Sabiduría 4 - Biblia Guaraní con Deuterocanónicos

Iporãve nañande ra'ýi ñane ñemoñare ñaña vaerãrõ

1Iporãve ñande reko porã

na ñande ra'ýi ramo jepe,

teko porã oheja

mandu'a opa'ỹva,

upéva oguerohory Tupã

ha yvypóra.

2Ojehechárõ

ojeikose ha'éicha,

ojehecha'ỹrõ katu

ojehechaga'u.

Ára opa'ỹháme

oñembojegua isyva,

osẽ porã haguére

mba'e porã potĩ jehupytýpe.

3Iñañáva ñemoñare katu

ndaha'éi mba'eve.

Mitã okáraicha heñóiva

ndahapo pypukúi ha noihatãi.

4Hakã nguéra

okakuaa ramo jepe,

ndahapo hatãigui

okachapáne yvytúpe,

ha omondoro katueténe

upe yvytu ratã.

5Ikyrỹime gueteri

umi hakã oñemopẽne,

ha umi hi'a naiporãi chéne.

Ndahi'ajúi chéne

oje'u haguãicha

ha naiporãi chéne mba'everã.

6Mitã ou vaekue

heko'ỹ megua joajúgui

omombe'u pe itúva reko vaikue,

oñembojovake jave.

7Heko jojáva opytu'u

omano voi ramo jepe.

8Itujáva

ndojejapói mba'e ramo

oikove puku haguérente,

hekove noñeha'ãi

umi ára ohasa vaekuére.

9Akã rague morotĩ

ohechauka akã guapy,

ha ñeguahẽ tujápe,

teko porã.

10Imba'e porãvape

ohayhu Ñandejára,

ha mba'e vai apoha apytégui

ogueraha chupe,

11Ohupi chupe

ani haguã ivaíva ombyai,

ha japu omyakã raku chupe.

12Ivaíva

ñande py'a rerahárõ

omoypytũ iporãva,

ha akã raku vai ombyai

imarangatúvape.

13Imarangatúva

voi ohupyty teko porã

jeikove pukúpe

ambue ohupytýva.

14Ha chupe ho'a porãgui

Ñandejára

pya'e oipe'a chupe,

iñañáva apytégui.

Ko'ã mba'e ohecháva,

ndohechakuaái,

ndohasái voi iñakã rupi,

15mba'érepa Ñandejára

oiporiahurereko ha imba'e porã

umi ha'e oiporavóva ndive.

16Heko jojáva omanóva

ohova api umi iñañáva

oikovévape,

ha mitã rusu

voi heko porãva,

heko aña oikove pukúvape.

Iñañáva omano hi'arape'ỹ

17Opavave ohecháne

imarangatúva omanórõ,

ha opáichavo

ndoikuaái chéne mba'épa

Ñandejára oipota chugui

ha mba'érepa ogueraha

oiko porã haguãme

18Oma'ẽne hese jeguarúpe,

Ñandejára katu

opukáne hese kuéra.

19Upéi chugui kuéra

oikóne te'õngue iky'áva,

umi omano vaekue jepe

ojeguaruha.

Ñandejára oitýne oakãvo

oheja'ỹre oñe'ẽ,

oityvyróne

umi oñemopyendahágui,

opyta'ỹre avavete,

ñembyasýpe oñapymíne,

ha avave naimandu'avéi chéne

hese kuéra.

Iñañáva ohecha kuaa ojavy hague

20Oguahẽvo ára

oñembojovake haguã,

ha ojepapa iñangaipa

peteĩ-teĩ,

oguahẽne hikuái kyhyje pópe,

ha ojehova apíne chupe kuéra

umi mba'épe.