Sabiduría 14 - Biblia Guaraní con Deuterocanónicos

1Ambue katu ojupi

imbayrúpe,

yguasu pochýre oho haguã,

ha ohenói asy

peteĩ yvyrápe, ikangyvéva

upe mbayrúgui.

2Imba'e pota potavégui

ojapouka pe mbayru

po katupyrýpe

ojejapo vaekue,

3ha nde pokatúnte, Tupã,

oisãmbyhy pe mbayru.

Nde rejapo tape iporãva

y guasu pochy rováre,

4rehechaukávo ikatuha

ivaívagui remo'ã,

omboguata kuaa'ỹvape jepe.

5Ndereipotái ojeharu

ne arandu rembiapokue,

upévare oime yvypóra

mbayru yvyráre ojeroviáva,

ha ohasa y guasu mbytére,

Oguahẽ meve ohohápe,

pe mba'e vevyimíme.

6Ha péicha avei

umi yma guare hete rusu

ha ojejapóva

omanomba ramo hína,

pe mbayru vevyimi

nde pópe reisãmbyhýva,

omo'ã vaekue hyepýpe

yvypóra opytáva

oñemuña jey haguã.

7Tojehovasa pe yvyra

teko jojarã ojeporúva,

8ha tojeharu umi ta'ãnga

ha umi ijapohare:

pe yvypóra, ojapo haguére,

ha pe yvyra, ituju vaerãva,

oje'égui tupãha.

9Ñandejára ndaija'éi

heko añávare

ha hembiapo vaikuére,

10ha upe ojejapo vaekue

ijapohare ndive oñehundíne.

11Upévare avei

oñenupã ha oñehundíta

opa ta'ãnga rei oguerekóva

tetã nguéra, jepémo

Tupã rembiapokue avei

umi mba'e ojeporúva

ta'ãnga kuéra ojejapo haguã.

Ijaheipy ramo oiko vaekue

imba'e porãvape guarã,

ha ñuhã ramo

itavývape guarã.

Mba'éichapa oñepyrũ ta'ãnga ñemomba'e guasu

12Ta'ãnga apo reheve

oñepyrũ vaekue teko tie'ỹ

omongy'áva ñande rekove.

13Umíva ndaipóri vaekue

iñepyrũháme

ha ndaha'éi

opa ára guarãva.

14Oike vaekue uvei

ko yvy ári

ojavy haguére yvypóra,

upévare oñehundi pya'éta.

15Peteĩ túva ombyasýva

ita'ýra omano hague

hi'arape'ỹ ojapouka ha'ãnga,

ha pe te'õnguénte vaekuépe

omomba'e guasu tupãicha,

ha omoñembo'e chupe

hóga guápe.

16Upéi ojejepokuaa upéicha.

Ára ohasávo ojeguereko

tembiapoukapy ramo

17Ha upéicha avei

mburuvicha kuéra

ojapouka ha'ãnga

oñemomba'e guasu haguã,

ndaikatúigui

umi mombyry oĩva

oñemomba'e guasu chupe voi.

Ha upéicha ha'e kuéra

ojapo ha'ãnga,

noĩri ramo jepe,

oñemomba'e guasu

oĩ ramo guáicha.

18Ta'ãnga apoha

imba'e potágui,

tupã gua'u rayhu ojepyso,

ha umi mburuvicha guasúpe

oikuaa'ỹva guive jepe,

hapykuéri kuéra oho,

19upe ta'ãnga apohára

ojapógui pe mburuvicha guasu

ra'ãnga iporãvéva chugui

ombojuru he'ẽségui chupe.

20Ha péichape maymáva,

opytávo ijurujái

pe ta'ãnga porãitére,

omomba'e guasu ko'ágã

pe kuehénte yvypóraicha

ombojerovia vaekue.

21Ha upévagui oiko ñuhã

yvypórape guarã.

Ha'e kuéra, oiko asy

térã ojejopýgui,

omoĩ peteĩ yvyra

térã ita pehẽnguére

Tupã ipeteĩete

ha añeteguáva réra.

Mba'épa ogueru hapykuéri ta'ãnga rei ñemomba'e guasu

22ndaha'éi ojavýnteva

umi mba'e Ñandejára guiguápe,

itavy etereígui

avei heko aña

ha upévape ombohéra

py'a guapy.

23Ta'ãnga rei rayhupápe

ha'e kuéra ojuka mitã,

omomba'e guasu ñemi

umi ta'ãnga

hérape ojapo mba'e tie'ỹ,

ha ojapo oñeimo'ã'ỹva,

24nomomba'e véima hikuái

jeikove potĩ ha ñemenda,

oime hapicha ojukáva

hapykuéguio oimo'ã'ỹhágui

térã ombopochýva hapichápe

oikóvo hembireko ndive.

25Opa rupi ojehecha

sarambi ha ñorãirõ:

tuguy osyry, ojeporojuka,

oñeporombotavy, oñemonda,

oime ijapeguy peguáva

ha ijapúva hapicha ndive,

26heko porãva jerereko asy,

tapicha rayhúgui tesarái,

py'a ñemongy'a,

teko tie'ỹme jeiko,

omendáva oñoakãre opu'ã,

ñerãirõ ha opaichagua

teko tie'ỹ.

27Ta'ãnga rei

ñemomba'e guasúgui

osẽ opaichagua mba'e vai.

28Umi ta'ãnga rei

omomba'e guasúva

ojapo vy'a guasu

iñakã tarovápe,

he'i marandu gua'u,

oiko teko joja'ỹme

ha opyrũ

iñe'ẽ ome'ẽ vaekuére.

29Ojeroviágui

umi ta'ãnga oikove'ỹvare,

noha'arõi ivaíva

iñe'ẽ japúgui.

30Ha oñenupãta hikuái

mokõi mba'ére:

oikuaa hekope'ỹ haguére Tupãme

ta'ãngápe oñeme'ẽvo,

ha iñe'ẽ ome'ẽ haguére

upe añetegua'ỹva

ha heko joja'ỹvare,

ha upéva ojapóvo

ojahéi mba'e marangatúre.

31Ta'ãnga rei rayhuha

oñenupãta ndaha'éi iñe'ẽ

ome'ẽ vaekuére,

hembiapokuérente katu.