1Pa'i guasu Onías oiko ramo guare, táva marangatu Jerusalén, oiko vaekue py'a guapýpe, ha ojejapo porã tembiapoukapy, ha'e niko vaekue peteĩ kuimba'e imarangatúva, ija'e'ỹva teko añáre.
2Umi mburuvicha guasu jepe ombojerovia ha ombotuicha tuicha tuichave pe tupao reko mimbipa, jopói porã porãme.
3Asia ruvicha guasu Seleuco jepe, ome'ẽ imba'évagui ojejapo haguã umi mymbajuka.*f**
4Ha aipo Simón, pa'i Bilgá rogagua ha omohenondéva tupao, ipochy pa'i guasu Onías ndive, pe táva guasu pegua ñeñemúre.
5Ndaikatúimarõ oñemombarete Oníaspe, oho oñe'ẽ Apolonio Tarsogua ndive, umíva umi árape ñorãirõhára ruvicha vaekue hína Celesiria ha Feníciape,
6ha omombe'u chupe, pe mba'e reta oĩva Jerusalén tupaópe heta etereiha, pirapire oĩva upépe heta itereígui ndaikatúi ojepapa, heta etereive pe oñekotevẽvagui mymbajukarã, ha upévare, mburuvicha guasu ikatuha oñemomba'e upe mba'e retáre.
7Apolonio oho ohechávo mburuvicha guasúpe ha omombe'u chupe pe tupao mba'e reta rehegua. Aipórõ, mburuvicha guasu he'i pe tetã sãmbyhyhára Heliodórope, oho haguã ogueru umi mba'e reta.
8Heliodóro, ohóta ramo gua'u ohechávo Celesiria ha Fenicia, oho pya'ete upépe ojapóvo pe mburuvicha guasu he'i vaekue chupe.
9Jerusalénpe pa'i guasu omoguahẽ chupe torypápe, ha ha'e oporandu chupe añetépa opa oje'éva pe mba'e reta tupao peguáre, ha omombe'u maerãpa oho.
10Pa'i guasu he'i chupe, upe pira pire oĩva tupaópe, umi kuña iména manóva ha tyre'ỹ nguéra mba'eha,
11ha upéva apytépe oimeha Tobías ra'y Hircano, upepegua poguasu mba'éva. Aipórõ, pe tekove jeroviaha'ỹ Simón omombe'úva, japu meme. Omombe'u chupe, pira pire oĩva iñongatupy upe tupaópe ohupytyha 13.200 kílo pláta ha 6.600 kílo óro,
12ha ndaikatuiha mba'evéicharõ oñeme'ẽ pe pira pire ojeheja vaekue oñeñongatu haguã ha ndaikatuiha avei oñemomarã pe tupao oñemboyke vaekue Ñandejára ñoitépe guarã, ha oñemomba'e guasúva opa yvy ári.
13Heliodóro katu, mburuvicha guasu ñe'ẽ ojapóvo, he'i jey-jey upe pira pire aty oñeme'ẽ vaerãha.
14Upe ára ambuépe oike tupaópe oipapa haguã pe pira pire aty, ha maymáva upe táva guasúpe ojepy'apy.
15Pa'i kuéra, omonde ipa'i ao, oñesũ altar*f** renondépe ha oñembo'e Ñandejárape, oheja vaekue upe tembiapoukapy pira pire ñeñongatu rehegua, ha ojerure asy chupe ani haguã ojepoko umi mba'ére.
16Pa'i guasu rova omopirĩmba umi hechahárape: hova sa'yju mimbi ohechauka angata omyenyhẽva ipy'a.
17Pe kyhyje ha ñemondýi ojekuaáva hese ohechauka umi chupe ohechávape ñembyasy guasuete oĩva ipy'ápe.
18Maymáva oko'i joa oñembo'e haguã tupaópe, oĩva hína oñemomarã haguãicha.
19Kuña nguéra, isái hũ ha ipyti'a nandi joáva, osẽmba okápe. Umi mitã kuña ojeheja'ỹva osẽ okápe, oĩ osẽva okẽme, oĩ ojupíva tápia ári ha oĩ iñakãsẽva umi ovetã rupi,
20ha opavave ohupi ijyva yvate ha oñembo'e.
21Ojeporiahurereko haguãicha umi oñesũ joáva ha isarambipáva ápe ha pépe, ha pa'i ruvicha guasu jepy'apy, iñangata guasuetéva.
22Ojejerure asy aja Ñandejára ipu'akapávape ani haguã avave opoko ha oĩ hatã haguã umi mba'e ojereraha vaekue tupaópe oñeñongatu haguã,
23Heliodóro oñepyrũ ojapo pe oho vaekue ojapo haguã.
24Ha oĩma ramo iñirũ nguéra ndive pe pira pire aty oñeñongatuhápe Ñandejára Ipu'akapáva ha Opa Mba'e Járava, oñeñanduka tuicha eterei, ha opa umi tova atãme oike vaekuépe omongyhyjepa Tupã pokatu, ha opyta ipy'a mirĩmba ha ikangypa.
25Ojekuaa sapy'a peteĩ kavaju ojeguapáva ha hi'ári peteĩ oporomondyipáva, ojeitýva Heliodóro rehe ipy mokõive tenonderãvo. Pe kavaju arigua omonde peteĩ tete mo'ãha óro.
26Osẽ sapy'a avei mokõi mitãrusu imbarete etereíva ha iporã itereíva ha oñemonde jeguapáva. Oñemoĩ peteĩ-teĩ Heliodóro ykére, ha heta eterei oinupã hikuái chupe.
27Heliodóro ho'a yvýpe ha noñeñanduvéi. Pya'e porã omopu'ã hikuái chupe ha omoĩ peteĩ tupa'ípe.
28Ha upéicha Heliodórope, heta iñirũ reheve oike vaekue pe pira pire aty oĩháme, oñerenohẽ ati'y ári ikatuve'ỹre oguata ijehegui. Péicha opavave ohecha kuaa Ñandejára pokatu.
29Ha Tupã pokatu rupi, upe kuimba'e opyta aja yvýre, noñe'ẽvéi ha noha'arõ véima oikovéne haguã.
30Israelgua kuéra ome'ẽ ijaguije Ñandejárape, ohechauka vaekue heko mimbipa itupaópe, ha upe tupao upe mboyvemínte oĩ haguépe kyhyje ha py'a tarova, pya'e henyhẽ jey vy'águi ha py'a rorýgui, Ñandejára ipu'akapáva oñeñanduka rupi.
31Heliodóro irũ nguéra oho ojerure Oníaspe oñembo'e haguã Tupã Yvatete guápe ha oheja oikove Heliodórope, omanombotámava hína.
32Pa'i ruvicha guasu, okyhyjégui mburuvicha guasu oimo'ã ramo guarã ojukase mo'ã hague Heliodórope, oikuave'ẽ mymbajuka okuera haguã.
33Ha pe pa'i ruvicha guasu omymbajukávo hína ojeheja rei haguã angaipa, ojekuaa jey umi mitã rusu oñemonde porãitéva, oñembo'y Heliodóro ykére ha he'i chupe: “Embyaguije heta pa'i guasu Oníaspe; iñembo'e rupi, Ñandejára oheja reikove.
34Ha ágã emombe'u opa rupi Tupã ne nupã vaekue ipu'akapaha.” He'ipávo ko'ã mba'e, ndojekuaavéi.”
35Heliodóro oikuave'ẽ peteĩ mymbajuka ha ome'ẽ iñe'ẽ Ñandejárape heta mba'e ojapotaha oheja haguére chupe oikove, ha omomaiteívo Oníaspe oho jey iñorãirõhára kuéra ndive.
36Opavavépe omombe'u mba'épa ojapo Tupã yvatetegua, ha ha'e ohecha hague hesa tee rupi.
37Aipórõ, mburuvicha guasu oporandu Heliodórope mávapepa omondo jeýta Jerusalénpe, ha ha'e he'i:
38“Nde, che ruvicha guasu, oimérõ peteĩ nda'e'ỹha térã opu'ã ñemíva nde rehe, emondo chupe amoite, ha oikove ramo, ou jeýta ne rendápe oñembo'ipa oñenupã hague, ja'étarõ añetehápe, upépe oĩ Ñandejára pu'aka.
39Upe oikóva yvate oma'ẽ upe tupaóre ha oñangareko hese, umi ohóvape mba'e vai apóvo, oinupã ha ojuka.”
40Kóva ha'e imombe'upy Heliodóro ha pe tupao pegua pira pire aty ñeñongatu rehegua.
Who We AreWhat We EelieveWhat We Do
2025 by iamachristian.org,Inc All rights reserved.
