Eclesiástico 1 - Biblia Guaraní con Deuterocanónicos
Ñe'ẽ tenondeguaHeta ikuaapyrãva oheja vaekue ñandéve Moisés rembiapoukapy, maranduhára*f** kuéra ha umi ambue omba'e hai vaekue umíva rapykuéri. Upévare ojererohory vaerã Israelgua hemimbo'e ha iñarandukuére.Umi ikuatia kuéra oipyguaráva, ndaha'éi ha'e kuérante oikuaa vaerã, oñeha'ã vaerã uvei katu ombohasa hapicha kuérape.Upévare che taita guasu Jesús, oikuaa porã rire opa umi mba'e, oñeha'ã vaekue ohai ijehegui heta mba'e, arandu ha temimbo'e rehegua, ikatu haguã umi ijyuhéiva mba'e kuaáre oñembokatupyry avei Ñandejára rembiapoukapy apópe.Nde, reguerekótava nde pópe ko kuatia, eñeha'ã kena py'a porãme ehecha kuaa chéve, oimérõ nda'epa porãi ra'e griégo ñe'ẽme upe ha'e he'i vaekue hebréo ñe'ẽme. Umi mokõi ñe'ẽ niko oiko eterei ojuehegui ha peteĩ-teĩ oguereko mba'éichapa he'íta upe he'iséva. Ha ndaha'éi ko kuatia añónte: Moisés Rembiapoukapy, Maranduhára kuéra ha umi ambue kuatia ñe'ẽ avei, oiko eterei umi ñe'ẽ ojehai ypy haguégui.Áño 38 oñepyrũ haguépe oisãmbyhy Egíptope Mba'e porã apoha, aju hetãme ha upépe che are'imi. Upérõ ija vaekue chéve ajeheko mbo'e haguã ha ajuhu vaekue tekotevẽha che avei añemoĩ tembiapópe ambojere haguã ambue ñe'ẽme ko kuatia. Heta ára ha pyhare ha opa che mba'e kuaa aiporu amoĩmba ha anohẽ haguã ko kuatia, umi mombyrygua Moisés rembiapoukapýpe oikosévape guarã.
