Eclesiástico 15 - Biblia Guaraní con Deuterocanónicos

1Ombyajéva Ñandejárape

ojapo ko'ã mba'e,

ha oñemohatãva

hembiapoukapýre,

ohupytýta arandu.

2Chupe ohuguãitĩta

peteĩ sýicha,

ha omoguahẽta hógape,

hembireko pyahúicha.

3Omongarúta chupe

mba'e kuaa rembi'úpe,

ha omboy'úta

arandu ýpe.

4Ojekóta hese

ha ndovava mo'ãi,

ojoajúta hese

ha noñemotĩ mo'ãi.

5Arandu ohupíta chupe

iñirũ nguéra ári,

ikatu haguã oñemoñe'ẽ

umi atyha rupi.

6Vy'a ha torýgui

chupe omyenyhẽta,

ha omyerakuãta

avave hesaraive'ỹ

haguãicha.

7Ndohupytýi chéne

umi ijapúva,

ha ndohechái chéne

umi ojejapóva.

8Ha'e oñemomombyry

umi otĩ'ỹvagui,

ha oporombotavýva

mba'eve ndoikuaaséi chugui.

9Jeporoguerohory

ndo'ái iñañávare,

Ñandejára nome'ẽigui

chupe kuéra arandu.

10Arandu'ỹre

ndaipóri jererohory,

ha Ñandejára upe ome'ẽva.

11Ani ere:

“Ñandejára che reity”.

Ha'e niko ndojapói

mba'eve ivaíva.

12Ani ere:

“Ha'e che mombía che rapégui”.

Ha'e noikotevẽi

hembiapo vaívare.

13Ñandejára ndaija'éi

teko aña ha ñe'ẽ vaíre.

Ombyajéva Ñandejárape

ndo'ái umívape.

14Iñepyrũháme

Ñandejára ojapo yvypórape,

ha oheja chupe ojapo

ojaposéva.

15Reipotárõ,

rejapo kuaa hembiapoukapy

ha rejapo hekópe

upe chupe ombovy'áva.

16Ne renondépe

ha'e omoĩ tata ha y

reiporavo haguã

pe reipotáva.

17Yvypóra renondépe

oĩ jeikove ha mano.

Chupe oñeme'ẽta

pe ha'e oiporavóva.

18Ñandejára iñarandu eterei,

ha'e ipokatu ha ohechapa.

19Ñandejára ohecha

opa mba'e jajapóva,

ha oikuaapa

ñane rembiapokue.

20Avavépe nde'íri

iñaña haguã,

avavépe nde'íri

ikatuha ojapo ivaíva.