Sabiduría 18 - Biblia Guaraní con Deuterocanónicos

Israelgua ojehesape

1Ne retãgua

marangatúpe katu,

mba'e rendy ne porãva

ohesape.

Ha umi Egiptogua

ohendúva iñe'ẽ ohecha'ỹre

chupe kuéra,

oguerohory chupe kuéra

ovy'a ha ndohasa asýigui

ha'e kuéraicha.

2Omboaguije uvei katu,

nomyengoviái haguére

chupe kuéra umi jeiko asy

ha'e kuéra

ombohasa vaekue Israel guápe,

ha ojerure oñembyesarái

haguã ojopy vai haguégui

hendive kuéra.

3Pe pytũ guasu rangue

reme'ẽ ne retã guápe,

tata ñembo'y

ojehesape haguã

umi tape ojekuaa'ỹvare,

kuarahýicha ojopéva

ohapy'ỹre chupe kuéra

Ñandejára pepo guýpe

oguatávo,

4Ha iporã vaekue

ndojehesapéi

ha oñeñapytĩ pytũ guýpe,

umi oguereko vaekue

ipo guýpe ne retã guápe

ojeporavo vaekue

omosarambi haguã

ne rembiapoukapy marã'ỹ,

opa yvypóra apytépe.

Egiptogua ra'y kuéra ypykue mano

5Umi Egiptogua ojukapa

imarangatúva ra'y kuérape;

ha umívagui, peteĩ

añoite opyta oikove.

Ha chupe kuéra reinupãvo,

rejuka

ita'ýra kuéra ypykue,

ha y ipochývape reity

iñorãirõhára kuéra

omanomba haguã hikuái.

6Upe pyharépe

oiko haguã ko'ã mba'e,

mba'eve ojehu mboyve,

ore ru kuéra ypykuépe

reikuaauka upe oikótava,

ikatu haguã

oñeñandu mbarete

ojeroviávo ne ñe'ẽre.

7Ne retãgua kuéra upérõ

oha'arõ vaekue avei

umi imarangatúva

osẽtaha jejopy vaígui,

ha nde rehe ija'ỹva

oñehundipataha.

8Pe ñenupã reme'ẽ vaekue

umi ore rayhu'ỹvape,

ore myenyhẽ torýgui,

ne rendápe ore renóivo.

9Upévare, umi imarangatúva,

heko jojáva ñemoñare,

omymbajuka*f** vaekue ñemiháme,

ha peteĩ ñe'ẽtépe

omoĩ hikuái hendápe

ne rembiapoukapy.

Imarangatúva

peteĩchata opavave,

iporãva rerekópe

ha ivaíva jehasápe.

Ha upérõma voi

oñepyrũ opurahéi

túva ypy kuerakue purahéi.

10Hovái kuéra oñehendu

umi hese kuéra ija'e'ỹva

py'ambu,

ha opa rupi oñehendu

imitã kuérare

ojahe'o soróva.

11Peteĩcha oñenupã

tembiguái ha ijára kuéra,

mburuvicha guasúva ha tavagua

peteĩcha ohasa asy.

12Opavave peteĩcha oguereko

hogagua omanóva,

peteĩcha meme opáva.

Umi oikovéva ndaipu'akái

te'õngue oñotỹmba haguã,

omanógui sapy'aitépe

iñemoñare porãnguete.

13Péicha, umi paje rupi

ndogueroviavéi vaekue mba'eve,

ta'ýra kuéra ypykue

omanombávo, ohecha kuaa hikuái

Israelgua kuéra

Tupã ra'y memeha.

14Py'a guapy ha kirirĩ

opa mba'e oñuã,

ha pyhare pyte Oguahẽvo

15ne Ñe'ẽ ipu'akapáva,

ñorãirõhára py'a guasúicha

yvágagui ojepoi,

nde guapyha mimbipágui,

ha ho'a upe yvy ári

oñehundíma haguã.

16Ne rembipota ipópe

kyse rãimbe ramo guáicha,

omosarambi opa rupi te'õngue.

Opoko javeve yvágare

yvy ári itenonde.

17Upépe, oimo'ã'ỹhágui,

umi Egiptogua ku ohechárõ guáicha

ivaíva iképe,

omyenyhẽ chupe kuéra

kyhyje oha'arõ'ỹva.

18Yvýre ojepyso umi omanótava,

ha oikuaauka joa hikuái

Mba'éicha rupípa omanóta,

19omomarandúguima voi

chupe kuéra upe mboyve

umi iképe ohecha vaekue,

ani haguã omanótei

oikuaa'ỹre mba'érepa

umi jeiko asy ohasa.

Israelgua kuéra osẽ jejopy vaígui

20Umi heko jojávape

oguahẽ avei mano,

ha pe yvy ojeiko'ỹháme

heta iterei ojejuka.

Ha Tupã katu ndaipochy aréi,

21pya'ete oñemoĩgui

peteĩ kuimba'e joheipyre

oñe'ẽ hesehápe kuéra.

Ipópe hembikuaa

pa'i ramo oguerekóva:

ñembo'e ha insiénso ñemyatatĩ

angaipa jeheja reirã.

Ha'e osẽ

pe nde pochy renondépe,

ha ivaíva opa,

ohechaukávo ne rembiguaiha.

22Ha'e ombogue ne ñemyrõ,

ndaha'éi ipyapy mbaretégui,

térã ikyse ha ihu'y hetágui.

Iñe'ẽme ojoko ne ñenupã,

ne momandu'ávo

ne ñe'ẽ ñome'ẽnguére

ore ru ypy kuerakue ndive.

23Isarambi ramo hína

te'õngueta ojo'ári,

ha'e osẽ ne renondépe

ha ojoko ne ñemyrõ,

ani haguãtei oguahẽ

umi oikovévape gueteri.

24Ipa'i aóre oĩ

ko yvy tuichakue ra'ãnga

ha umi irundy ita jeguáre

ojekuaa

itúva kuéra ypy kuéra réra

omimbipáva

ha pe iñakãpytĩháre

nde reko mimbipa.

25Ko'ã mba'e renondépe,

upe oporojukáva

okyhyje ha oguevi,

Ohechágui iporãmaha,

peteĩ ñenupã

nde pochy ogue haguã.