga yvatépe, oĩháme ñangarekoha ramo; ha kuña ha mitã nguéra katu ohopa jey hógape. Pe táva ryepýpe tuicha jepy'apy oñeñandu.